AD /ART SIPAHUTAR BIG FAMILY

RUHUT BOLON

PUNGUAN POMPARAN RAJA SIPAHUTAR DOHOT BORUNA JABODETABEK

ANGGARAN DASAR


BINDU I
GOAR NI PUNGUAN, INGANAN DOHOT LELENGNA

Pasal 1
Goar ni Punguan on, ima :
PUNGUAN POMPARAN RAJA SIPAHUTAR DOHOT BORUNA JABODETABEK

Pasal 2
Inganan haojahan ni Punguan on, ima di Jakarta Raya dohot nahumaliangsa, na manghangham Bogor, Depok, Tangerang dohot Bekasi. Laos digoari ma JABODETABEK.

Pasal 3
Hajongjongan ni Punguan on ndang marbolat / marbatas lelengna.


BINDU II
OJAHAN DOHOT TUJUAN

Pasal 4
Punguan on marojahan ma diholong dohot sada niroha, na ni ihot ni parmudaron jala marpedoman tu Pancasila dohot UUD 1945.

Pasal 5
Tujuan pajongjonghon Punguan on, ima :

1. Patotahon dohot papitahon angka paradaton dohot patoguhon hasadaon ni roha, dipambahenan na marondolan tu adat Batak naso maralo tu parugamaon ditonga-tonga ni Marga Sipahutar dohot Boruna, asa tong masiamin-aminan songon lampak ni gaol, masitungkol-tungkolan songon suhat dirobean, mangangkat rap tu ginjang manimbung rap tu toru, satahi saoloan, saurdot sapangalakkaan, huhut masihaholongan, masiurupan dohot di angka ragam ni ulaon manang na masa ditonga-tonga ni Marga Sipahutar dohot Boruna.

2. Panaekhon hamajuon di Pomparan ni Raja Sipahutar dohot Boruna na di Jabodetabek, dohot di Indonesia.


BINDU III
HAK DOHOT KEWAJIBAN NI RUAS

Pasal 6
Ruas ni Punguan ima sude Pomparan ni Raja Sipahutar (Anak dohot Boru) na maringanan di Jabodetabek. Jala tarbagi ma i gabe tolu horong, ima : Ruas Nagok, Naposobulung dohot Ruas Lambung.

1. Ruas Nagok, ima baoa dohot boru Marga Sipahutar naung hot ripe.
2. Ruas Naposobulung, ima angka Naposobulung iananghon ni Sipahutar dohot iananghon ni boru ni Sipahutar
3. Ruas Lambung ima natoras ni ruas Nagok na ro mangebati ianakhonna; manang sisolhot na gabe tanggungan ni ruas, naung tarsurat gabe ruas Nagok.


Pasal 7
1. Diparngoluon dohot angka pambahenan ni Punguan, dos do hak ni sude ruas, nang ditingki ulaon las ni roha dohot ditingki habot ni roha.
2. Ganup ruas nagok, mar-hak jala wajib do mamillit; dohot dipillit gabe pangurus ni Punguan.


Pasal 8
1. Asa gabe ruas nagok wajib jala ingkon pasurathon dirina tu Punguan.
2. Ganup ruas nagok wajib do manggarar iuran songon na ditontuhon dibagasan Anggaran Rumah Tangga ni Punguan.
3. Ganup ruas, gabe sipardohot; laho padengganhon parngoluan ni Punguan, ima marhite na pasahat manang mangalehon pamingkiran berupa angka saran, gogo, sibahenon dohot angka na asing dope.


BINDU IV
PARHEPENGON DOHOT USAHA

Pasal 9
1. Hepeng na porlu pangkeon ni Punguan, marharoroan mai sian iuran Toktok Ripe, Gugu dohot angka sumbangan ni ruas.

2. Asing ni hepeng na sian ruas, Punguan boi do patupahon angka usaha na ture laho papungu dana na hombar tu haporluan ni Punguan, dohot angka usaha na asing na so martontangan dohot Ruhut Bolon / Anggaran Dasar ni Punguan.

BINDU V
PANGURUS NI PUNGUAN

Pasal 10
1. Pangurus ni Punguan on ditiroi angka Paniroi / Penasehat.

2. Punguan diuluhon Pangurus, namarsusunan songon on :

- Ketua Umum
- Wakil Ketua Umum
- Sekretaris Umum
- Wakil Sekretaris Umum
- Bendahara
- Wakil Bendahara
- Ketua – ketua bidang
a. Bidang Adat
b. Bidang Sosial dohot Kesejahteraan (Kesra)
c. Bidang Organisasi, Usaha dohot Sumber Daya Manusia (OUSDM)
d. Bidang Seni dohot Budaya
e. Bidang Kepemudaan
- Ketua – Ketua Wilayah
- Koordinator Sektor

3. Periode pangurus lelengna 4 (opat) taon, na dipillit sian tonga-tonga ni ruas na gok songon hatontuan naung diatur di Anggaran Rumah Tangga ni Punguan.

4. Pamilliton ni pangurus, diuluhon Paniroi ni Punguan.


BINDU VI
RAPOT NI PANGURUS

Pasal 11
Ragam ni Rapot sipamasaon ni pangurus, ima :

a. Rapot Bolon, ima Rapot hadomuan ni pangurus dohot sude ruas
b. Rapot Bona Taon, ima nagabe Pesta Bona Taon ni Punguan
c. Rapot Pleno, ima rapot ni pangurus dohot paniroi
d. Rapot harian ni angka pangurus ni Punguan.


Pasal 12
1. Rapot Bolon dipatupa ditingki patupa Pesta Bona Taon manang Pesta Ulang Tahun ni Punguan, na ummotikna sahali 2 (dua) taon, jala didohoti na ummotikna ⅔ (dua partolu) ruas nagok ni Punguan.
2. Di Rapot Bolon do patupaon Pamilliton ni Pangurus Punguan na imbaru, dung jolo mengevaluasi angka ulaon ni Pangurus naung salpu.


BINDU VII
PERUBAHAN RUHUT BOLON / ANGGARAN DASAR NI PUNGUAN

Pasal 13
1. Ruhut Bolon / Anggaran Dasar ni Punguan bolas do ubaon, domu tu hadenggananna huhut ditolopi ruas ditingki Rapat Bolon

2. Pangurus na imbaru ma na manguba Ruhut Bolon i ditingki Rapot Pleno ni Punguan.

BINDU VIII
ATURAN NA ASING

Pasal 14
a. Angka hatorangan na hurang lengkap jala na so ditontuhon dope di Ruhut Bolon / Anggaran Dasar on, diatur ma i di Anggaran Rumah Tangga.
b. Angka aturan naung ditontuhon di Anggaran Rumah Tangga, bolas do diuba jala dipalehet laho paandarhon tu hamajuon ni partingkian manang hamajuon ni zaman.
c. Pangurus ni Punguan ma manguba jala palehet i ditingki Rapot Pleno ni Pangurus

Jakarta, 24 Nopember 2007

PUNGUAN POMPARAN RAJA SIPAHUTAR DOHOT BORUNA JABODETABEK


Ketua Umum Sekretaris Umum


Mangaraja Sipahutar Rikson Sipahutar SE

Paniroi / Penasehat
1. Letkol TNI AD (Purn) Daulat H Sipahutar ( ttd )
2. Maju (Op. Cristofel) Sipahutar ( ttd )
3. St Drs Manahan Sipahutar ( ttd )
4. Drs P Pangondian Sipahutar ( ttd )
5. St Rayberth Sipahutar SE ( ttd )











ANGGARAN RUMAH TANGGA


BINDU I

RUAS NI PUNGUAN

Pasal 1
Ganup ruas pasurathon dirina tu pangurus ni Punguan marhite Ketua Wilayah / Koordinator Sektor diingananna be.

Pasal 2
a. Ganup ruas nagok (Rumah Tangga) wajib manggarar iuran hepeng di ganup taon, mangalehon gugu toktok ripe na tinontuhon ni Punguan; mangalehon sumbangan dana sian na taronjar ni rohana bahen sipangkeon tu angka ulaon pinamasa ni Punguan dohot tu haporluan na asing di tonga-tonga ni Punguan.
b. Ganup ruas nagok wajib mangalehon pangurupion sian na taronjar rohana tu dongan ruas na marsitaonon manang ala ni namarsak ala ni parungkilon bolon.
c. Parungkilon manang arsak niroha na porlu manjalo pangurupion sian ruas ima ditingki hamatean, hagoran jabu, kebanjiran dohot angka na asing dope na ditontuhon ni pangurus dohot paniroi ni Punguan.

Pasal 3
a. Bahenon do pangurupion sian Punguan dohot sian ruas ni Punguan molo adong ruas ni Punguan uju monding natua-tua, ama manang ina, manang ianakhon ni ruas nagok di tonga-tonga ni Punguan.
b. Bahenon do pangurupion sian Punguan dohot sian ruas molo adong ruas lambung na monding.
c. Bahenon do pangurupion sian Punguan tu natoras ni naposobulung, molo adong monding ruas naposobulung.
d. Molo monding natua-tua ni ruas nagok di bona ni pasogit, patupaon ni Punguan do manise, mangapuli huhut mamboan indahan sipaet-paet marasam dohot biaya Rp 300.000. (tigaratus ribu rupiah).
e. Molo monding ruas nagok manang ianakhonna, manang ruas lambung, patupaon ni Punguan do tu keluarga i manise, mangapuli huhut mamboan indahan sipaet-paet marasam dohot biaya Rp 300.000. (tigaratus ribu rupiah).
f. Molo monding natua-tua ni naposobulung di bona ni pasogit, lahoma utusan ni Punguan pasahathon hata togar-togar tu ruas i.

Pasal 4
a. Sude do ruas nagok bolas mandapot pangurupion sian tonga-tonga ni ruas ditingki masa hagoran jabu manang bencana alam.
b. Godang ni pangurupion ima sian na taronjar rohanabe jala Punguanma na papunguhon manang namangkoordinir dohot na pasahathon tu na marsitaonon i.

Pasal 5
a. Pasahaton ni Punguan do Tumpak tu ruas ni Punguan ditingki :
- Pesta pangolihon anak (sian horong anak)
- Pesta mangadati (sian horong anak)
godang na Rp. 150.000.- (saratus limapuluhribu rupiah).

b. Pasahaton ni Punguan do Ulos Holong tu ruas ni Punguan ditingki :
- Pesta pamulihon boru (sian horong anak dohot sian horong boru)
- Pesta pangolihon anak (sian horong boru)
- Pesta mangadati (sian horong boru)
marasam Rp.150.000.- (saratus limapuluhribu rupiah).


BINDU II
PARHEPENGON

Pasal 6
a. Iuran sipasahaton ni ruas (per rumah tangga) dibagasan sataon godangna Rp 30.000. (tolupuluribu rupiah), molo boi sahali manggararma i dibahen.
b. Gugu toktok ripe ditontuhon Punguan ma balgana, domu tu haporluan ni ulaon na naeng sipatupaon.
c. Sumbangan manang partisipasi sian ruas tu Punguan, godangna ima sian nasa na taronjar rohana be.
Pasal 7
a. Arta dohot hepeng na jinalo ni Punguan sian ruas dohot sian angka na asing dope disimpan bendahara ma i tu Bank.
b. Panimpanon dohot pangharuaron ni hepeng ingkon sian panolopion, parbinotoan ni Ketua Umum manang sian pangurus na dihunjuk ni Ketua Umum.


BINDU III
TUGAS DOHOT TANGGUNG JAWAB NI PANIROI/PENASEHAT DOHOT PANGURUS NI PUNGUAN

Pasal 8
1. Paniroi/Penasehat ni Punguan :
a. Maniroi angka Pangurus dohot Ruas ni Punguan Pomparan Raja Sipahutar dohot Boruna se Jabodetabek domu tu fungsi, misi dohot visi ni Punguan
b. Mamingkirhon laho pamajuhon Punguan rap dohot angka pangurus ni Punguan
c. Rap dohot Ketua Umum mangalangka mamboan goar ni Punguan tu bagas dohot tu ruar ni Punguan, jala mambahen hubungan tu lembaga-lembaga adat na adong di Jabodetabek, dohot Indonesian on.

2. Ketua Umum :
a. Manguluhon Punguan domu tu fungsi, misi dohot visi ni Punguan
b. Manguluhon sude pangurus Punguan dohot Ketua-ketua Wilayah asa rap mangkaringkothon di angka ulaon na be, ditonga-tonga ni Punguan
c. Mamingkirhon laho pamajuhon Punguan
d. Manguluhon sude pangurus Punguan mangalangka mamboan goar ni Punguan tu bagas dohot tu ruar ni Punguan, jala mambahen hubungan tu lembaga-lembaga adat na adong di Jabodetabek.

3. Wakil Ketua Umum :
a. Mangurupi Ketua Umum mangulahon na hombar tu fungsi, misi dohot visi ni Punguan
b. Mangurupi Ketua Umum jala mewakili molo marhalangan
d. Manghehei sude pangurus Punguan dohot Ketua-ketua Wilayah asa rap mangkaringkothon di angka ulaon na be, ditonga-tonga ni Punguan
e. Mamingkirhon laho pamajuhon Punguan

4. Sekretaris Umum :
a. Mangurupi Ketua Umum mangulahon na hombar tu fungsi, misi dohot visi ni Punguan
b. Mangulahon jala mandalanton administrasi ni Punguan
c. Mampartanggungjawabhon sude dokumen ni Punguan na masuk manang na haruar dohot angka na marhadomuan tu si
d. Dohot mamingkirhon laho pamajuhon Punguan.

5. Wakil Sekretaris Umum :
a. Mangurupi Sekretaris Umum jala mewakili molo marhalangan
b. Mangurupi jala mandalanton administrasi ni Punguan
d. Dohot mamingkirhon laho pamajuhon Punguan.

6. Bendahara
a. Mangurupi Ketua Umum mangulahon na hombar tu fungsi, misi dohot visi ni Punguan
b. Manjalo, manimpan dohot mangharuarhon hepeng ni Punguan sian parbinotoan, jala na tinottuhon manang na dirujuk ni Ketua Umum
c. Mampartanggungjawabhon sude keuangan/hepeng na masuk/haruar sian Punguan dohot angka na hombar tu si, per-triwulan secara tertulis tu Ketua Umum
d. Mangalehon wewenang tu Wakil Bendahara laho mengelola Kas Kecil Punguan sian parbinotoan ni Ketua Umum
e. Dohot mamingkirhon laho pamajuhon Punguan.

7. Wakil Bendahara
a. Mangurupi jala mewakili Bendahara molo marhalangan, jala berfungsi ma sebagai operasional ni Punguan sehari-hari, baik hepeng na masuk manang na haruar dohot persetujuan ni Bendahara/Ketua Umum
b. Manjalo, manimpan dohot mangharuarhon hepeng ni Punguan sian Kas Kecil Punguan sian parbinotoan jala na tinottuhon manang na dirujuk ni Ketua Umum
c. Mampartanggungjawabhon sude keuangan/hepeng na masuk/haruar sian Kas Kecil ni Punguan dohot angka na hombar tu si, laporan tarsurat tu Bendahara per-bulan
d. Dohot mamingkirhon laho pamajuhon Punguan.

8. Ketua Bidang Adat merangkap Anggota :
Ketua :
a. Mangurupi Ketua Umum mangulahon na hombar tu fungsi, misi dohot visi ni Punguan
b. Mangurupi jala boi mewakili Ketua Umum molo marhalangan
c. Mangulahon angka ulaon paradaton na masa ditonga-tonga ni Punguan, i ma ulaon las ni roha, ulaon arsak ni roha, huhut koordinasi tu Ketua Bidang Kerohanian/Bidang Sosial dohot Kesra
d. Manosoi jala mandata pelaksanaan ni paradaton asa hombar tu sintuhuna be
e. Mamingkirhon angka paradaton nabolas sitotophononton ditonga-tonga ni Punguan
f. Angka ulaon na pinasahat tu Ketua Bidang Adat, diurupi Sekretaris/Wakil Sekretaris, Bendahara/Wakil Bendahara ma i manang sian Paniroi/Pengurus songon na mewakili Ketua Umum molo marhalangan
g. Mambahen kaderisasi; parhata sian ganup ompu
h. Dohot mamingkirhon laho pamajuhon punguan

Anggota :
a. Mangurupi Ketua Umum dohot Ketua Bidang Adat molo berhalangan, jala manguluhon na hombar tu fungsi dohot misi ni Punguan
b. Mangulahon angka ulaon na tarsurat di Bindu III Pasal 8 ayat 8 (c s/d h) Anggaran Rumah Tangga Punguan

9. Ketua Bidang Kerohanian merangkap Anggota :

Ketua :
a. Mangurupi Ketua Umum laho mandalanhon na hombar tu fungsi, misi dohot visi ni Punguan tarlumobi ma i diangka na masa ditonga-tonga ni Punguan, mangalehon angka pamingkirion na laho sipatupaon tu Punguan
b. Manguluhon acara kerohanian, maniroi angka ruas, molo adong ulaon las ni roha tarlumobi mai ulaon habot ni roha ditonga-tonga ni Punguan, dikoordinasihon mai dohot Ketua Bidang Adat
c. Mangalehon angka paniroion tu angka ruas na bersifat membangun tarlumobi ma i tu angka Naposobulung; songon sada kewajiban ma i laho mangalehon bimbingan mental manang songon siraman rohani sian na berkompeten, ditonga-tonga ni Pomparan Raja Sipahutar dohot Boruna
d. Angka ulaon na hombar tu Bidang Kehoranian diurupi Sekretaris/Wakil Sekretaris dohot Bendahara/Wakil Bendahara ni Punguan ma i
e. Dohot mamingkirhon laho pamajuhon Punguan.

Anggota :
a. Mangurupi Ketua Umum dohot Ketua Bidang Kerohanian molo marhalangan, jala manguluhon na hombar tu fungsi dohot misi ni Punguan
b. Mangulahon angka ulaon na tarsurat di Bindu III Pasal 8 ayat 9 (c s/d e) Anggaran Rumah Tangga Punguan

10. Ketua Bidang Sosial dohot Kesejahteraan (Kesra) :

Ketua :
a. Mangurupi Ketua Umum mangulahon na hombar tu fungsi, misi dohot visi ni Punguan, jala membangun dohot mangalehon, mambahen pamingkirion diangka sipatupaon ni Punguan tu tingki na jempek dohot tu tingki na naeng ro on dope
b. Mangurupi jala boi mewakili Ketua Umum molo marhalangan
c. Manguluhon angka ulaon na bersifat sosial ditonga-tonga ni Punguan
d. Patupahon ulaon pangurupion (teken list/partisipasi) molo jumpa angka na marsitaonon ditonga-tonga ni ruas, isara : namonding, kebanjiran dohot hagoran jabu.
e. Mangatur partingkian laho manise, mangapuli tu angka keluarga na marsitaonon, dikoordinasihon ma i tu Ketua Wilayah/Sektor setempat, laos mambahen boa-boa tu ruas, tu Ketua Bidang Adat, Ketua Bidang Kerohanian dohot tu pangurus Punguan secara langsung, via telepon manang sian pos
f. Angka ulaon ni Ketua Bidang Sosial dohot Kesra diurupi Sekretaris/Wakil Sekretaris dohot Bendahara/Wakil Bendahara ni Punguan ma i
g. Dohot mamingkirhon laho pamajuhon Punguan.

Anggota :
a. Mangurupi Ketua Umum dohot Ketua Bidang Sosial dohot Kesra molo marhalangan, jala manguluhon na hombar tu fungsi dohot misi ni Punguan
b. Mangulahon angka ulaon na tarsurat di Bindu III Pasal 8 ayat 10 (c s/d g) Anggaran Rumah Tangga Punguan

11. Ketua Bidang Organisasi, Usaha dohot Sumber Daya Manusia (OUSDM) :

Ketua :
a. Mangurupi Ketua Umum mangulahon na hombar tu fungsi, misi dohot visi ni Punguan, jala membangun dohot mangalehon, mambahen pamingkirion diangka usaha nabolas sipatupaon ni Punguan tu tingki na jempek dohot tu tingki na naeng ro on dope
b. Mangurupi jala boi mewakili Ketua Umum molo marhalangan
c. Mangulahon jala manghehei angka ruas dohot pangurus ni Punguan asa ringgas jala mangharingkothon Punguan
d. Sebagai koordinator di sude Ketua Wilayah; maniroi Naposobulung jala menginventarisasi sude arisan-arisan na adong ditonga-tonga ni Punguan Pomparan Raja Sipahutar dohot Boruna Jabodetabek
e. Membangun jala mangalului sumber-sumber dana dohot usaha na asing laho tu haporluan ni Punguan
f. Membangun Sumber Daya Manusia ditonga-tonga ni Punguan
g. Angka ulaon na pinasahat tu Ketua Bidang Organisasi dohot Sumber Daya Manusia, diurupi Sekretaris/Wakil Sekretaris, Bendahara/Wakil Bendahara ma i manang sahalak sian Paniroi/Pangurus songon na mewakili Ketua Umum molo marhalangan
h. Dohot mamingkirhon laho pamajuhon Punguan

Anggota :
a. Mangurupi Ketua Umum dohot Ketua Bidang Organisasi dohot Sumber Daya Manusia molo marhalangan, jala manguluhon na hombar tu fungsi, misi dohot visi ni Punguan
b. Mangulahon angka ulaon na tarsurat di Bindu III Pasal 8 ayat 11 (c s/d h) Anggaran Rumah Tangga Punguan

12. Ketua Bidang Seni dohot Budaya :

Ketua :
a. Mangurupi Ketua Umum mangulahon na hombar tu fungsi, misi dohot visi ni Punguan, jala mambangun dohot mangalehon, mambahen pamingkirion diangka sipatupaon di bidang Seni dohot Budaya na hombar tu paradaton ditonga-tonga ni Punguan disesuaihon ma i tu perkembangan ni zaman na so martontangan dohot hakristenon/agama jala ndang pamagohon kredibilitas adat ni bangso Batak
b. Manghobasi sarana dohot prasarana molo masa ulaon las ni roha manang habot ni roha ditonga-tonga ni Punguan, dikoordinasihon mai tu Ketua Bidang Adat dohot tu Ketua Bidang Kerohanian
c. Angka ulaon na pinasahat tu Ketua Bidang Seni dohot Budaya diurupi Sekretaris/Wakil Sekretaris, Bendahara/Wakil Bendahara mai manang sahalak sian Paniroi/Pangurus songon mewakili Ketua Umum molo berhalangan
d. Dohot mamingkirhon laho pamajuhon Punguan

Anggota :
a. Mangurupi Ketua Umum, Ketua Bidang Seni dohot Budaya molo berhalangan, jala manguluhon na hombar tu fungsi dohot misi ni Punguan
b. Mangulahon angka ulaon na tarsurat di Bindu III Pasal 8 ayat 12 (b s/d d) Anggaran Rumah Tangga Punguan

13. Ketua Wilayah / Koordinator Sektor :


a. Mangurupi Ketua Umum mangulahon na hombar tu fungsi, misi dohot visi ni Punguan
b. Mewakili pangurus Punguan molo marhalangan, huhut mangulahon angka na porlu sipatupaon hombar tu namasa di wilayah i (ulaon las ni roha dohot habot ni roha)
c. Manguluhon jala mandata huhut maniroi angka ruas di wilayah na be
d. Mambahen partangiangan, arisan manang ulaon na asing huhut membentuk struktur organisasi na metmet isara Sekretaris / Bendahara di wilayah na be na so pola martontangan tu Anggaran Dasar/Anggaran Rumah Tangga ni Punguan
e. Manjalo barita na masa sian ruas, paboahon tu sude ruas di wilayah na be, molo adong na masa isara ulaon las niroha, manang ulaon habot ni roha
f. Gabe penghubung tu pangurus Punguan disude angka barita na masa di wilayah na be dohot sebaliknya sian pangurus Punguan tu angka ruas
g. Manghobasi sarana dohot prasarana molo adong ruas di wilayah i na monding, jala ulaon manise, mangapuli tu keluarga namarsitaonon diparade ruas na adong di wilayah i ma songon angka biaya na hombar tu si, dilaporhon ma tu Bendahara ni Punguan
h. Manjalo iuran sian angka ruas jala dipasahat ma i tu Bendahara ni Punguan.

Sekretaris :
a. Mangurupi Ketua Umum dohot Ketua Wilayah molo marhalangan, jala manghobasi sude tu na hombar tu fungsi dohot misi ni Punguan
b. Mangulahon angka ulaon na tarsurat di Bindu III Pasal 8 ayat 13 (b s/d h) Anggaran Rumah Tangga Punguan


14. Ketua Bidang Naposobulung :

Dewan Naposobulung :
a. Mangurupi Ketua Umum mangulahon na hombar tu fungsi, misi dohot visi ni Punguan
b. Mangulahon jala maniroi, mambahen gagasan dohot pamingkirion tu angka Naposobulung ni Punguan, untuk perkembangan ni Naposobulung khususna di wilayah Jabodetabek.
c. Mamingkirhon, mandata jala membentuk Naposobulung ditonga-tonga ni Punguan laho tu hamajuan ni Naposobulung ni Punguan
d. Mangurupi jala mengerahkan angka Naposobulung ni Punguan molo adong ulaon/namasa ditonga-tonga ni Punguan tarlumobi mai mangurupi Ketua Wilayah di wilayahna be.
e. Angka ulaon na pisasahat tu Dewan Naposobulung diurupi Ketua Wilayah dohot Sekretaris/Wakil Sekretaris, Bendahara/Wakil Bendahara ni Punguan.

Ketua Naposobulung :
a. Naposobulung ni Punguan ima naposo nagok ni ruas ni Punguan Pomparan Raja Sipahutar dohot Boruna Jabodetabek
b. Ketua Umum ni Naposobulung ima na pinillit ni pangurus sian tonga-tonga ni Naposobulung ni Punguan, na laho membentuk, manguluhon, mandata jala mangurus ulaon ni angka Naposobulung ni Punguan
c. Mangurupi jala mewakili Dewan Naposobulung molo marhalangan
d. Mangalehon gagasan dohot pamingkirion tu Ketua Umum/Dewan Naposobulung laho pamajuhon ruas ni Naposobulung
e. Mangurupi ulaon ni pangurus manang ulaon ni Ketua Wilayah di tingki na hombar tu haporluanna
f. Angka ulaon na pinasahat tu Ketua Umum ni Naposobulung diurupi Dewan Naposobulung, Ketua Wilayah, Sekretaris/Wakil Sekretaris dohot Bendahara/Wakil Bendahara ni Punguan mai.

Pasal 9
a. Boi do maradi/mantak anggota ni pangurus molo adong alasan na tingkos manang togu jala ditolopi ⅔ (dua partolu) sian pangurus ni Punguan
b. Pangganti ni pangurus na maradi i, dipillit ma sian ruas ditingki rapot harian ni pangurus.

Pasal 10
a. Diujung ni tingki hapanguruson, pangurus Punguan na niwakilan ni Ketua Umum mangalehon partanggungjawaban, mangonai parngoluon dohot angka ulaon naung didalanhon ni pangurus dohot lan na asing na mardomu tu Punguan
b. Partanggungjawaban ni pangurus on dipasahat ma ditingki rapot bolon ima rapot hadomuan ni sude ruas ni Punguan.

Pasal 11
Sude ruas nagok boi do dipillit gabe pangurus ni Punguan molo dung digonopi angka parsyaratan na talup tusi, ima :
a. Ketua Umum, Wakil Ketua Umum, Ketua Bidang Adat, sipilliton ima sian na marga Sipahutar naung gabe ruas nagok
b. Pangurus na asing (asing ni Ketua Umum, Wakil Ketua Umum, Ketua Bidang Adat) boi do dipillit sian horong ni boru
c. Marsahala hapartogion, marholong ni roha tu marga Sipahutar, olo markorban, tulus, ikhlas jala burju mangulahon angka tugas dohot kewajibanna, denggan marpangalaho dohot marpangkuling huhut ndang martihas diparngoluon siapari
d. Mangantusi paradaton dohot parugamaon.


BINDU IV
R A P O T

Pasal 12
a. Asing ni rapot bolon dohot rapot bona taon, sude rapot ingkon didohoti naummotikna ⅓ (sapartolu) sian angka na niontang marrapot, ipe asa pajadion parrapoton.
b. Tingki dohot inganan ni parrapoton ditontuhon pangurus ni Punguan mai.


BINDU V
ATURAN NA ASING

Pasal 13
Ruhut-ruhut ni parngoluon na so diatur dope dibagasan Anggaran Rumah Tangga on, diatur mai muse dohot hatorangan na niharuarhon ni pangurus, asal ma ndang maralo tu isi dohot lapatan ni Ruhut Bolon/Anggaran Dasar dohot Anggaran Rumah Tangga ni Punguan, sude hatontuan na hinaruarhon ni pangurus dipartanggungjawabhon mai di rapot bolon.



Jakarta, 24 Nopember 2007

PUNGUAN POMPARAN RAJA SIPAHUTAR DOHOT BORUNA JABODETABEK

Ketua Umum Sekretaris Umum


Mangaraja Sipahutar Rikson Sipahutar SE

Paniroi / Penasehat
1. Letkol TNI AD (Purn) Daulat H Sipahutar ( ttd )
2. Maju (Op. Cristofel) Sipahutar ( ttd )
3. St Drs Manahan Sipahutar ( ttd )
4. Drs P Pangondian Sipahutar ( ttd )
5. St Rayberth Sipahutar SE ( ttd )
























Pembagian Wilayah

Wilayah Sektor Ketwil: Drs Lamkuat Sipahutar
I Jakarta Timur I
Jakarta Timur II
Jakarta Utara

II Jakarta Timur III
Jakarta Timur IV
TMII/Pdk. Gede
Jl Alternatif Cibubur

III Jakarta Selatan dan
sekitarnya

IV Jakarta Barat Ketwil: Leonard Sipahutar
Ciledug
Tangerang

V Depok sekitarnya Ketwil: Budi Sipahutar SH
Bogor sekitarnya

VI Bekasi Barat & Utara Ketwil: Edward Sipahutar
Bekasi Timur I & II
Cikarang










Pembagian Wilayah

No. Wilayah/Sektor Ketua Wilayah / Sektor
1. Wilayah : I Ketwil: Drs Lamkuat Sipahutar
Jakarta Utara
Jakarta Timur I
Jakarta Timur II

2. Wilayah : II Ketwil: Leonardo Sipahutar
Jakarta Timur III
Jakarta Timur IV
Pondok Gede


3. Wilayah : III Ketwil: Uluan Sipahutar
Jakarta Selatan I
Jakarta Selatan II
Ciledug

4. Wilayah : IV Ketwil: Rovelen Sipahutar
Jakarta Barat I
Jakarta Barat II
Tangerang

5. Wilayah : V Ketwil: Edward Sipahutar
Bekasi Barat
Bekasi Utara
Bekasi Timur I
Bekasi Timur II

6. Wilayah : VI Ketwil: Budi Sipahutar SH
Depok
Bogor

SISTEM KOMUNIKASI SIPAHUTAR

ASA RENTA SIULAON
(SISTEM KOMUNIKASI NI PUNGUAN)


A. MOLO DITINGKI MASA HABOT NI ROHA

Dipardalanan ni ngolunta siganup ari, tagamon do masa arsak/habot ni roha bolusonta jala masa do i sian na so panagaman dohot naso dihirim rohanta be. Ala ni i songon jolma na tinompa ni Debata hita ingkon rade/siap do hita sude baik sebagai pribadi, keluarga suang songoni nang marhite Punguan.

Renta ni sude ulaon boi do dapot i, marhite haradeon ni roha dohot pambahenan na denggan sian ganup ruas ni Punguan dohot sian angka pengurus. Tung mansai uli pangkilalaan molo di sude angka siulaon i marture dibagasan harentaon.
Dibahen i asa dapot harentaon jumpa masa arsak/habot ni roha, tauji ma mambahen sada alur/sistem komunikasi ni Punguan Pomparan Raja Sipahutar dohot Boruna se-Jabotabek, songononma :

1. Molo adong na masa disada-sada keluarga, sai parjolo ma dipaboa suhut tu Punguan, ima marhite Ketua/Koordinator di wilayah i, suang songon i tu manang na piga donganna/ruas di wilayah i asa marhite i boi sambung-menyambung informasi/barita i tu angka dongan.
2. Ditorushon Ketua wilayah i ma muse barita ondeng tu pangurus ima marhite Sekretaris Umum, Ketua Bidang Sosial dohot Kesra manang tu Ketua Umum.
3. Dung dijalo pangurus barita i, ditorushon ma muse tu sude Ketua Bidang, Ketua Wilayah, Paniroi tarlobi tu Ketua Bidang Adat dohot Kerohanian asa adong koordinasi jala paradehon angka na porlu tu na masa i. Ganup Ketua Wilayah manorushon barita i tu sude ruas di wilayahna be.
4. Songon na tarsurat di Anggaran Rumah Tangga Punguan, molo adong na masa di sada wilayah, gabe Ketua Wilayah i ma na mangulahon jala parentahon siulaon, sibahenon dohot lan na asing. Molo tung adong na hurang lobi dipaboa ma i tu pangurus asa dibahen pangurus haputusan laho patotahon ulaon/na masa i.

5. Tung pe dibahen jalur komunikasi songon angka na diginjang i, ndang na gabe membatasi/mangambati sude ruas ni Punguan laho patolhashon barita/informasi na tongon masa ditonga-tonga ni Punguan tu angka dongan.
6. Angka siulaon ni Punguan na hombar tu ulaon sosial (songon na tarsurat di Ruhut Bolon/ART Bindu I pasal 2.c; pasal 3.a, b c) boi ma diulahon Ketua wilayah i paima sahat pangurus ni Punguan.

7. Suang songoni do nang na marhadomuan tu ulaon adat, boi do tongtong Ketua wilayah i mewakili pangurus hombar tu angka situasi dohot angka kondisina be.
8. Songon i ma muse dinapatupahon ulaon/acara manise/marhata togar-togar (Ruhut Bolon/ART Bindu I pasal 3.d, e, f) Ketua wilayah ma mangatur partingkianna rap dohot angka ruas di wilayah i, laos dipabotohon ma rencana i tu pangurus Punguan. Ia biaya tu acara on nungnga diatur di Ruhut Bolon/ART Bindu I pasal 3.d, e.
Niuji pe mambahen alur/sistem komunikasi/informasi songon angka na diginjang i songon sada dalan padasiphon ulaonta do i diganup panghobasion ditonga-tonga ni Punguan. Alai na lobi lehet jala uli dope i molo sude ruas ni Punguan, Ketua wilayah rap dohot pangurus ni Punguan satahi saoloan laho mangulahon dohot padengganhon na hombar ditonga-tonga ni Punguan.

B. ULAON LAS NI ROHA (PANGOLIHON ANAK/ PAMULI BORU)
Somal do tabege hata mandok: Molo dung magodang anak pangolihononton, molo dung magodang boru pahutaon/pamulion.
Dibahen i ia molo dung adong rencana ni sada-sada keluarga naeng patupahon ulaon pangolihon anak manang naeng pamulihon boru, ingkon sai jumolo ma pasahaton (tariashononton) i tu sude dongan sahorong ni hasuhuton (haha anggi dohot angka boru). Jouon ma marpungu tu bagas sude dongan sahorong ni suhut, jala diparpunguan i dihatahon (ditariashon) suhut i ma nanaeng adong siulaon di tingki najonok. Laos parpunguan i ma mangondolhon na sada hasuhuton nasida disi.
Dung i muse berlanjut ma angka siulaon martangga-tangga songon balatuk ni ruma, ima:
1. Marhori dinding :
Ia namarhori dinding on (somal didok mangarangrangi) pasahaton/utuson ma haha-anggi dohot sian boru (2-3 halak). Jala bekalan ma nasida diangka maksud/rencana-rencana ni hasuhuton.
2. Patua hata dohot Marhusip :
Ia tu ulaon patua hata dohot marhusip, togihon/gokhononma ima: horong ni suhut, utusan marsasaompu (somal didok marsuhusuhu [1-2 halak]); utusan ni boru/bere; utusan ni dongan sahuta. Molo dung selesai satahap ulaon i (Patua hata) diuduti ma muse tu Parhusipon, ima songon mangarisihi na gabe haputusan ni na dua hasuhuton songon ojahan di ulaon na naeng ro, ima :
- Partording ni ulaon
- Godang ni sinamot/panandaion
- Hembang ni ulaon/undangan
- Angka ulos herbang
- Parjambaran hombar tu luat ni na dua hasuhuton
- Partingkian, martumpol, marsibuha-buhai, pesta unjuk dohot inganan
- dna.

3. Martumpol dohot Martonggo raja/Ria raja :
Ia tu namartumpol di gereja, gokhononma: sude horong ni suhut, dongan tubu, utusan ni boru/bere, dongan sahuta, hula-hula nang dohot angka pariban suang songoni dohot ale-ale.
Ia tu namartonggo/ria raja ima: horong hasuhuton, sude Ketua wilayah, 1-2 halak utusan marsasaompu (laos boi do diwakili Ketua wilayah molo tepat sian pomparan sian marsaompu), angka utusan ni boru/bere, utusan ni dongan sahuta.
Mansai porlu situtu do kehadiran ni unsur-unsur i ditingki martonggo/marria raja i, ai disima hataan sude na pokok-pokok tu ulaon nanaeng ro hombar tu angka pardalan ni adat batak.
Ditingki namartonggo/ria raja, saboi-boina nungnga radeon ni hasuhuton angka undangan sipadalanon/sipasahaton nanaeng sigokhonon (goar dohot alamat nungnga lengkap diisi).
Pardalan ni undangan tu sude ruas ni Punguan, boi do marhite ketua-ketua wilayah, boi do marsasaompu, laos langsung pe hasuhuton pasahathon na denggan do i, manang di tongos marhite kantor pos.
4. Pesta Unjuk
Pamuhai ni ulaon (sibuha-buhai di bagas ni parboru) :
Pelaksanaan ni sibuha-buhai nunga tangkas hian dihatai dohot disepakati ima ditingki parhusipon dohot ditingki martonggo/ria raja.

Pamasu-masuon di Gareja :
Diudurhon suhut na duabola pihakma pengantin tu gareja rap dohot angka sisolhot nang dohot angka na niundang.

Pesta Unjuk (Ulaon di Gedung) :
Taringot diangka siulaon dohot na mangulahon di mata ni ulaon on, tangkas do i sude dihatai/diatur ditingki namartonggo/ria raja asa tinggal mangulahon nama i di mata ni unjuk bolon i, ingkon tangkas do gokhonon tu ulaon unjuk on, ima :
Horong suhut Bona ni ari
Dongan tubu Bona Tulang (tulang – II)
Boru/bere Tulang rorobot
Dongan sahuta Tulang
Dongan sapunguan Hula-hula
Pariban Hula-hula sian namartinodohon
Ale-ale Hula-hula sian anak manjae.

Paulak Une dohot Tingkir Tangga :
Sasintongna ianggo adat (ulaon) Paulak une dohot Tingkir tangga molo adat di bona pasogit manang pinungka ni sijolo-jolo tubu, dung pe salpu ualon i marpiga-piga ari, dung i ro ma pengantin tu huta ni parboru huhut mamboan sipanganon. Suang songoni ma muse di ari na lehet ro ma parboru tu huta ni boruna/helana i laho mangebati (didok maningkir tangga) jabu ni boruna/helana i.
Asa molo ndang dipatupa nasida ulaon i, gabe sada pangambat do i diangka hubungan komunikasi nang songon i dohot angka pangebation ndang boi ulahonon nasida saleleng so dipatupa ulaon i.
Borhat sian permasalahan/situasi na songon i ma umbahen ditingki naparpudion lumobi di huta parserahan on ala ni angka partingkian diulaon siganup ari gabe adong istilah ULAON SADARI, na marlapatan asa laos dibagasan ulaon sisadari i ma dipatupa ulaon Paulak Une dohot Tingkir Tangga nangpe pelaksanaanna holan simbolis.
Marhite istilah Ulaon Sadari on ndang be mangambati langka nasida be laho mambahen komunikasi songoni dohot angka pangebation.




JAMBAR HATA

Molo tapaihut-ihut huhut taparrohahon do disude pardalan ni acara adat disiganup ulaon habatakon (marhata sinamot, marunjuk, mangadathon/mangadati, mamestahon tambak ni ompu dohot lan na asing dope), boi dohonon ia ulaon i ndang haruar sian namanghatai hombar tu ruhut-ruhut ni paradaton di halak batak. Asa sian panghataion i do boi botoon ni na ro dohot situan natorop aha do sintuhu ni siulaon i.

Ia manghatai diulaon adat ndang dos i dohot na manghatai di tongan dalan, dipartungkoan manang songon panghataion di pasaran. Alai tung namarsintuhu do anggo panghataion di angka ulaon paradaton. Dibahen i ingkon somal-somalan do mangihuthon angka panghataion di ulaon adat ai ido sada guru na ummarga di dirinta be asa boi hita manghatai/mangulahon adat i di angka tingkina.

Ndang adong bidang studi manang sekolah na khusus laho inganan marsiajar taringot tu uloan paradaton i, alai songon halak batak hita (tarlumobi tu angka dongan ama) napatut do ingkon botoonta songon dia ruhut-ruhut ni paradaton i dohot pardalan ni adat i hombar tu sintuhu ni ulaon i.

Nuaeng tauji ma jolo mangantusi ruhut-ruhut ni panghataion :

1. Nadenggan do molo pintor ditontuhon jala dipaboa hian ise parhata, asa adong tingkina parade sihatahononna, ai marguru tu haradeon do na gumodang manontuhon hadengganon ni panghataion. Asa parjambaran do manghatai, sian dos ni roha.

2. Ganup na mandok hata, naeng ma soarana torang jala lambok, boi dibege sude natorop i.

3. Naeng ma rumang ni panghataion i dibagasan tulus ni roha, kewajaran, dohot suasana kekeluargaan. Uang ma adong dipanghataion i unsur-unsur negatif, songon hakarason, muruk, mangkritik, humor na melukai dohot pametmethon sasahalak dohot nasuman tusi.

4. Diangka na mandok hata unang ma adong panghatai na panganjanghu, na mamangke tingki na palobihu, asa unang ma adong hata na mulak-mulak, rarat jala manimbil.

5. Molo adong pandohan ni sasahalak na so tingkos, dipatingkos ma i dohot manat huhut dibagasan halambohon dohot kebijaksanaan.

6. Molo mamangke umpama dohot umpasa ditingki mandok hata, ingkon denggan do umpama i didok songon aslina unang diparhaneang. Jala ditingki manghatahon umpasa i dumenggan ma i didok/dihatahon dibagasan unsur par-Tuhan-on na marlapatan sada pangidoan do i.
Dibahen i molo naeng mandok umpasa sai jumolo do didok: “Sai dilehon Tuhanta pardenggan basa i ma di hamu songon na didok ni umpasaon”.

























“SOPIAK LANGIT RAJA SIPAHUTAR”
IMA SISUAN BULU DI HUTA SIPAHUTAR


A. ANAK NI DATU DALU

Baliga ma binaligahon, barita ma na binaritahon. Ia barita ni Ompunta Raja Sipahutar songonon ma baritana dohot turi-turianna.

“SIPAHUTAR” ima goar ni ompu i, dohot gelarna “SOPIAK LANGIT”, na gabe songon gelar turut do gelar ni ompunta on, ala “mata sopiak” do ibana. Huta hatubuan ni Ompunta Raja Sipahutar ima sada huta dipinggiran ni Tao Toba sekitar huta Porsea. Torop do nasida marhahamaranggi anak ni Ompu Datu Dalu, ima: Pasaribu (Habeahan, Bondar, Gorat), Batubara, Sipahutar, Matondang, Tarihoran, Harahap, Gurning, Saruksuk, Parapat dohot Tanjung.

Sian sihamet-metonna sahat ro di naung magodang, marguru hadatuon do Ompunta on, ai tarbarita do ibana sada datu bolon na memiliki kesaktian, ala ni i boi dohonon tung gabe dihabiari halak do ibana dihatina i. Jala ala ni hagogoon ni hadatuon na on do muse ibana marsitandaan dohot paribanna “Giring Panaitan Boru Hasibuan”. Laos dipudian ni ari mangalap boru ma ibana ima Giring Panaitan boru ni tulangna “Hasibuan Daturara” sian huta Janjimatogu Porsea.

Tolu (3) ma anak ni Sopiak Langit Raja Sipahutar dohot boru Hasibuan, ima :
1. Hutabalian (siangkangan)
2. Namora Sohataon (paitonga)
3. Daulae (paitoluhon)

Alai ianggo na mamboanhon marga Sipahutar (na gabe marga ni Sipahutar sahat tu tingkion) sian anakna natolu on holan Namora Sohataon (anak paitonga) do. Jala Daulae (anak paitoluhon) ima gabe mamboanhon marga Daulae. Molo Hutabalian (siangkangan) ndang marpinompar on, ala diuhum amangna do ibana diombus dipahabang sahat tu dolok Simanuk-manuk, ala ni parangena na so ture.


B. MAMUNGKA HUTA SIPAHUTAR

Dung dipudian ni ari muse, manolsoli do Sopiak Langit na manguhum anakna si Hutabalian i. “Tung boasa ma ingkon ombusonku anakhi gabe sisoada”, ninna dibagasan rohana. Sai jot-jot ma ibana marsak maamingkiri i, jala laos alani i ma muse bonsir na bungkas sian Porsea tu luat sihadaoan laho mangalupahon angka arsak ni rohana i. Di na borhat Sopiak Langit sian Uluan Porsea, tinggal do ianggo Ompunta boru Hasibuan di Janjimatogu, holan anakna na dua i do diboan ibana. Di na mardalan nasida natolu, dituhukma di abarana ima si Daulae, huhut ditogu disiamunna ima si Namora Sohataon, dijururi (didalani) nasida ma dalanna na so diboto dope manang na tu huta/luat dia do tujuan nasida pola marpiga-piga ari. Dung i tolhas ma nasida di sada inganan na so adong dope jolma maringanan disi jala ndang diboto dope aha goar ni inganan i. Dipanjongjong ma pansa-pansana (inganan panatapan), mangula ma ibana di inganan i huhut pagodang-godang ianakhonna na dua i. Dung maringanan/marhuta Sopiak Langit Raja Sipahutar dohot anakna na dua i disi, laos on ma muse na gabe margoar “Huta Sipahutar” (nuaeng ima Kecamatan Sipahutar), ala Raja Sipahutar gelar Sopiak Langit do sisuan bulu/na mamungka huta i.

Dung magodang ianakhonna na dua i, laho do mardalan tu na dao (mangaranto) si Daulae dompak Sipirok/Angkola sahat tu Mandailing (nuaeng Tapanuli Selatan/Mandailing Natal), jala laos sian luat on ma muse marherbang/mangarerak marga Daulae sahat ro di tingkion. Alai ianggo Namora Sohataon, hot do ibana dihuta i mamboanhon marga/goar ni amana Sipahutar. Mangalap boru ma ibana, jala 2 (dua) ma anakhonna, ima na manggoarhon :

1. Namora Tangguon (siangkangan)
2. Paung Bosar (sianggian)

Mansai godang turi-turian di pardalanan ni ngolu ni Ompunta Sopiak Langit saleleng di Sipahutar. Adong do na manggombarhon hagogoonna na so tartandingi, na marnampuna ilmu kebal, gabe dihabiari halak ma ibana. Adong do muse na mandok Datu Bolon, na boi mangubati ragam ni sahit, suang songon i do muse diangka ulaon na denggan godang do dipatuduhon ompunta Sopiak Langit on. Alai dibalik ni i, godang muse do haurahon dohot angka parange sipinsangon na diulahon Ompunta on di tingki ni ngoluna, rupani boi do ninna ripe ni halak bahenonna gabe ripena molo dipangke ilmu na binoto na i.

Di Sipahutar (Kecamatan Sipahutar nuaeng) do marujung ngolu Sopiak Langit secara alamiah (ala suda gogo/nunga matua). Dipudi niari (taon 1971) di inganan hamatean ni Ompunta Sopiak Langit on do muse dipature/dipatimbul pomparanna “Tambak Napir/Natimbo” laos dipasada ma disi saring-saring ni Ompunta Boru Hasibuan, dialap/nadiongkal sian Jantimatogu Porsea, ala di Jantimatogu do marujung ngolu najolo Ompunta Boru Hasibuan.

C. MARSERAK MA POMPARAN NI RAJA SIPAHUTAR TU DESA NAUALU
Dijolo nunga dipatorang, 2 (dua) ma anakhon ni Ompu Namora Sohataon ima pahompu ni Sopiak Langit na margoar Ompu Namora Tangguon dohot Ompu Paung Bosar. Dipardalanan ningoluna dung magodang Ompunta na dua on ditinggalhon pomparanna do huta Sipahutar, laho do mandiori angka inganan na soding tu angka luat na asing. Ditinggalhon do arta na pinungka ni Ompungna dohot Amangna di huta i, dipalumehonma i tu boruna marga Silitonga, asa sian i ma muse ndang adong be marga Sipahutar na tading di huta Sipahutar i, gabe marharajaonma disi marga Silitonga sahat tu nuaeng.

5 (lima) halak ma ianakhon ni Ompu Namora Tangguon, jala angka pomparanna marhutabe ma i, ima :
1. Ompu Mandalo : pomparanna marhuta di Lobusingkam Sipoholon, Tarutung dohot di Garoga.
2. Ompu Sahata : pomparanna marhuta di Lobusingkam Sipoholon, Pagarbatu, Parsingkaman / Banuaji.
3. Ompu Rido : pomparanna marhuta di Parsoburan, Garoga dohot di Labuhan Batu.
4. Ompu Partuhoran : pomparanna marhuta di Tarutung (bungkas muse tu Siborong-borong dohot tu Tapanuli Tengah)
5. Ompu R. Silaing : pomparanna marhuta di Pagarbatu, Adiankoting, Pinangsori dohot di Pahae.

Molo pomparan ni Ompu Paung Bosar, ima na 4 (opat) i :
1. Ompu Bela
2. Ompu Porhas Sohaunangan
3. Ompu Jokkas Ulubalang
4. Ompu Namora Sojuangon

Ia angka parhutaan ni pomparan ni Ompunta na opat on ima di Tarutung, Parsingkaman, Silangkitang, Sipan/Sihaporas (Sibolga), Pinangsori, Batangtoru dohot tu angka huta na asingna i dope.

Angka i ma sabagian parhutaan ni pomparan ni Raja Sipahutar na dapot disurathon dison jala na gabe angka Bona Pasogit di pomparan ni Raja Sipahutar na diparseharan (secara khusus na di Jakarta nahumaliangna) laos molo adong angka huta na so tarsurat disi ndang pola na marsangajo panurat disi.

Sian goar-goar ni Ompu na diginjang i: 5 (lima) anakhon ni Ompu Namora Tangguon dohot 4 (opat) anakhon ni Ompu Paung Bosar, gabe ima diihuthon ssongon panjauon marompu-ompu dipomparan ni Raja Sipahutar dipadarlanan ni paradaton na mardongantubu diganup angka luaat, khususna di Jakarta nahumaliangna. Laos pinompar ni Ompu na 9 (sia) on ma mambahen bunga-bunga paherbang angka bilangan ni marga Sipahutar diliat portibi on.



MARBILANG URUR DO POMPARAN NI
RAJA SIPAHUTAR
PATUPAHON PESTA HORJA PARSAHATAAN
TAON 1957

Sahat tu andorang so taon 1957 (Pesta Horja Parsahataan), tardok na so adong dope sada patohan na baku di marga Sipahutar taringot tu ruhut-ruhut ni partuturon (tarombo). Sipahutar sian huta na sada dohot Sipahutar sian luat na asing, ndang marsibotoan manang ise do siangkangan jala manang ise na gabe sianggian. Tardok sahat ro dihatiha i ndang hattus (simpang siur) dope partaromboon ni marga Sipahutar, ala ndang hea dope dirapothon angka pengetua-pengetua na parjolo taringot tu tarombo i.

Suang songon i do muse taringot tu hamajuon di marga Sipahutar, tardok hatinggalan do sian angka marga na asing sahat ro dihatiha i, suang songoni di angka parbinotoan/parsingkolaan (sumber daya manusia), hapangkaton, manang dihamoraon pe, mansai jarang do begeon sian tonga-tonga ni marga Sipahutar. Alai taongkui do mansai maol do parsingkolaan sahat ro dihatiha i, ima ala kondisi ni negaranta na baru malua (merdeka) dope sian gomgoman ni panjajah.

Mamereng dohot mangarimangi jala manghilalahon diparsorion / keadaan na songon i dipardalanan ni ngolu ni marga Sipahutar, marbilang urur jala tubu ma sungkun-sungkun diroha ni manang piga-piga natua-tua ni marga Sipahutar dihatiha i: “aha do alana dohot na manginsombut gabe songon on marga Sipahutar on, ndang adong dope sipatujoloon (?)”. Hinorhon ni sungkun-sungkun on, gabe tubu ma pamingkirion dohot pandapot mandok: “atik natung bohado ala ni naso dipardulihon marga Sipahutar do Ompuna sijolo-jolo tubu (?)”, gabe manginona/manginsombut tu angka pinomparna. Topet sahat ro dihatiha i, ndang adong dope na torang umbotosa manang na didia do marujung ngolu Ompunta Raja Sipahutar dohot didia do hinamborna.

Borhat sian permasalahan on ma muse na mangonjar angka pengetua ni marga Sipahutar dihatiha i, mambahen sada parrapoton laho manangkasi riwayat ni pardalanan ni marga Sipahutar. Laos tubu ma songon sada parbue sian parrapoton i ima patupahon “Pesta Horja Parsahataan” ni marga Sipahutar maringanan di Lumban Sipahutar, Pagarbatu, Tapanuli Utara taon 1957. Hira sude do utusan ni marga Sipahutar sian huta/luat desa naualu nang sian marompu-ompu pola marratus halak ro mandohoti / mangadopi pesta gondang sitolu ari-tolu borngin i. Ditingki pesta on ma muse dipahantus dohot dipatota ruhut-ruhut ni partuturon di marga Sipahutar na gabe pedoman dihita sahat ro di tingki on.

Dung i muse dibahen ma sada Team Panitia laho mangalului huhut manangkasi didia do inganan ni Ompunta Sopiak Langit dohot Ompunta Boru Hasibuan.



DAPOT NA NILULUAN JUMPANG NA JINALAHAN
PATUPAHON PESTA TAMBAK TAON 1971

Songon na pinatorang ni Amanta Mayor TNI (Purn) Basahoras Sipahutar (+) [nara sumber], sada sian Team Panitia penelusuran ni inganan hinambor ni Ompunta Raja Sipahutar, tangkas ma dapot di huta Sipahutar do marujung ngolu Ompunta Sopiak Langit. Marsada roha ma angka pengetua ni marga Sipahutar, laos dipature/dipatimbul ma diatas ni hinamborna i “Tambak napir/na timbo” ukuran 13 x 17 meter, ima di taon 1971. Disima dipatimbul Ompunta Sopiak Langit Raja Sipahutar rap dohot saring-saring ni Ompunta Giring Panaitan Boru Hasibuan dung dialap/diongkal saring-saring i sian huta Jantimatogu Porsea, huta ni hula-hula Hasibuan.

Marpesta bolon (pesta horja) do marga Sipahutar ima peresmian ni tambak ni Ompunta, lelengna 7 (pitu) ari dohot 7 (pitu) borngin di Silangkitang Desa Sipahutar, Tapanuli Utara (± 10 km sian Tarutung mardompakhon Siborong-borong). Hira sude do ro pomparan ni Raja Sipahutar sian angka luat/desa naualu na di parserahan ro tu pesta bolon i, songon i do nang dohot Hula-hula Hasibuan nang dohot angka pariban (Namarbaju) dohot do ro mangadopi pesta bolon i.

Dipangujung ni Pesta Tambak on, dipatupa panitia do muse sada ulaon na monumental na gabe songon tonggak sejarah, ima peletakan batu pertama Pembangunan Tugu Sopiak Langit Raja Sipahutar ima di Silangkitang Tapanuli Utara, jonok tu jalan raya lintas Tarutung – Siborong-borong parsintongaan ni KM 10-11. Pamingkirion umbahen di Silangkitang pe dipajongjong Tugu on, ala huta Silangkitang on ima huta ni marga Sipahutar, posisina pe strategis (mansai denggan) ala dalan pamoluson lintas Sumatera.

A. JUMPANG MA ANGKA SILAS NI ROHA

Ndang apala tangkas boi dohonon, na ala dung pesta parsahataan di taon 1957, huhut naung direncanahon manangkasi hinambor (kuburan) ni Sopiak Langit, gabe manumpak sahala ni Ompunta sijolo-jolo tubu diangka pomparanna. Alai napasti, tangkas do hataridaan dung pesta saparhataan taon 1957 i, ai dung marpiga-piga taonna muse tarida ma sada gombaran na patuduhon perkembangan ni marga Sipahutar, songon contohna tampil ma dihatiha i sada ianakhon ni marga Sipahutar ima Amanta Ir Marulam Sipahutar na gabe Kepala Dinas PU (Pekerjaan Umum) Propinsi Sumatera Utara di Medan.

Mangihut tusi muse godang ma tarbege angka marga Sipahutar naung maju, adong ma i na gabe pengusaha isarana angka kontraktor dohot lan dope angka na asing na i. Diparsingkolaan pe godang ma ianakhon ni marga Sipahutar na masuk/mangihuthon perguruan tinggi.

Asa boi ma dohonon amanta Ir Marulam Sipahutar (alm) na gabe Kepala Dinas PU Propinsi Sumatera Utara saleleng 2 (dua) periode hatiha i, ima songon motor penggerak ni pembangunan Tambak ni Ompunta Sopiak Langit na di Kecamatan Sipahutar rap dohot angka amanta na asing na i dope. Laos ditingki ni pembangunan on ma diprioritashon ibana pembangunan dalan (jalan) aspal tu Kecamatan Sipahutar huta na pinungka ni Ompunta i. Tung mansai balga situtu do roha ni masyarakat na tading di Kecamatan Sipahutar hatiha i dung dipature dalan i. Hita pe angka pomparan ni Raja Sipahutar ndang maol be ditingki i laho meresmihon Tambak ni Ompunta Sopiak Langit i.

B. PESTA TUGU DI TAON 1988

ADAT MAMONGOTI BAGAS

ADAT MAMONGOTI BAGAS


Mamongoti na marharoroan do i (kata dasar) sian hata “bongot” (bongot = masuk), asa molo di dok mamongoti bagas lapatanna mamasuhi jabu (bagas). Di halak batak adong dua macam adat mamasuhi jabu, ima “manuruk jabu” dohot “mangompoi jabu”. Na dua ulaon i hampir sarupa do adat na, alai molo sian balga ni ulaon umbalga ma ulaon “mangompoi” sian ulaon “manuruk jabu”. Somalna di ulaon mangompoi jabu sigagat duhut ma di buat (di seat) alai molo ulaon manuruk jabu, na marmiak-miak do dibahen tu si.
Didok angka natuatua molo di omppoi do sada bagas, tung na so boi be morot (di gadis) jabu i salelengna ingkon hot ma i di nasida sahat tu pomparanna gabe jabu parsattian.

Di tano parserahan on (isarana di Jabodetabek) ndang pola hea be didok mangompoi manang manuruk jabu molo adong ulaon mamasuhi jabu, alai didok ma dohot hata na uli begeon “mamongoti bagas”. Ai na mandok mauliate do suhut i tu Debata ala nunga bolas boi di pature bagas nasida i uli jala denggan berengon, huhut mangido tangiang asa tongtong marhahipason nasida mangingani bagas na pinauli na i. Partording manang rumang ni ulaon i pe ndang pola songon bidang ni ulaon mangompoi manang manuruk jabu. Di gokhon suhut ma sian horong dalihan natolu i, ima horong ni dongan tubu, dongan sahuta, boru, hulahula, tulang dohot pariban. Ulaon i pe di pungka ma di parnakkok ni mata ni ari (+ pkl.10.00) asa nangkok panggabean dohot parhorasan tu joloan ni ari.

Uduran ni hulahula dohot tulang mamboan boras si pir ni tondi huhut mamboan dengke na mokmok pasahatonna tu suhut i huhut mamboan ulos. Dongan tubu, dongan sahuta dohot boru tumpak ma pasahaton na tu suhut i.

Ditingki manghatai, dongan sahuta ma manungkun sintuhu ni ulaon, jala paidua ni suhut ma na mangalusi. Alai gabe jot-jotan do hulahula gabe panungkun di sintuhu ni ulaon (gabe hira panghataion di ulaon unjuk), nda sala do i ?, asa molo pe ndang sian dongan sahuta songon panungkun tumingkos ma antong molo sian dongan tubu na manungkun sintuhu ni ulaon i, ido natingkos.

Partording ni ulaon mamongoti bagas,

1. Manjalo angka tutur na ginokhon,

Sude tutur na ginokhon ni suhut (uduran ni hulahula dohot uduran ni tulang) molo dung sahat nasida ndang manigor masuk i tu bagasan jabu, jolo himpu ma jolo nasida di alaman paima ro jou-jou sian hasuhuton. Alai anggo dongan tubu, dongan sahuta dohot boru boi ma nasida langsung tu hundulan na pinarade ni suhut i.
Asa dung dapot tingkina laos nunga sahat be sude angka na ginokhon ni suhut lumobi ma uduran ni hulahula dohot uduran ni tulang, mamungka hata ma paidua ni suhut :
Santabi ma di hamu na huparsangapi hami raja ni dongan sahuta, raja ni dongan tubu, raja ni boru, lumobi ma di raja i hulahula nami suang songon i dohot tulang nami, on ma tingki dohot ombas na naeng pungka on ta ma ulaon on, nuaeng pe dihamu hulahula nami suang songon i dohot tulang nami, bongot ma hamu raja nami nunga rade hami manjalo haroro ni rajai dohot angka nantulang nami.
Di tingki manjalo hulahula dohot tulang, andorang so hundul dope nasida jolo di jomput ma boras napir tu simanjujung ni suhut i dohot tu sude iananghonna (didok ma hatana : horas jala pir ma tondim hela dohot ho inang borungku dohot angka pahompungku mangingani si baganding tuamon di dongani asi dohot holong nasian Amanta Debata) laos di pirpirhon dompak ginjang tolu hali huhut didok : horas, horas, horas. Dung i hundul ma muse na sida.

2. Pasahat tudutudu ni sipanganon dohot dengke,

Hata sian paidua ni suhut,
Mauliate ma hudok hami tu Debata marhahipason do hamu sude na huparsangapi hami dohot inanta soripada bolas sahat tu inganan on. Nuaeng pe naeng pungka on ta ma ulaon on, pangidoan nami di hamu hulahula nami dohot tulang nami mangarade ma hamu asa ro hami pasahat tudutudu ni sipanganon tu adopan muna.

Hata sian hulahula,
Mauliate ma raja ni boru, asa nuaeng pe di hita horong ni hulahula lumobi ma di hamu haha parhundul dos ma rohanta manjalo hata ni pamoruonta didok rohanami dumenggan ma molo haha parhundul na manjalo.

Hata sian Tulang,
Gabe ma jala na horas, laos mauliate ma di hata ni anggi parhundul, ndang tingkos molo tu adopan nami tudutudu ni sipanganon sian pamoruonta, nunga uli rohanami hamu ma namanjalo, boti pe songon i na rap manjalo do hita disi, di jalo anggi parhundul ma.

Hata sian Hulahula,
Mauliate di haha parhundul, ba molo nunga songon i pandok muna nauli ma, ba molo tung pe tu adopan nami ba na rap manjalo ma hita di si. I pe dihamu pamoruon nunga rade hami, Botima !

Suhut pasahat tudutudu ni sipangonon tu adopan ni hulahula.
(didok ma hata na pasahat tudutudu ni sipanganon i)

Dung sahat tudutudu ni sipanganon, hata sian hulahula,
Nuaeng pe di hamu boru nami tong ma mangarade hamu asa hupasahat hami dengke na huboan hami tu hamu.

Paidua ni suhut mangalusi,
Na uli ma raja nami, nunga mangarade hami borumuna, pasahat hamu ma.

Hulahula pasahat dengke. (didok ma hata ni na pasahat dengke i)
Laos udut ma muse di pasahat ulos tu suhut i.

Sidung hulahula pasahat dengke dohot ulos, uduran ni Tulang ma muse pasahat dengke.
(didok ma hata ni na pasahat dengke i)
Laos udut ma muse di pasahat ulos molo adong do diboan nasida.

3. Marsipanganon,

Dung sidung hulahula dohot Tulang pasahat dengke dohot ulos, di uduti ma muse marsipa-nganon. (di pangido ma sahalak martangiang sian horong ni suhut).

4. Dung sidung marsipanganon (marbagi parjambaran),

Hata sian paidua ni suhut,
Santabi godang ma di hita sude amanta raja suang songon i inanta soripada, lumobi ma dihamu raja i hulahula nami dohot tulang nami, ala naung simpul hita marsipanganon, laos hombar tu tingki ta uduti ma ulaonta raja nami.

Hata sian hulahula,
Ima tutu di hamu parboruon, nangkin dipasahat hamu tu adopan nami tudutudu ni sipa-nganon, nuaeng pe raja ni boru asa uli di hamu denggan di sude naginokhon muna, hu pasahat hami ma muse tudutudu ni sipanganon on tu hamu asa boi pasahaton muna tu angka hasahatan na hombar tu adat ta i. Alai tahe mangalap hata hami tu haha ni parhundul, boha di roha muna haha ni parhundul nda denggan do songon i ?

Hata sian Tulang,
Gabe ma jala horas, nunga nauli pandohan ni anggi parhundul i, denggan ma di pature raja ni pamoruon.

Hata sian paidua ni suhut,
Ima tutu raja nami dohot di tulang nami, na uli jala na sintong ma i. Nuaeng pe dihita na mardongan tubu, lumobi di raja ni dongan sahuta, nunga dipasahat hulahula dohot tulang tu hita taringot di tudutudu ni sipanganon, asa tingkos tutu sai jolo diseat hata ma ipe asa diseat raut, mangido ma hami panuturion sian dongantubu, lumobi sian hamu dongan sahuta hombar tu adat na masa di luat on.

Hata sian dongan sahuta,
Mauliate ma amang suhut nami, na tingkos jala nauli do pandohan muna i, asa nuaeng pe taringot na marbagi parjambaran, pos do roha nami siboto adat siboto uhum do hamu, jala angka na hombar di parbagi ni parjambaran nunga tung tangkas i diboto hamu hombar tu bidang ni gokhon muna, bahen hamu ma na uli i. Boti ma !

Hata sian paidua ni suhut,
Antong molo songon i, mauliate ma ! molo dos rohanta di dok roha nami songon on ma parbagi na. (di goari ma parbagi na sada-sada)
- Osang : jambar ni Hulahula
- Namarngingi : jambar ni Tulang
- Soit : jambar ni dongan tubu (di ganupi mar ompu-ompu)
- Soit : jambar ni dongan sahuta
- Soit : jambar ni pariban
- Soit : jambar ni pangalambung i (molo adong ale-ale di si)
- Parsanggulan : jambar ni boru
- Ihur-ihur : di suhut dohot haha anggi na.

5. Dung sidung marbagi jambar ( dipungka ma manghata i ),

Manungkun ma raja ni dongan sahuta ni hasuhuton manang dongan tubu (anggi doli manang haha doli), paidua ni suhut ma mangalusi. (songon hatorangan na di ginjang i).

Panungkun,
Manghatai ma hita suhut nami, “Gokhon si paima on, joujou si alusan ; manggohi dohot mangalusi gokhon dohot joujou muna, sahat iba di tonga ni bagas na marampang na marjual on si gomgom nasa pangisi na, bagas pangantaran ni anak pangantaran ni boru, huhut panjaloan sangap dohot tua lumobi pasupasu sian Debata, dohot hundul dikursi na uli ganti ni amak tiar, ba sai uli dohot tiar ma tutu panggabean dohot parhorasan di hita tujoloan sa on tumpahon ni Amanta Debata, nunga bosur iba huhut mangan indahan na las na pinarade muna, sagat huhut marlompan juhut na marsaudara, sombu uas marhite aek sitiotio” on pe amang suhut nami, songon ni dok ni si jolojolo tubu i, sai jolo ni nangnang do asa ni nungnung, sai jolo pinangan do ipe asa sinungkun. Ba nuaeng pe, amang suhut nami, na manungkun ma hami taringot di hata ni si panganon i, dia ma mata na, dia ma halto na ; asa dia ma hata na, aha ni dok na ; haroan na uli tung tangkas ma di paboa suhut nami, Botima !

Mangalusi,
“Gabe ma hita jala na horas tumpahon ni Amanta Debata. Ba nunga manungkun Hahadoli / Anggidoli dihata dohot lapatan ni sipanganon na sosadia i, sai pamurnas ma i tu pamatangta, saudara tu bohi sipasindak panaili ma i, sipaneang holiholi. Sai ma masumasu ma Tuhanta lam di tambai dihami hagabeon dohot panamotan tu joloan sa on, asa boi dope nian patupa on nami sipanganon na gumodang jala na tumabo. Ia taringot di sungkun muna i, taringot di hata ni sipanganon i dohot haroan na, ba sipanganon panggabean parhorasan do lapatan na”. Boti ma hahadoli / Anggidoli !

Panungkun,
“Mauliate ma, ba molo songon i do hape ba na uli ma i tutu, sai asi ma roha ni Tuhanta pardenggan basa i, sai ditambai dope pasupasu na di hamu tu joloan sa on tamba ni naung adong i. Asa bagot na marhalto na tubu di robean, ba sai horas ma namanganton, sai lam tu ganda na di hamu na mangalean”.
Alai ale amang suhut, sai marangkup do nauli, mardongan do nadenggan. Nuaeng pe tangkas ma hatahon hamu siangkup na songon na hundul, si dongan na songan na mardalan, asa tung torang huboto hami, ba tung tangkas ma dihatahon suhut nami. Boti ma !

Mangalusi,
“Ido tutu amang, toho ma na nidok muna i, sai marangkup do na uli, mardongan do na denggan, jadi nuaeng pe paboaon ma tutu siangkup na songon na hundul sidongan na songon na mardalan. Adong do hata na mandok :
Mardangka bulung bira, Martampuk bulung tabu ;
Sonang ma roha niba, molo nunga tipak iba marjabu.
I ma na manggohi roha ni keluarga dibagas on (suhut ta) na saleleng on jumpang ma na ni luluan dapot na jinalahan na ai bolas do di pauli nasida bagas sibaganding tua on marhite pangurupion na sian Tuhanta, songon hata na mandok :
Tolap do ibana sian Sibuluan, mardalan tu Tampahan ;
Dapotsa do na niluluan, jumpang do na jinalahan.
Asa i ma dalanna umbahen hundul hita nuaeng di tonga ni jabu na pinauli na on, jala nunga di bongoti nasida bagas on. Di poda ni natuatua, adong pe jabu ianggo so na marpahala do jabu i ndang denggan bongotan i, ai adong do sipasingot na mandok :
Labu pe labu i, ndang asal suanhononhon,
Jabu pe jabu i, ndang asal inganhononhon.
Jadi i ma amang, alana umbahen na jinou hamu angka dongantubu, dongan sahuta, hulahula, tulang, boru, dohot iananghon, ro di angka aleale, asa rap hita antong martangiang mangido tu Amanta Debata, asa gabe jabu namarpahala on, jala asa horas jala hipas keluarga on mangingani bagas on. Boti ma da amang !

Panungkun,
“Ba molo i do hape amang suhut nami lapatan ni parpunguan ta on, na uli ma i tutu jala na denggan. Toho do i tutu suhut nami, na nidok muna i, naeng ma jabu na marpahala bagas niba i. Antong sipabereng-berengon jala jabu na hinalomohon ni angka dongan sahuta dohot sisolhot ma jabunta on. Sai dapot ma songon hata ni umpasa :
Mabaor aek puli, Sian tano ni Simamora,
Hot ma jabunta on bagas na uli, Inganan marlas ni roha.
On pe suhut nami, sai manumpak ma amanta Pardenggan Basa i, sai diramoti ma tongtong jabunta on, asa sai hot bagasta on di batuna, togu di rangsangrangsang na jala momos di pangarahutna.
Dalan marbatubatu, dalan tu Simataniari ;
Sai gok ma jolma di jabu, sai gok mas ma di lamari.
Boti ma hata nami amang suhut. !

Nuaeng pe dihita saluhutna na pungu di bagas on nunga tung tangkas lapatan ni parpunguanta dohot ulaonta apala di tingki on, antong ganup ma hita pasahathon hata si gabegabe lumobi hata tangiang tu suhutta keluarga dibagas on. Molo dos rohanta di dok roha nami songon on ma partording na :

Parjolo ma hupasahat hami tu boru, dungi annon mandok hata ma sian hita na mardongan tubu, laos udut ma muse mandok hata sian dongan sahuta, di uduti ma muse sian ale-ale.
Dung i annon pinasahat tu uduran ni tulang, laos di uduti ma muse sian uduran ni hulahula.

Dung i, mangampu ma hasuhuton (parjolo ma boru ni suhut, ipe asa suhut)
(andorang so di dok suhut hata pangampuon, jolo di pasahat ma jolo angka pisopiso dohot pasituak na tonggi tu uduran ni Hulahula dohot uduran ni Tulang).

6. Pangujungi ni ulaon,

Marende dohot martangiang. (molo adong pangula ni huria di si, mansai denggan do molo nasida martangiang, jala molo sian Hulahula pe na denggan do i tongtong).

Songon i ma partording ni ulaon “mamongoti bagas”.







ADAT PARMONDINGON


Hata “monding” dipangke do i songon sada pandohan nahalus tu jolma namate manang marujung ngolu. Marharoroan sian hata (kata dasar) “onding” (onding = holip = ndang boi idaon = ndang boi donganan = gotap hubungan). Asa molo mangihuthon sian lapatan ni hata monding ingkon naung jolo ditanom (dikubur) pe namate i, ipe asa dohonon monding, ala nunga onding jala holip sian pamerengan ndang be berengon ni namangolu. Alai ala hata monding i paboahon (terkandung) naung gotap do hubungan ni namangolu tu namate dohot nungga sae ulaonna diportibion gabe i ma songon hata nahalus molo mandok “mate” tu jolma.

Adong do hea sungkun-sungkun songon on : boasa ndang didok monding Tuhan Jesus molo ditingki parningotan ari hamamate ni Tuhan Jesus ?, nda pantas ma nian dohonon monding Tuhan Jesus di Golgota songon hata halus ni mate.
Mate Tuhan Jesus di Golgota alai hehe do Ibana di ari patoluhon, ndang onding ibana sian jolma, ala ni i ndang dohonon monding Tuhan Jesus.

Marragam do parmate ni jolma dihasianganon adong do mate tingki posoposo manang tingki memet dope, adong dibagasan umur najempek jala laos adong do dibagasan umur naganjang sahat tu saurmatua maulibulung. Asa ndang boi lomo ni jolma taringot tu ngolu diportibion jala ndang boi ditolak manang isepe molo nunga tingkina tu hamatean i tung saguru dilomo ni roha ni Debata do. Alani songon halak Kristen hita tahaposeai do na hamatean i do dalan manomot surgo hasonangan i.

Mangihuthon adat dohot tradisi ni halak Batak sian angka ompu naparjolo i adong horong (kategori) ni hamamate (parmondingon) ni jolma, ima sian ukuran umur dohot parpinomparon (keturunan) andorang di ngoluna, alai ditingki naparpudion dung dibagasan hakristenon halak batak dohot hinorhon ni holong ni roha marhite ugamo i, nunga lam harhar be angka adat dohot tradisi naparjolo i ndang be sai tarihot tu pemahaman na binahen ni sijolo-jolo tubu i, domu ala laos adong hata mandok : ndang si manuk-manuk manang si bontar andora, asa ndang si todo turpuk si ahut lomo niroha. Turpuk (nasip), tohap dohot jambar ni hajolmaon suang songo i dohot umur pe Debata do umboto i. (Di tanganna siamun do ganjang ni umur, jala di hambirangna do hamoraon dohot hamuliaon. Poda sian Raja Salomo 3 : 16).

1. Mate di bortian, ima mate andorang di bortian dope manang di tingki parsorangna. Molo na songon i pintor hatop do i di tanom.
2. Mate posoposo, ima posoposo namate ndang gok dope sataon umurna.
3. Mate dakdanak dohot mate bulung, dakdanak na mate marumur sataon sahat tu umur remaja didok ma i “mate dakdanak”, na mate umur remaja sahat tu na magodang ndang hot ripe dope didok ma i “mate bulung”.
Tu angka horong na di ginjang i (1-3) ndang adong adat dipatupa tusi, ia molo sanga dope di bagasan ari i do i di taruhon tu udean sopola ingkon marborngin. Ndang sibahenon bangke ni na mate si songoni tu alaman, ingkon langsung doi diboan sian jabu tu udean. Dibahen pe aturan - aturan i marlapan do i asa panjoraan ma na masa na songon i tu joloan ni ari. Jala asa marhasurungan ma antong angka na mate saurmatua na maulibulung.
4. Mate purpur, ima marujung ngolu naung hot ripe alai ndang mardakdanak.
5. Mate punu, ima marujung ngolu naung hot ripe singkop do marboru, alai ndang maranak baoa, marbulung do nian tu ginjang alai ndang marurat tu toru manguduti goarna.
6. Mate mangkar manang sapsap mardum, ima marujung ngolu nunga maranak-marboru alai manek-menek do pe iananghonna di tinggalhon sodiboto dope mangalului hangoluan di portibion suang songoni hangoluan sogot ndang diboto dope mangalompa, tung siradotan dope sude iananghonna i. Molo ama do na mate, didok ma tu ina na manghabulon i “ponggol ulu” manang “matipul ulu”, molo ina do na mate, didok ma tu ama na manghabaluhon i “matompas tataring”. Pandohan na dua i na manggombarhon parngoluon na gotap di tongan dalan.
7. Mate sari matua, ima marujung ngolu singkop maranak-marboru jala nunga marpahompu, alai adong dope si sarihononna (adong dope iananghonna na so marhasohotan), ai tongtong do pe di sarihon ibana iananghonna i sahat ro di nalaho mate i ibana. Mardalan ma adat tu na mate sari matua.
8. Mate saur matua, ima marujung ngolu singkop maranak-marboru nunga sude marhasohotan (simpan) iananghonna jala nunga marpahompu. Mardalan ma adat saur matua tu si.

9. Mate mauli bulung, ima marujung ngolu singkop sude anak dohot boru na hot ripe huhut maranak-marboru, nunga marnini-marnono. Sude iananghonna, parumaenna, helana, boruna, pahompu, nini dohot nonona himpu sude pataruhon ibana tu inganan parpudi ndang adong tipul dangkana dohot rantingna.
Molo adong do sian pinomparna i naung parjolo marujung ngolu, gabe tu horong na saur matua nama i, ndang be dihorong mauli bulung. Ai tihas do molo di pataru ibana anakhon na tu udean manang pajolohon anakhonna sian natuatua na.
Horong namauli bulung i na ma natumimbo, ima na boi manjouhon / mambahen si tarahuak (sipitu dai) sian ulu ni si gagat duhut.

Rumang ni ulaon tu horong na be,

Hombar tu horong ni hamamatena, ia tu horong no.4 sahat tu no.6, ndang di pamasa adat tusi alai angka ulaon mangido tangiang ma di patupa, laos ndang pola maralaman di na laho manaruhon tu udean.
Dihorong No.7 sahat tu horong no.9, mardalan ma adat na balga, lumobi di horong saur matua dohot di horong mauli bulung.


Adong do na panangkok tingkatan horong ni na mate,

Di tingki na parpudion lumobi ditano parserahan mansai jotjot do masa panghataion ditingki marrapot ( ria raja) di namatean antara suhut - dongantubu - hulahula dohot tulang. Isarana ia horong ni namate i di horong sari matua (no.7) do, ala adong dope iananghonna si sarihononna na so marhasohotan dope. Ala nunga marpahompu jala nunga dewasa be angka anakhonna na so marhasohotan i, gabe dipangidohon suhut namatean i ma tu dongan tubuna dohot tu hulahulana asa dipanangkok tingkatan horong ni namate i sian sari matua gabe saur matua, sipata dipahalus do mandok: “mate sari matua do alai adat saur matua ma di bahen”.
Ndang apala binoto aha na nieahan ni namatean i molo tung pe di panangkok tingkatan horong ni na mate i sian sari matua gabe tu saur matua, ai so diboto namate i be manang aha dung tos hosana. Hombar tu pangidoan ni suhut namatean i, somalna sai dioloi angka raja do i, laos muba ma rumang ni adat si ulahonon tu si, ndang ulos tujung be pasahaton tu namanghabaluhon i, alai gabe ulos sampe tua ma pasahaton ni hulahulana molo tu ina, molo tu ama tulangna ma pasahathon.
Tung so adong do ni hilala manfaat na molo pe diangkat (di panangkok) tingkat horong ni namate sari matua gabe mate saur matua, dumenggan ma dibahen angka adat i hombar tu tohapna be sahat ro di hamamatena.
Ingkon manat do Hulahula manang Tulang laho mangoloi molo adong pangidoan sisongon i, ai sipata ndang haru sude mangantusi konsekwensina molo dioloi gabe nangkok tingkat horong ni na sari matua gabe saur matua.

Boasa ingkon manat laho mangoloi i?. Ai di ulaon adat ni na saur matua tontu bahenon na do ungkap hombung. Boha do bahenon ni Tulangna manjalo isi ni hombung i, hape adong dope berena manang ibeberena na so marhasohotan. Asa molo dioloi Hulahula (tulang i) sari matua gabe saur matua marlapatan do i na bertanggung jawab do tulang i di bere na i, ima :
Molo mangoli berena i gabe tulang na i nama bertanggung jawab ai nunga dijalo isi ni hombung i, ia so i adong boruna paorohononna tu bere na i. Songon i ma muse molo marhamulian bere boru / ibeberena ndang marhak be tulang i manjalo adat upa tulang sian parmulian ni ibeberena i, alana nunga dijalo tulang ulaon saur matua na mandok naung simpan sude tubu ni ibotona. Dibahen i ma tung so tarjalo do adat sari matua gabe adat saur matua.

Ulos saput, ulos tujung dohot ulos sampe tua,

1. Ulos saput tu na mate di bortian, mate posoposo, mate dakdanak dohot mate bulung, natorasna sandiri do mambahen i, molo pe dilehon tulangna ulos, digoari do i lage-lage.
2. Horong no.4 sahat tu horong no.7 mardalan ma ma ulos tu na manghabaluhon na mate i, molo tu horong no.8 dohot horong no.9 mardalan ma ulos sampe tua.
3. Tu angka pomparan ni na marujung ngolu di horong no.7 sahat tu horong no.9 boi ma di pasahat ulos holong manang ulos panggabe i sian sude horong ni hulahula dohot tulang (ima sian Hulahula, Tulang, Tulang rorobot, Hulahula ni anak manjae).
4. Molo naung mabalu hian do na monding i, ia ulos sampe tua di peakhon ma i diatas ni batang ni na monding i, dung i boru suhut ma mambuat i, na marlapatan na dohot do boru i mananggung deba harugian tu ulaon i.

Napasahat angka ulos molo Ama namonding (versi Silindung, Humbang dohot Pahae),
- Pasahat ulos saput ni na monding i : Tulangna.
- Pasahat ulos tujung tu Ina na manghabaluhon : Hulahulana.
- Ulos panggabei tu angka pomparanna : Haradeon ni Tulang & Hulahula ma i.

Napasahat angka ulos molo Ina namonding,
- Pasahat ulos saput ni na monding : Hulahulana.
- Pasahat ulos tujung tu Ama na manghabaluhon : Tulangna.
- Ulos panggabei tu angka pomparanna : Haradeon ni Tulang & Hulahula ma i.


Adat na gok,

1. Molo didok di patupa adat na gok di parmondingon, marlapatan do i ia namatei bahenonna do tu “tambak na timbo”, tano na marlampis, manuan raja ni duhut-duhut, ia so i tu batu napir marhalanguluhon (marbantal) batu marlagehon simin.
Diparserahan (isarana di Jabodetabek) ndang tarbahen be tu tambak na timbo molo marujung ngolu natuatua ala tu pemakaman umum do parbandaan nunga adong aturan tusi dibahen pamarenta. Asa holan hata pandohan nama didok tu tambak, atik pe secara fisik tanoman na biasa do. Alai ndang tertutup kemungkinan molo adong tano milik ni keluarga naboi do tong dibahen tu tambak na timbo manang simin songon na masa di bona pasogit. Nang pe so tu tambak na timbo secara fisik ala songon i ma di parserahanon, tongtong ma dohonon i na tu tambak na timbo, siala i hot do mardalan adat songon na di Bonapasogit i, adong jambar tu panambak.
2. Dibuat (diseat) do sigagat duhut (lombu sitiotio, lombu tumbur, horbo sitingko tanduk, horbo sisapang naualu manang gajah toba = horbo si 5 hae).
3. Mardalan ma parjambaran sian sigagat duhut i, hombar tu sintuhu dohot hatohoanna songon dia adat na masa di adat batak lumobi adat di na saluat i.
(hatorangan parbagi ni parjambaran ta bereng di halaman na asing).

Padalan Jambar juhut,

Di bona pasogit sai sian passa manang sian pintu ni jabu do di dabu (di sappatton) pasahat parjambaran huhut dijouhon hasahatan ni sijalo jambar i, angka horong boru ma partanggo (manalliki) jambar i asa sae padalanon tu angka raja-raja na ro. Dibahen i ma ianggo bagian raowan dohot holi-holi nalobi jambar ni partanggo ma i.
Di parserahan (isarana di Jabodetabek on) ndang tarbahen be padalan parjambaran mandabu sian passa manang sian pintu ni jabu jala ndang be di sappathon jambar i tu tano manang tu atas ni lage, denggan na ma di taruhon di atas talam manang di atas piring asa unang rotak jagal i, jala denggan jalo on ni namanjalo. Adong 3 macam teknis ni pardalan parjambaran songon naung hea ni ida di Jabodetabek:
1. Jambar mangihut, artina dung sidung mandok hata di tingki mar-acara dialaman, ihut ma di jouhon / di pasahat jambar tu nasida.
2. Parjolo di padalan parjambaran andorang so mar-acara di alaman dope.
3. Dung sidung mar-acara dialaman sae mangampu hasuhuton, di paso ma jolo acara ndang langsung di pasahat tu Huria, dungi disi ma kesempatan ni suhut padalan parjambaran i. Asa dung selesai padalan parjambaran ipe asa di uduti muse acara tu Pangula ni Huria.


Pasahat Pisopiso,

Diulaon sari matua, saur matua, dohot mauli bulung, pasahaton ma “Pisopiso” (hepeng di bagasan amplop) tu hulahula manang tulang sibahen ulos saput dohot sibahen ulos tujung manang ulos sampe tua. Tu sude tahe horong ni hulahula na ro pasahathon ulos panggabei, sian bona ni ari sahat ro di hulahula naposo tongtong ma pasahaton pisopiso tu nasida.
Ndang marbatas godang ni pisopiso i sipasahaton tu sude horong ni hulahula dohot tulang, dipahombar ma i tu haboion (kemampuan) ni suhut i, songon ni dok ni umpama :
Ndang tarjongkal piso tu hulahula ;
Ndang tardopa ulos tu boru.

Ungkap Hombung,

Hombung ima inganan panimpanan ni angka ugasan na ummarga ; hepeng, mas, ulos dohot angka abit (pangkean) dohot na asing. Ia na mangungkap hombung holan di parmonding ni ina naung marpahompu (sarimatua, saur matua, maulibulung) do i masa. Molo ama do na monding, jala mangolu do pe ina, ndang dibahen mangungkap hombung, ai ina i do sitiop hombung. Ia si ungkap hombung i, ima apala ama naposo ni ina namonding. Dipangido ama na poso ni na monding i ma manang aha lomona sian angka barang tininggalhon ni namboru na naung monding i. Asa boi do i pinahan, boi mas, dohot na asing na i. Alai ditingki naparpudion sai hepeng na ma dipasahat molo tingki mangungkap hombung.

PARTONDING NI ACARA ADAT

1. Pasada Tahi
Pasada tahi, marpungu ma Hasuhuton dohot dongan tubu dohot boru laho mambahen angka rencana na hombar si patupaon nasida tu parmondingon i, songon si hatahonon nasida tu na mar ria raja.

2. Marria Raja
Marria raja, ima acara panghataion ni unsur dalihan natolu, dongan tubu, boru, dongan sahuta, hulahula dohot tulang, laho mambahen haputusan na hombar tu parmondingon i, andigan taruhonon tu udean, angka na pasahat ulos, dohot angka na asing na hombar sipamasaon dope. Somalna di pungka panghataion i lobi hurang pkl.20.00 bodarina sahat tu na sidung.

3. Mompo
Mompo, ima acara pamasukhon na monding i tu jabu-jabu na, di ulahon ma i dung sidung Marria Raja, holan marende dohot martangiang do di si, ndang pola adong mandok hata apul-apul manang hata gabe-gabe.

4. Pasahat Ulos
Pasahat ulos, di pamasa manogot ni ari (di parnakkok ni mata ni ari), alai sipata ala ni angka partingkian boi do di patupa pasahat ulos di bodarina dung sidung mompo, laos diuduti angka hata apul-apul, hata sipaingot manang hata gabe-gabe sian sude horong.
Dibahen ma parjolo ulos saput tu na monding, di pasahat ma muse ulos tujung manang ulos sampe tua, dungi angka ulos holong manang ulos panggabei.

5. Tuat tu alaman
Andorang so di taruhon tu udean dohot andorang so mandok hata dope, jolo di papinda ma na monding i di bagasan jabu-jabuna tu alaman ni jabu (molo mangijinhon do alaman ni jabu i, alai molo so mangijinhon do hot ma di jabu bangke i, di paboa ma tu situan natorop kondisi na songon i), di atur ma parpeakna asa sude suhut lumobi pomparanna boi hundul manghaliangi bangke na bonding i.

6. Acara mandok hata laho paborhathon tu udean
Tu angka na mandok hata porlu di parate-atehon keterbatasan ni tingki, asa unang mangganggu tu tingki naung ditontuhon parborhat na tu udean.
Susunan acara di alaman :
1. Hata Huhuasi (kata pengantar) sian Paidua ni suhut
2. Manjaha riwayat hidup (jujur ngolu) sian Suhut
3. Mandok hata, sian :
a. Dongan Tubu
b. Boru / Bere
c. Ale-ale / dongan sa ulaon
d. Pemerintah setempat (RT / RW)
e. Dongan sahuta
f. Hulahula ni anak manjae
g. Hulahula ni na marhahamaranggi
h. Bona ni ari
i. Bona tulang
j. Tulang rorobot
k. Tulang
l. Hulahula
4. Mangampu, sian :
a. Utusan Punguan Marga ni Suhut
b. Suhut Bolon (parjolo sian boru ni suhut, ipe asa suhut bolon i).
Pardalan ni acara (1 – 4) di pandu Protokol sian horong ni dongan tubu, di bahen i sude horong ni na mandok hata ndang pola mambahen acara sandiri-sandiri (marende dohot martangiang), sae ma holan na mandok hata.
5. Acara Huria / Keagamaan
Dung sidung acara mandok hata (1-4), dung i di pasahat ma tu Huria mambahen acara keagamaan sahat tgu na manaruhon tu udean, inganan paradianan na parpudi.

MARTONGGO RAJA

ULAON MARTONGGO RAJA / RIA RAJA


Sada ulaon na arga jala na porlu situtu do Tonggo Raja i, molo masa ulaon horja manang adat na balga sai jolo patupaon/dipalolo suhut do tonggo raja.
Terbatas do sinurathon ulaon tonggo raja dison, ima secara khusus tu ulaon unjuk ala mansai jotjot do ulaon on masa diparserahan on.

Aha do perbedaan ni Ulaon Martonggo Raja dohot Ria Raja? Mangihuthon angka natua-tua na sinungkun taringot tu perbedaan ni pandohan na dua i, didok songon on: Molo Martonggo Raja: dihasuhuton na mangundang i ma bolahan amak di ulaon unjuk na naeng ro (baik pe nasida songon suhut paranak manang songon suhut parboru), jala molo;
Marria Raja: ndang hasuhuton i songon bolahan amak di ulaon unjuk na naeng ro. Songon i ma hatorangan na dapot, alai nang pe songon i ndang haru tangkas dope binoto dohot niantusan dia do perbedaan na sasintongna.

Tonggo Raja lapatanna: mangontang dohot manubut roha ni angka raja (ima: raja huta [dongan sahuta], raja ni dongan sabutuha, raja ni boru dohot bere, angka punguan-punguan), papunguhon nasida sude disada tingki laho paboahon dohot manungkunhon sangkap ni roha tu ulaon i dibagas ni hasuhuton.

Diparade hasuhuton do sipanganon hombar tu natahasomalhon di parserahon on, diparade do sian pinahan lobu jala disi dohot angka namargoarna (tudu-tudu ni sipanganon) ala na manonggo dohot na manubut roha ni angka amanta raja dohot ina soripada na naeng mangurupi di ulaon na naeng ro, somba tangan, elek hata, asa anggiat denggan mardalan ulaon i sude.

Somalna secara khusus di Jabotabek on, ia ulaon tonggo raja/ria raja dipasada do ari na dohot ari ni partumpolon (acara perjanjian nikah) di Gereja, jala dipatupa ma ulaon i dung jolo mulak sian Gereja. Ala ndang sude Gereja mambahen acara martumpol, ala ni i dibuhul hasuhuton ma sada ari tu na martonggo raja.

Partording ni Ulaon Tonggo Raja / Ria Raja

1. Marsipanganon
Dung marpugu sude na niontang (na niundang) suang songon i sude horong ni suhut, dipatupa ma rap marsipanganon. Andorang so martangiang jumolo ma dipasahat hasuhuton tudu-tudu ni sipanganon tu adopan ni sude raja na niontang disi rap dohot ina soripada.

Songon patamahon na diadophon tudu-tudu ni sipanganon i tu sude raja na niontang, dihaliangkon (diputar) ma inganan ni tudu-tudu ni sipanganon i tolu hali.
Dung rade sude sipanganon jala dung ditangiangkon hasuhuton, mangan ma. Dung i jongjong ma wakil ni hasuhuton manghatahon huhuasi ni sipanganon, didok ma: “Ba songon i ma da rajanami, raja ni dongan sabutuha, raja ni dongan sahuta, raja ni parboruon dohot inanta soripada”, songon nidok ni angka natua-tua.
Sititi ma si gompa,
Golang-golang pangarahutna
Ba tung songon dia pe nuaeng na tupa,
Ba sai godang ma pinasuna.
Botima!

“Ima tutu”, ninna sude na mangan i.

2. Marbagi jambar
Dung sidung mangan (andorang so manghatai dope) dipature (dibagi) ma parjambaran ima sian tudu-tudu ni sipanganon i. Laos diuduti ma muse manghatai.

3. Manghatai
Somalna tar sian angka dongan sahuta ma panungkun, ia so i sian dongan sabutuha ma (mardos ni roha ma disi).

Manungkun dongan sabutuha,
Manghatai ma hita suhut nami,
“Gokkon sipaimaon, jou-jou sialusan; ia nunga ro hami manggohi gokkon dohot jou-jou muna tu bagasta na marampang marjual on, bagas sibagandingtua panjaloan sangap dohot tua sian Tuhanta, jala nunga hundul iba di amak tiar, ba, sai tiar ma tutu panggabean parhorasan di hita tu joloansa on tumpahon ni Amanta Debata. Nunga bosur iba huhut mangan indahan na las na pinarade muna i, sagat huhut marlompan juhut na tabo i, sombu uas marhite aek sitio-tio”, onpe amang suhut nami, songon nidok ni sijolo-jolo tubu : Sai jolo ni nangnang do asa ni nungnung, Sai jolo pinangan do asa sinungkun.
Ba nuaeng pe, na manungkun ma hami dihasuton :
Dia ma matana, dia ma haltona
Dia ma hatana, dia nidokna
Botima!

Paidua ni suhut mangalusi,
“Gabe ma hita jala horas. Ba ia nunga manungkun hamu dihata dohot lapatan ni sipanganon, tung so sadia pe nuaeng na pinatupa ni suhutta ba, sai pamurnas mai tu pamatangta, saudara tu bohi, sipasindak paniali ma i, sipaneang holi-holi. Sai mamasu-masu ma Tuhanta lam ditambai dihami hagabeon dohot pansamotan tu joloansa on, asa boi dope nian patupaon nami sipanganon na gumodang jala na tumabo. Ia taringot di sungkun-sungkun muna i Hahadoli / anggidoli, taringot di hata ni sipanganon i, ba sipanganon panggabean parhorasan do lapatanna”. Boti ma hahadoli / anggidoli”.

Panungkun,
“Ba molo songon i do hape ba na uli ma i tutu, sai asi ma roha ni Tuhanta pardenggan basa i, sai ditambai dope pasu-pasu di hamu tu joloansa on.
Bagot na marhalto ma na tubu di robean
Ba sai horas ma hami na manganhon
Sai lam tamba ma dihamu na mangalean
Alai ale amang, sai marangkup do ninna na uli, mardongan do na denggan. Nuaeng pe tangkasma paboa hamu siangkupna songon na hundul, sidonganna songon na mardalan, asa tung torang huboto hami sangkap dohot tujuanna na mambahen parpunguanta on”. Botima!

Paidua ni suhut mangalusi,
“I do tutu, rajanami, toho do nanidokmunai, sai marangkup do na uli, mardongan do na denggan. Jadi nuaeng pe paboaon nami ma tangkas dia dohot aha do alana hubahen hami parpunguan on. Songon naung tangkas tarida di surat gokkon dohot jou-jou nami tu hamu, tonggo raja do parpunguanta on. Na marbonsir do i ala adong ulaon adat si patupaonta ndang pola sadia leleng nari be. Molo asi roha ni Tuhanta, jala molo so adong ambat bingkolangna be, na marsangkap do hami (dipaboa ma ulaon adat aha sibahenon i). Jadi mardomu tusi, aturanna ma i, molo adong sangkap ni roha mangula manang aha, denggan jala na patut do tahe paboaon i huhut pasungkunhononhon tu raja ni dongan sabutuha, dongan sahuta dohot tutur ulaon i. Asa na pasungkunhon ma hami parjolo tu hamu angka na pinarsangapan manang songon dia pandapot dohot pingkiranmuna taringot tu sangkap nami songon naung pinaboa nangkin. Jala molo nunga satolop hita disiulaon i, ba, na laos mangido ma hami tu hamu angka napinarsangapan, tarlobi raja ni dongan sabutuha, raja ni dongan sahuta, raja ni parboruon, asa rade nian hamu saluhutna mangalehon tingki dohot pingkiran mangurupi hami patulushon ulaon i. Ba, i ma da angka rajanami umbahen na hupatupa hami tonggo raja on”. Botima.

Panungkun,
“Hamu suhut nami, nunga torang huantusi hami hatamuna i. Ndada pola ganjang be dohonon hata. Pendek ma ni alusan: ‘Satolop ma hami disangkap muna I, jala rade do hami mangalehon tingki, nang angka pingkiran mangurupi hamu olat ni na tarbahen’. On pe ba paaboa jala rimangi haamu ma sude angka na porlu bahenonta, ima:
- andigan mata ni ulaon i
- di dia do inganan / alaman ni ulaon i
- sipatupaon tu pesta i
- hira piga halak ma torop ni siundangon tu pesta i
Jala dung dipaboa hamu i annon sude, ba pintor tatontuhon ma parbagi ni ulaon i dohot angka na martugas tu ganup bagianna. Songon i ma jolo hata sian hami. Botima!”

Paidua ni suhut mangalusi,
“Mauliate ma rajanami dihatamuna i, sai diurupi Tuhanta ma hita diulaonta on. Ba nuaeng pe, satahi saoloan ma hita mamillit dohot manotophon songon pandohan muna i”.
Dung i dipaboa hasuhuton ma pangalaho ni pesta, ari ni ulaon i, inganan dohot angka sipatupaon tu pesta i.

Udut tusi dihatai ma angka na martugas di sude si ulaon jala dipillit huhut ditotophon ma manang angka ise do halakna, ima :
- Protokol (pande mangatur)
- Raja parhata (parsinabung)
- Pataru pinggan panungkunan dohot mic (sian boru)
- Koordinator manjalo haroro ni hula-hula (sian horong hasuhuton)
- Koordinator manjalo dengke siuk
- Koordinator manjalo boras si pir ni tondi
- dohot angka na asing na i.

Laos disungguli ma muse angka na ringkot siparadeon ni hasuhuton na porlu tu ulaon i, mamungka sian hal na metmet sahat tu na balga asa unang adong na lupa. Dung sidung i laos hataan do muse angka paradaton naung ditontuhon ditonga-tonga ni Punguan marga dohot parsahutaon.

4. Suhut mangampu hata,
Molo nunga sae sude dihatai, suhut bolon ma mandok hata mauliate, didok ma: “Hamu angka na pinarsangapan, tung mandok mauliate godang do hami parjolo di Tuhan pardenggan basa i, na mangalehon tu hamu angka na pinarsangapan roha holong gabe rade hamu sude mangalehon tingki dohot pingkiran laho mangurupi hami di ulaonta na naeng ro. Mauliate malambok pusu do dohononnami nang tu hamu sude na pinarsangapan ala ni rade ni rohamuna mangalehon pangurupion i. Sai dipargogoi Tuhanta ma hita patupahon ulaonta i jala dipasu-pasu ulaon i. Botima!”.

5. Pangujungi,
Di dipaujung ma punguan i dibagasan ende dohot tangiang.
Marsijalangan.

Songon i ma partording ni ulaon tonggo raja tu ulaon unjuk



PARTORDING NI PESTA ADAT (MARUNJUK)


Adong dua pangalaho na boi idaonta taringot rumang ni pesta adat/marunjuk, i ma :
- Molo di paranak do bolahan amak didok mai i: “taruhon jual”
- Molo di Parboru do bolahan amak digoari ma i: “dialap jual”.

Ia partonding ni angka siulaon dibagasan pesta unjuk sadari i, ima :
1. Marsibuha-buhai
2. Pamasu-masuon di Gereja
3. Pesta adat di alaman/gedung
4. Laos udut ma muse tingkir tangga dohot ulak une.

Dison ni uji do mambahen sada rangkaian pardalan ni Pesta Adat songon naung somal taulahon diparseharan on, jala asa ummura ihuthononta, ia pardalan ni pesta adat nasinurathon dison ima “ULAON DIALAP JUAL”.

A. MARSIBUHA-BUHAI

Sibuha-buhai, ima sada acara adat na songon pamuhai (pembukaan) ni ulaon dibagasan sadari i (pamasu-masuon sahat tu ulaon unjuk di gedung pertemuan). Di ari naung binuhul, sogot manogot i, dipatupa ma na marsibuha-buhai. Ro ma paranak tu bagas ni parboru mamboan indahan sibuha-buhai (sipanganon na marsaudara) di atas ni ampang (jual) dihunti iboto ni pangoli, laos rap ma dohot pangoli ai laos sian i nama borhat tu Gereja.

Ia dung pungu sude paranak dohot parboru, dipatupa ma na marsipanganon. Paranak ma pasahathon tudu-tudu ni sipanganon tu adapon ni parboru.

Hata Sian Paranak:
(Paranak pasahat tudu-tudu sipanganon)
“Di hamu raja ni hula-hula nami, di ari na denggan di manogot on, ro do hami pamoruon muna pasahathon sipanganon tu jolomuna. On ma rajanami na songon pamuhai ni ulaonta apala sadari on anggiat ma tiur jala sonang so haribo-riboan ulaonta, didongani asi roha ni Tuhanta. Tung songon i pe partupa ni sipanganon na hupasahat hami tu hamu, tung las ma rahamuna manjalo, horas ma jala gabe”.

Hata Sian Parboru
(Parboru Pasahat Dengke tu Paranak)
“Di hamu raja ni pamoruon nami, dison hupasahat hami do dengke simudur-udur, dengke sitio-tio, asa mudur-udur ma ro parsaulian tu hamu, jala sai tio ma aek dapotonmuna. On ma tutu songon na gabe pamuhai ni ulaonta apala sadarion, sahat ma na uli sahat ma na denggan, sai dipatiur Tuhanta ma tutu ulaonta manipat sadarion. Horas ma jala gabe.Botima!”.

Marsipanganon, (tangiang marsipanganon si paranak)
Dung simpul marsipanganon, ai ndang pola adong panghataion adat disi, asa borhat tu Gereja rap jongjong ma sude parboru dohot paranak rap dohot pengantin, dung i dibahen natoras ni boru muli ma tangiang paborhathon tu Gereja.

B. PAMASU-MASUON DI GEREJA

Saleleng di Gereja, parhalado ni huria do na mangatur sude acara pamasu-masuon i. Alai dung simpul acara pamasu-masuon i, ro ma tu jolo sahalak utusan sian pihak parboru, suang songon i muse sahalak utusan sian pihak paranak, laho mandok mauliate tu parhalado ni Huria/Pandita, laos huhut mangarahon natorop, asa rap udur tu alaman/gedung pertemuan naung tinontuhon (songon alaman ni parboru).

C. ULAON ADAT DI GEDUNG

Dung hira himpu sahat sude tu Gedung parpestaan!

Protokol ni parboru manariashon huhut patamahon tu sude raja na ni ontang, asa masuk ma jala hundul tu inganan naung diparade hasuhuton parboru. Laos dipatama jala dipaboa ma ia inganan ni pihak paranak dohot sude uduranna, ima sisabola hambirang pintu masuk tu gedung, manang sabola siamun ni protokol. Dung i diarahon ma suhut parboru laho manomu-nomu sude horong ni hula-hula dohot tulang jala ditaruhon tu hundulan naung diparade.

Protokol ni paranak pe tong ma mangulahon songon na binahen ni parboru, taringot tu angka inganan dohot na manjalo hula-hula dohot tulang.

Protokol Sian Parboru:
Dihamu raja pamoruonnami! (didok marga ni paranak). Beha amangboru, ala nunga sirsir tingkina nunga hira-hira boi pungkaonta ulaonta? Molo sian hami hula-hula muna nunga rade hami, molo tung adong naso haru sahat dope tu inganan on, ba, mandapoti na uli ma nasida!

Protokol Sian Paranak:
Mauliate ma rajanami! Alai lean hamu ma jolo tingki di hami laho pasangaphon hula-hula nami! Di hita na mardongan tubu, boru/bere, dongan sahuta, ale-ale, pariban dohot sude raja ginokhon suang songon i di ina soripada, tarlumobi ma di hamu sude nahuparsangapi hami: raja ni hula-hula nami ….. (didok margana), bona ni arinami ….., bona tulang nami ….., tulang rorobotnami ….., tulangnami ….., hula-hula sian namartinodohon ….., hula-hula sian anak manjae ….., ala naeng mulaanta ma ulaonta, rajanami, asa tong-tong ma hamu dilambungnami maniroi huhut mangajar-ajari hami.

Nuaeng pe di hamu raja ni hula-hula nami, nunga rade hami rajanami, di na laho mandapothon huhut manomba hamu raja ni hula-hula nami.

Protokol Sian Parboru:
Mauliate ma di hamu raja ni pamoruonnami! Dihita namardongan tubu, borunami, raja ni dongan sahuta, ale-ale, pariban dohot sude raja naginokhon, tarlumobi ma dihamu sude nahuparsangapi hami, hula-hulanami ….., tulang rorobotnami ….., tulangnami ….., hula-hula namarhahamaranggi ….., hula-hula ni anak manjae (didok margana), rajanami, ala naeng ro ma raja ni pamorounta asa rap manjalo ma hita, tuson ma hita!.

Nuaeng pe di hamu raja ni pamoruonnami, nunga mangarade hami manjalo haroro muna!.

Paranak Pasahaton namargoar ni Sipanganon tu jolo ni Parboru!

Protokol Sian Paranak (manang Sahalak Sian Natua-tua):
Di hamu raja ni hula-hula nami, dison rodo hami raja ni pamoruonmuna pasahathon namargoar ni sipanganon, asa songon na nidok ni natua-tua ma dohonon :
Bagot na marhalto na tubu di robean
Horas ma hamu namanjalo, horas hami na mangalean.
Las ma rohamuna. Botima!

Protokol Sian Parboru:
Di hita na mardongan tubu, boru/bere, tarlumobi di hamu sude horong ni hula-hula nami, dison tajalo do namargoar ni sipanganon, molo di jolo ni hasuhuton pe i, naung rap manjalo ma hita disi.
Di hamu raja ni pamoruonnami mangarade ma hamu, ai naeng ro ma hami mandapothon hamu.

Parboru Pasahathon Dengke tu Paranak!

Protokol Sian Parboru (manang Sahalak Natua-tua):
Di hamu raja ni pamoruonnami marga ….., dison ro do hami pasahathon dengke simudur-udur, dengke sitio-tio, dengke simegal-megal, asa mudur-udur ma hamu tu dolok tu toruan, tio ma aek inumonmuna, jala sai megal-egal ma hamu sude raja ni pamoruonnami. Tung songon i pe dengke na hupasahat hami tu hamu, las ma rohamuna manjalosa. Horas ma jala gabe. Botima!.

Protokol Sian Paranak:
Mauliate ma di hamu raja ni hula-hula nami marga …..! Di hita na mardongan tubu, boru/bere, tarlumobi di hamu horong ni hula-hula nami, dison dipasahat hula-hulanta do dengke simudur-udur, molo tung di jolo ni hasuhuton pe nuaeng i, ba naung rap manjalo ma hita disi. Botima!

Protokol Sian Parboru:
Dihamu raja ni pamoruonnami marga ………., didok rohanami ala hamu do na ro mamboan sipanganon, hamu ma mambahen tangiang laho marsipanganon, hupasahat hami ma tu hamu.

Protokol Sian Paranak:
Mauliate ma rajanami, molo i do na dumenggan didok roha ni raja i. On pe pinangido ma amanta …………., ro tu jolo on laho mambahen tangiang marsipanganon.
- Martangiang ………
- Marsipanganon …….

Ditingki marsipanganon, mardalan ma sulang-sulang na tabo sian pihak paranak tu pihak parboru. Ate-ate sian namargoar ni sipanganon i, diseati boru ni parboru huhut dibagihon tu angka na mangan i tu pihak parboru.
Paranak pe mambagihon dengke suhut tu haha/anggi, tu boru/bere, dohot tu dongan sahuta.

Ditingki na mangan i, mardalan ma suhut na dua bola pihak manjonohi angka raja na ginokhonna, patamahon asa godang-godang dipangan tamue i sipanganon naung pinarade.
Udut tusi, dijahahon protokol ni parboru/paranak ma angka dengke siuk naung jinalo siang angka na marholong ni roha; somalna sian angka dongan sabutuha ni parboru ma i, sian angka horong tulang dohot hula-hula.

Dung simpul marsipanganon …..

Protokol Sian Parboru:
Di hamu raja ni pamoruonnami, nangkaning nungnga tangkas hujalo hami namargoar ni sipanganon sian hamu; andorang so di seat raut asa jolo diseat hata. Songon dia ma partonding ni sipanganon on amangboru?

Protokol Sian Paranak:
Rajanami, nungnga hupasahat hami tu hamu, didok rahanami, ba hamu ma na mangatur rajanami, ba sidapot solup ma hami di huta ni raja i. Botima.

Raja Hata Sian Parboru:
Mauliate ma! Songon on ma jambar taripar (dengke mulak) sipasahaton nami tu hamu pamoruonnami, pasahaton nami ma tu hamu (ida hatorangan parjambaran di halaman na asing).
Las ma rohamu manjalosa. Botima!
Di hamu boru nami, boru ni hasuhuton, asa pature hamu ma parjambaran na laho sipasahaton tu paribanmuna.

Protokol Sian Paranak:
Di hamu raja ni hula-hula nami, mangido tingki hami tu hamu raja nami, laho mangido tumpak manang pangurupion hami sian angka na manghaholongi hami.

Protokol Sian Parboru:
Na uli i amangboru, ulahon hamu ma!

Protokol Sian Paranak:
Di hita namardongan tubu, boru nami, bere nami, dongan sahuta dohot ale-ale nang angka pariban nami namanghaholongi hami lumobi hasuhuton dison.
Didok natua-tua: Sisoli soli muhum, siadapari gogo.
Songon na binotomuna, na pangolihon anak ma hita nuaeng. Nungnga mangarade hasuhuton dison manjalo haroromuna diangka tumpak dohot pangurupion. Parjolo ma sian haha anggi, mangihut ma angka boru/bere, dohot sude na manghaholongi hami dison, laos songon ima dohonon nami tu hamu angka tulang nami :

Dangka do dupang, amak do rere
Amang do tulang, anak do bere

Di pangolion ni bere muna/anak muna on, ba, hirim do rohanami di angka pambahenan muna, mauliate ma!
Di tingki mardalan na papungu tumpak laos disi ma mardalan nang pambagian ni parjambaran.

Parboru Pasahat Parjambaran Juhut .
Paranak Pasahat Parjambaran Juhut.
(Hatorangan marbagi jambar bereng di halaman na asing)

Taringot tu parjambaran juhut, olo do i sipata maruba, ai asing dolok asing do duhut na, asing luat olo do asing angka uhum na, na marlapatan ndang sai dos disada luat tu luat na asing, ala ni i do umbahen na sai jolo didok: Sai jolo diseat hata ma asa diseat raut.
Jadi tong ma marlaku pandohan: Aek godang tu aek laut, dos ni roha do sibahen na saut.
Sude parjambaran on ingkon tangkas do on dijouhon (ditariashon) protokol sian jolo. Jala tangkas sahat tu hasahatanna.
Di ujung ni na mambagi jambar juhut on, tong dope ingkon dohonon ni protokol: “Atik tung adong dope parjambaran na so haru sahat, asa paboa hamu tu jolo on, adong dope na boi patureon nami di nasida!”.
Dung simpul saluhutna i, ditorushon ma manghatai.

Protokol Sian Parboru:
Di hamu raja ni pamoruonnami, ra nunga boi torushononta tu angka panghataion. Andorang so hupataripar hami panghataion tu hamu, asa loas hamu ma jolo hami na mardongan tubu marsipasadaan hata.
Suang songgon i ma nang di hita na mardongan tubu, borunami/berenami, tarlumobi ma di hamu sude hula-hulanami: hula-hula nami ……. (dohot satorusna).
Rajanami, hamu do pangalapan poda di hami, raja di jolo do hamu sieahan, raja di pudi hamu sipainteon; asa tutur-tuturi hamu hami rajanami di angka panghataion nami asa unang adong na sanga sala. Mauliate ma di hamu sude horong tulang dohot hula-hula nami.

Di hita na mardongan tubu, songon na somal taulahon di ranto on, molo di hami ma bona ni hasuhuton, ba sian haha doli manang anggi doli ma na gabe siraja panungkun manang parsinabung. On pe, haha-anggi, hupasahat hami ma tu hamu, hamu ma na masiaturan. Botima!

Haha Doli / Raja Hata ni Parboru:
Di hita na marhahamaranggi, ise ma sian hita na manungkun hasuhutonta, pinasahat tu anggi doli, bahen hamu sian i.

Anggi Doli:
Mauliate ma di haha doli. Didok rohanami si sada anak sida boru do hita. On pe, ba laos haha doli ma na gabe raja panungkun sekaligus ma gabe raja parhata manang parsinabung di ulaonta on. Botima!

Haha Doli:
Mauliate ma molo songon i; alai tongtong ma hamu di lambungnami, asa unang sanga adong na sala, ndang na gabe mangorui sangap ni angka hula-hulanta nang hita na marhahamaranggi sandiri pe. Mauliate ma!

Manghatai ma hita, di hamu hasuhuton bolonnami!
Gokkon do ninna sipaimaon, jou-jou si alusan, ba, nunga ro hami manggohi gokkon huhut mangalusi jaou-joumuna. Nunga bosur hami mangan indahan na las sagat marlompan juhut, dohononnami ma :
Sai pamurnas ma i tu daging, saudara tu bohi
Sipalambok imbulu ma i, sipaneang holi-holi

I pe, manungkun ma hami tu hamu hasuhuton bolon nami dison :
Dia ma laklakna, dia ma unokna
Dia ma hatana, dia ma nanidokna.
Hupasahat hami ma tu hamu. Botima!

Protokol Sian Parboru / Wakil ni Paidua ni Suhut:
Mauliate ma disungkun-sungkun ni haha doli. Jala mauliate do dohononnami tu hamu sude, di na marneang ni langka hamu rap dohot inanta soripada, manggohi huhut mangalusi jou-jou nami. Ianggo hata ni sipanganon raja ni dongan tubu, ba panggabean parhorason do. Botima!

Raja Hata ni Parboru:
Horas ma jala gabe di hamu hasuhuton nami. Panggabean parhorasan do hape haroanta apala sadari on. Alai marangkup do nauli mardongan do na denggan, siangkup songon na hundul, si udur songon na mardalan. Siangkup ni panggabean parhorasan, ba, tung tangkas ma dipaboa hasuhuton bolonnami. Botima!

Protokol Sian Parboru / Wakil ni Paidua ni Suhut:
Mauliate ma disungkun-sungkun ni haha/anggi doli. Siangkup ni panggabean parhorasan, tangkas ma tutu paboaonnami, asa tung tangkas di boto natorop. Haha/anggi doli! Songon naung tangkas di bereng hamu na masiadopan do hita nuaeng dohot raja ni parboruon marga …….., na ro do nasida tu hutanta on laho mandapothon hita hula-hulana.
Ba, manang songon dia sangkap ni rohanasida, hupasahat hami hasuhuton ma tu hamu, asa hamu haha/anggi doli ma na mangadopi huhut manungkun taringot tu haroronasida. Hupasahat hami tu hamu.

Raja Hata ni Parboru:
Mauliate ma di hamu suhut nami. Na ro do hape tutu raja ni pamoruonta marga …., mandapothon hita hula-hulana. Mauliate ma molo boti!

Catatan : Disipata angka ulaon ndang pola binahen be namasisungkunan namarhaha/anggi doli, langsung ma dipasada/dos roha laho menunjuk raja parhata, songon naung di hatai di tonggo raja.

Diuduti ma muse …

Raja Hata ni Parboru:
Di hamu raja ni pamoruonnami marga ….., manghatai ma hita amangboru!
Sai jolo ninangnang do asa ninungnung
Sai jolo pinangan do asa sinungkun

Artia mula ni ari
Sipaha sada mula ni bulan
Asa tangkas hita manghatai
Pasahat hamu ma jolo pinggan panungkunan!
Paranak Pasahathon Pinggan Panungkunan.

Manghatai ma hita raja ni pamoruon:
Ba, nunga dison pinggan sitio soara na hot di hundulanna, sai tio ma antong parnidaanta tu joloan on, jala sai hot ma di hita pasu-pasu sian amanta Debata.
Peak diatasna napuran sirata bulung hasoloan ni boru ni raja, ba, sai rata ma antong di hita tu joloan on pansamotan dohot parhorasan.
Adong do huhut dison parbue santi, siribur-ribur, parbue sipirnitondi. Anggiat ma antong sakti madingin, sakti matogu angka pomparanta, matorop maribur huhut matangkang manjuara.
Laos adong do dison ringgit namarmata, tinongos ni negaranta, sipalas roha ni natorop dohot amanta raja. Sai martamba ma antong ria dohot las ni roha di hita tu joloan on.
Jadi amang raja ni boru, namanungkun ma hami jolo taringot di hata ni sipanganon. Dibahen i parjolo dohonon nami tu hamu :
Bagot na marhalto, niagatan di robean,
Sai horas ma hami namanjalo,
Ba sai lam martamba di hamu na mangalean.
Ia nunga hami bosur mangan indahan na las, jala jagar sagat marlompan juhut na tabo i, dohot sombu uas minum aek sitio-tio na tinahumuna i, ba :
Dia ma langkatna, dia unokna
Dia ma hatana, dia nidokna
Sibegeon ni pinggol, sipeopon ni roha.
Botima raja ni boru!

Raja Hata ni Paranak:
Mauliate ma rajanami! Marangkup do tutu na uli mardongan do na denggan, siangkup ni panggabean parhorasan tangkas ma tutu alusan raja i. Rajanami :
Balga ninna anak pangolihonon
Balga boru pahutaon.
Songon naung tangkas taudurhon nangkining anaknami dohot boru ni raja i tu bagas joro ni Tuhanta, manjalo pasu-pasu parsaripeon sian naposo ni Tuhanta; nuaeng pe rajanami, na ro ma hami tu jolo ni raja i, asa manghatai hita taringot tu adat dohot uhum na hombar tu parsaripeon ni ianakkonta, na marhata sinamot ma hita nuaeng rajanami, i ma pangidoan nami. Botima!

Raja Hata ni Parboru:
Gabe ma jala horas amangboru!
Pitu lilinami, paualu jogian nami
Uli nipinami, ai gohanmuna ma hajut nami
On pe amongboru, hami ma parjolo mangolit na gabe sinamot ni borunami. Pasahat hamu ma 2 bara horbo, 2 bara lombu, 5 hoda sienjak-enjakon nami molo ro tu huta ni pamoruon nami, tamba ni 2 ampang sere dohot ringgit sitio soara, ba, botima da amangboru!

Raja Hata ni Paranak:
Mauliate ma rajanami, nunga laos digolit raja i tutu, na gabe sinamot ni boru ni raja i. Alai tulang, raja bolon! Molo hupasahat hami 2 bara horbo, 2 bara lombu, i pe molo tung adong, ba, tudia ma annon bahenon ni raja i bara na di huta on? On pe tulang, na mangelek-elek ma hami molo siat pangidoan tu jolo ni raja i, ua hupasada hami ma i sude pangidoan ni raja i. Hupasada hami ma i gabe ringgit sitio soara; jala molo tung siat pangidoan nami rajanami, saulak mangelekkon ma hami, sitombol rambu pinudun, jala ulaon sadari ma nian rajanami. I ma jolo elek-eleknami tu hamu sude raja ni hula-hula nami. Hupasahat hami ma tu raja i. Botima!

Raja Hata ni Parboru:
Di hamu raja ni pamoruonnami, andorang so hualusi hami pangidoan muna i, loas hamu ma jolo asa hupasangap hami raja ni hula-hula/tulang nami, suang songon i dohot dongan tubu, boru dohot berenami.

Di hamu raja ni hula-hula nami, hula-hula (didok margana), bona ni ari nami ….., bona tulangnami ….., tulang rorobotnami ….., tulangnami ….., hula-hula ni namarhaha-maranggi ….. (didok marsada-sada), hula-hula ni anak manjae ….. (didok marsada-sada).
Hamu do pangalapan poda dohot pasu-pasu di hami, di jolo hamu rajanami siaduon, di pudi hamu sipaimaon. Nunga tangkas rajanami dipaihut-ihut hamu panghataion nami dohot raja ni pamoruon nami marga …..! Dipangido nasida, asa sinamot nanaeng sombahononna, ima sinamot ni beremu, sitombol rambu pinudun, jala sahali mangelekkon. Hombar tusi hupangido hami panuturion sian hamu sude horong hula-hulanami, hamu ma rajanami na masiaturan. Hupasahat hami ma panghataion tu hamu.

Hula-hula ni Parboru:
Mauliate ma di hamu borunami, ala di pasangap hamu do hami tongtong. Sidohononnami sian horong hula-hula muna, ba, masipaolo-oloan ma hamu songon na nidok ni natua-tua :
Balintang ma pagabe, tumondalhon sitodoan
Arimuna ma horas jala gabe, molo dapot di hamu na ma sipaolo-oloan.
Songon i ma sian hami. Botima!

Raja Hata ni Parboru:
Malambok pusu do hami raja nami, dipanuturion muna, i pe sidok boti ma hami, mauliate.
Saonari ….., hupasahat hami ma jolo tu boru/bere nami, bahen hamu pandapotmuna taringot tu pangidoan ni pariban muna.

Sian Boru/Bere ni Suhut Parboru:
Mauliate ma di hamu hula-hulanami, na mangalehon tingki di hami mandok hata. Sidohonon nami tu hamu pariban nami, satuju ma hami di pangidoan muna sisahali mangelekkon. Alai tung tambos ma bahen hamu jala somba hamu tu hula-hulanta. Horas ma jala gabe!

Raja Hata ni Parboru:
Mauliate ma di hamu boru dohot bere nami. Alai nunga pajolohu hamu pintor menyetujui, sagari hami so setuju dope. Atik naung hona suap do hamu? (songon intermeso do i). Dihita na marhaha-maranggi, ianggo hita sisada hata do hita atehe?! Nuaeng pe, pinasahat ma jolo tu suhut sihabolonan nami. Nunga tung huigil hami nian asa tung godang dilehon pamoruonta sinamot ni borunta, alai songon i dope huroha na tarbahen nasida. I pe porlu do begeon nami pandapotmuna hasuhuton bolon nami. Pinasahat ma panghataion tu hamu!

Suhut Sihabolonan:
Mauliate ma di hamu haha/anggi doli nami. Sian mulana pe nunga tangkas hupasahat hami tu hamu, sisada anak sisada boru do hita. Molo dung setuju hamu, ba, hami pe sian hasuhutonta, ba, naung setuju do hami disi. Horas ma jala gabe! Hupasahat hami ma tu hamu. Botima.

Raja Hata ni Parboru:
Songon i ma di hamu raja ni pamoruonnami marga ….., nunga dibege hamu manang songon dia pandapot nami taringot tu elek-elek pangidoan muna i, nuaeng pe, tariashon hamu ma sinamot sisombahonon muna tu hami, alai andorang so ditariashon hamu, anggo panandaion tu si jalo jambar na gok, na ingkon tong do pasahatonmuna, i ma suhi ni ampang na opat padohot ompu suhut dohot ompu bao, suang songon i upa parorot tu namboruna. Hupasahat hami ma tu hamu. Botima!

Raja Hata ni Paranak:
Mauliate ma rajanami, nunga tung malambok pusu hami mambege pandohanmuna na lambok i. Pos ma rohamuna raja nami, ianggo taringot tu panandaion tu si jalo jambar na gok songon nanidok muna i, tangkas ma pasahaton ni hasuhuton nami i annon. Rajanami, raja na bolon, andorang so hutariashon hami sinamot ni boru ni raja i, lean hamu jolo tingki di hami namardongan tubu, boru/bere, tarlumobi ma di hula-hula dohot tulang nami, asa hupangido hami jolo paniroion dohot panuturion sian sude na huparsangapi hami.

Songon i ma di hamu hula-hulanami ….. (didok margana), bona ni arinami ….., bona tulangnami ….., tulang rorobotnami ….., tulangnami ….., hula-hula na martinodohon ….. (didok marsada-sada), hula-hula ni anak manjae ….. (didok marsada-sada)

Raja nami, di jolo hamu si eahan, dipudi hamu si paimaon, hamu do mataniari binsar di hami, nunga tangkas pangidoannami tu jolo ni raja i marga ….., asa sisahali mangelekkon ma hami di sinamot ni boru ni raja i. I pe, rajanami sude ma hamu na hupandohi hami, asa tutur-tuturi hamu hami, hamu ma na masiaturan raja nami. Hupasahat hami ma tu hamu. Botima!

Hula-hula/Tulang ni Paranak:
Di hamu raja ni borunami marga ….., mauliate ma ala tongtong do dipasangap hamu hami. Ianggo sidohonon nami, ba, masiolo-oloan ma hamu, sipanolopi ma hami di angka nauli na denggan. Botima.

Raja Hata ni Paranak:
Mauliate ma di hamu sude hula-hula/tulang nami, naung sude ma hamu hupandoki hami, dihata panuturion naung pinasahat muna i, sude ma hamu nahupandoki hami, tung malambok pusu do hami di hata panuturion naung pinasahat muna i, sahali nari, hupasahat hami mauliate ma di hamu. Botima!

Di hita namardongan tubu dohot boru/berenami, ianggo hita sisada hata ma hita atehe! Songon i ma di hamu raja ni hula-hula nami marga ….., Rajanami, songon naung ni oloan muna pangidoannami, asa sisahali mangelekkon ma hami, di sinamot ni boru ni raja i, ba, nuaeng pe tangkas ma tariashonon nami, ia na tarpasahat hami raja nami sinamot ni boru ni raja i, ima ………. rupiah (didok godang ni sinamot) sitombol rambu pinudun, asing ni panandaion tu sijalo jambar na gok, i ma suhi ni ampang na opat padohot ompu suhut, ompu bao, dohot upa parorot tu namboruna, gabe pitu amplop ma i tulang sipasahaton nami songon panandaion. Horas ma jala gabe. Botima!

Raja Hata ni Parboru:
Gabe ma jala horas! Pasahat hamu ma tu suhut sihabolonan nami, alai jolo patuduhon hamu jolo tuson.

Borhat ma suhut paranak mandapothon suhut parboru, laho pasahathon sinamot, alai jolo dipatuduhon do i tu raja hata ni parboru, asa jolo dietong manang naung sintong, sesuai tu naung di hatai nangkin. Dung i, disombahon suhut paranak ma i langsung tu suhut parboru.

Raja Hata ni Parboru:
Beha nunga tingkos dijalo hamu suhut bolon nami sinamot ni borunta i? Molo dung denggan, mauliate ma! Ihut tusi amangboru, pasahat hamu ma panandaion, ima :
1. tu sijalo bara, ima …..
2. tu si mandokhon
3. tu tulang/hula-hula, raja i …..
4. tu pariban,
5. tu todoan, ima …..
6. tu namboruna
7. tu ompungna (ompung bao dohot ompung suhut)

Nuaeng, di hamu hasuhuton parboru dohot paranak, rap borhat ma hamu di nalaho pasahathon jambar ni haha ni parhundul nami, i ma sijalo tintin marangkup.
Dung dipasada na sian paranak dohot sian parboru gabe sada amplop, parboru ma ianggo apala na pasahathon langsung tu tangan ni sijalo tintin marangkup. Hatana: Di hamu haha ni parhundul, sisada boru nama hita. Dison, tajalo do sinamot ni borunta, apala godang hupasahat hami tu hamu, las ma rohamuna manjalosa. Botima!
Dung sahat sinamot dohot angka parjambaran na hombar tusi, dipasahat ma jambar pinggan panganan tu sude parboru dohot na ginokkonna.

Dung simpul sudena i …..

Raja Hata ni Parboru:
Mauliate ma di hamu raja ni pamoruonnami marga ….., ala nunga sahat sinamot dohot angka panandaion dohot pinggan panganan, hupasahat hami ma mauliate tu hamu.
Asa dos nangkokna dohot tuatna, atik tung adong nanaeng sipangidoon muna sian hami, rade do hami hula-hulamuna pasahathon intap ni natarbahen hami, on pe hupasahat hami ma tu hamu!

Raja Hata ni Paranak:
Mauliate ma tulang, tung diboto hamu do na dibagasan roha nami i, so hupangido hami dope, pintor diadu hamu do. Mansai masihol do hami raja nami asa tung sude ma hami ulosi hamu marhite ulos herbang. I ma pangidoannami tu jolo ni raja i. Botima!

Raja Hata ni Parboru:
Pos rohamu amangboru, sude do hamu ulosan nami, jala Tuhanta ma na manahophon pasu-pasu i tu hamu. Alai molo tung so sude pe hamu mandapot ulos herbang, dapotan ma di ulos-ulos tinonun sadari. Anggo apala sadari on ulos herbang na tarpasahat hami tu hamu holan 17 lembar do. I pe halashon hamu ma i.

Raja Hata ni Paranak:
Mauliate ma raja nami, huhalashon hami ma i!

Raja Hata ni Parboru:
Antong mangarade ma hamu, jala goari hamu ma angka ise si ulosan.

Raja Hata ni Paranak:
Pasahat hamu ma rajanami :
1. Ulos pansamot tu natoras ni pangoli (na pasahathon natoras ni na muli)
2. Ulos hela/mandar hela tu pengantin (na pasahathon natoras ni na muli)
3. Ulos tu pamarai (na pasahathon ima sijalo bara ni parboru)
4. Ulos tu si hunti ampang (na pasahathon ima sijalo upa pariban ni na muli)
5. Ulos tu todoan/anak manjae dohot satorusna
6. Ulos tu simandokkon, ulos tu haha-anggi, ulos tu boru, ulos tu bere, dohot satorusna, parpudi ulos tu Punguan/parsadaan ni ompu.
Dung simpul na pasahat ulos herbang, dipasahat ma muse ulos tinonun sadari, ima hepeng dibagasan amplop.

Raja Hata ni Paranak:
Mauliate ma raja nami, nunga tung malambok pusu hami di sude hata pasu-pasu dohot ulos herbang naung pinasahat muna tu hami. I pe sai mangulosi badan mangulosi tondi ma i, Tuhanta ma na pasauthon i tu hami sude pamoruon muna. Gabe ma jala horas.

Raja Hata ni Parboru:
Nuaeng pe suru hamu ma hela dohot borunami, tu jolo on asa hupasahat hami ulos panggabei dohot holong tu nasida.
Parjolo pasahathon ulos holong sian nasumolhot, sahat tu angka boru, bere dohot na manghaholongi boru nami dison.
Dung simpul pasahat ulos sian parboru na mardongan tubu, boru, bere dohot angka na manghaholongi, sahat ma muse tu horong hula-hula, tulang ni parboru.
Rajanami, hamu sude horong ni hula-hula/tulang nami na huparsangapi hami, atik tung adong rajanami nanaeng pasahatonmuna tu beremuna dison, saonari hulehon hami ma tingki di hamu. Hamu ma rajanami na masiaturan. Molo tung parjolo ba, gabe partogi ma i, molo tung parpudi, ba, gabe pargomgom ma i. Alai didok rohanami, ianggo apala hula-hula nami raja i ….. (didok marga ni hula-hula tangkas ni parboru), nasida ma nian pargomgom. Hupasahat hami ma tu hamu. Botima!
Dung sidung hula-hula ni parboru pasahat ulos …..

Raja Hata ni Parboru:
Mauliate ma raja nami, di sude hamu hula-hula nami naung pasahathon ulos herbang tu bere muna. Anggiat ma tutu, songon pasu-pasu muna i, gabe sada ripe na denggan ripe sitiruon nasida di parrumatanggaon nasida. Sahat ma na uli sahat ma na denggan, mauliate ma di hamu. Botima!
Di hamu raja ni pamoruon nami marga ….., ala nunga sidung sian hami, hupasahat hami ma tu hamu.

Raja Hata ni Paranak:
Mauliate ma rajanami, dohot disude angka hulahula ni hulahula nami, pariban nami, maradu sude ma hamu naung pasahathon pasu-pasu dohot ulos holong tu hami, tarlumobi tu anak dohot parumaen nami. Sai dijangkon badan dijangkon tondi ma i sude pasu-pasu muna i. Mauliate ma raja nami!

Di hamu raja ni hula-hula nami ….. (jojor didok sian hulahula tangkas, bona ni ari, bona tulang, tulang rorobot, tulang, hulahula ni namartinodohon, hulahula ni anak manjae) atik tung adong raja nami nanaeng sipasahaton muna tu bere muna di tingki on, hupasahat hami ma tu hamu. Hamu ma na masiaturan raja nami. Botima!

Pasahathon ulos hula-hula/tulang ni paranak rap dohot sude uduran nasida.

Raja Hata ni Paranak:
Mandok mauliate na so hasuhatan ma hami tu hamu sude horong hulahula dohot tulang nami maradu sude dohot rombongan muna, naung pasahathon ulos holong tu anak dohot parumaen nami. Sai Tuhanta ma na mansahophon pasu-pasu muna tulang tu pardagingon tarlumobi tu partondion ni bere muna. Horas ma jala gabe. Botima!

Dung simpul na pasahat ulos holong, mulak ma pengantin tu hundulanna, ditorushon raja hata ni paranakma.
Songon i ma di hamu raja ni hulahula nami marga ….., ala nunga simpul na pasahat ulos holong, sian angka hula-hula/tulang nami, nuaeng pe, hupasahat hami ma muse tu hamu. Botima!


“MARHATA GABE-GABE”

Raja Hata ni Parboru:
Horas ma jala gabe, nuaeng pe sahat ma hita tu namarhata gabe-gabe. Didok rohanami, sian hami ma parjolo pasahathon angka hata na uli hata na denggan tu hamu sude raja ni pamoruon nami, na mangampu ma hamu annon di angka pasu-pasu na hupasahat hami tu hamu, nunga uli rohamu songon i? Mauliate ma!

Di hita na mardongan tubu, boru/bere, tarlumobi ma dihamu sude horong hulahula/tulang nami. Hita ma parjolo pasahathon hata na uli hata na denggan tu pamoruonta. Didok rohangku tarsongon on ma: parjolo ma sian horong hula-hula/tulangta, asa tong ta ampu hata nasida; dung i tu boru/berema; dung i tu hita na mardongan tubu ma. I pe asa pinasahat tu suhut paidua, jala nasida ma annon paampuhon tu suhut sihabolonan.
Ala mamereng tu tingki :
Sada silompa gadong ma, Dua silompa ubi
Tung sahalak pe na mandok hata, Sude ma naung pasahat hata na uli

Hupasahat hami ma parjolo tu hula-hula nami!

Sian Hula-hula ni Parboru:
Mauliate ma di hamu raja ni boru nami, na tongtong pasangaphon hami dison. Ndang pola ganjang be dohonon nami. Mauliate ma di Debata na mangalehon tingki na denggan on tu hita, boi hita marlas ni roha mangulahon sude ulaonta apala sadarion, sonang so haribo-riboan. Sai hasangapon ma i di Tuhanta, jala tau las ni roha dohot tua ma i di hita. Tu berenami, dohononnami do: Sai gabe ripe na denggan ma hamu, sioloi Debata, asa dapot hamu pasu-pasu sian Ibana. Songon nidok ni natua-tua ma dohonon :
Tubuan laklak, tubuan sikkoru, Di dolok ni purba tua
Tubuan anak ma hamu tubuan boru, Dongan muna sarimatua
Horas ma ja gabe!

Sian Boru/Bere:
Tapuji ma Tuhanta, ala dipatiur do sude ulaonta apala sadarion, mauliate ma di hamu pariban nami marga ….., ala dapot do antong na masiantusan jala na masipaolo-oloan di panghataion, gabe boi marujung dibagasan dame dohot las ni roha.

Sian Haha/Anggi Doli: ….. dohot satorusna
Sian Suhut Sipaidua: ….. dohot satorusna

Sian Suhut Sihabolonan:
Parjolo hami mandok mauliate tu Debata, ala asi dohot holong ni rohana do na mangaramoti hita disude ulaonta apala sadarion, boi martopi dibagasan dame dohot holong ni roha.
Mauliate sabalga-balgana do pasahatonku tu hamu sude hahaanggiku, boruku, bereku, dongan sahuta, pariban dohot sude raja naginokkon. Tarlumobi muse ma di hamu na huparsangapi hami, hulahulaku ….. (dohot satorusna ganup digoari marga ni horong hulahula/tulang sude), disude pambahenan muna, tung na so tarbalos hami do i. Anggiat ma Tuhanta na mambalos sude nasa pambahenan muna na denggan i, marlipat ganda pasua-pasuNa tu hamu. Songon i ma jolo na boi hupasahat tu hamu apala ditingkion, sahali nari mauliate ma!

Suang songon i ma di hamu pamoruon nami marga ….., mauliate ma di hamu, siala sude pangantusion dohot kerjasama na mansai denggan, gabe boi marujung ulaonta dibagasan las ni roha. Molo tung adong na hurang lobi, ba masiantusan jala masimaafan ma hita disi. Songon nidok ni umpasa ma dohononku :
Bona ni aek puli di atas ni sitapongan
Saut ma hita dapotan uli, ala dapot do di hita na masipaolo-oloan
Botima!

Khusus tu helakku dohot borungku:
Burju-burju ma ho inang manubut roha ni simatuam, unang be sai ingot songon na di jolo nami i, ingkon malo maho pamasukkon dirim tu keluarga ni hela on. Sai barita na denggan ma begeon nami di parsaripeon muna. Asa songon nidok ni natua-tua ma dohonon :
Dangka ni arirang, Na peak ditonga onan
Bandanmuna ma na so olo sirang, Tondimuna ma masigomgoman
Sai dipasu-pasu Tuhanta ma hamu disude parngoluan muna, horas ma jala gabe. Botima!

Raja Hata ni Parboru:
Songon ima di hamu raja ni pamoruon nami marga ….., nunga marliat-liat hami pasahathon pasu-pasu hata na uli hata na denggan. Ampuma di sambubumu, tuak ma i diabaramu :
Naung sampulu pitu, Jumani sampuluwalu
Sude hata pasu-pasuan, Ampu hamu ma i martonga ni jabu
Nuaeng pe, hupasahat hami ma panghataion tu hamu, di na mangampu sude angka hata na uli hata na denggan dohot hata pasu-pasu, hupasahat hami ma tu hamu. Botima!

Raja Hata ni Paranak:
Gabe ma jala horas rajanami! Nunga tung malambok pusu hami mambege huhut manjalo sude hata na uli hata pasu-pasuan naung pinasahat ni angka amanta raja. Ba, songon nidok ni umpasa ma dohonon .
Meat ma ambaroba, Di dangka ni situlan
Hata ni hamu hulahula, Di jangkon tondima i, dijangkon badan
asa …..
Naung sampulupitu, Jumani sampuluwalu
Hata pasu-pasu naung pinasahat muna, Ampuon nami ma i martonga ni jabu

Di hita na mardongan tubu, sahat ma hita tu panghataion. Na mangampu ma hita di sude pasu-pasuan naung pinasahat ni raja ni hulahulanta. Didok roha, parjolo ma pinasahat tu horong ni tulang dohot hula-hulanta, rap taampu ma annon nang angka hata na uli hata pasu-pasuan sian nasida. On pe, di hamu tulang nami, hulahula nami, sude ma hamuna hupandoki hami, hamu ma raja nami na masiaturan di na pasahathon hata angka na uli hata na denggan hata pasu-pasuan tu hami boru muna, tarlobi tu bere muna na manjalo pasu-pasu parbagason apala sadarion. Hupasahat hami ma tu hamu. Botima!

Tulang/Hula-hula ni Paranak: ….. dohot satorusna
Haha/Anggidoli ni Paranak: ….. dohot satorusna
Boru/Bere ni Paranak: ….. dohot satorusna.

Hasuhuton Bolon:
Di hamu haha-anggi, boru, bere, pariban, ale-ale, dongansahuta dohot sude raja na ginokkon. Tarlumobi ma di hamu sude na huparsangapi hami, tulang dohot hulahula nami. Mauliate na so hasuhatan ma hupasahat hami tu hamu! Tarlobi di dongantubu, boru dohot bere, anggo so ala ni hamu tung na so lolo do ulaonta on. I pe sai ganjang ma umur muna, jala tongtong sisada urdot hita di sasude angka siulaonta. Tuhanta ma na mambalos sude angka na uli naung binahen muna tu hami. Sidohon nami, asa rap dope hita annon tu bagasta, laho pasahathon angka poda tu anak dohot parumaenta.

Di hamu raja ni hulahula nami marga ….., tung malambok pusu do ahu manaksihon apala sadari on, disasude uli ni lagu muna, dohot holong naung pinatuduhon muna tu hami gelleng muna. Sai Tuhanta ma na mandongani huhut mamasu-masu hita saluhut, anggiat boi dope tarpatupa hita angka ulaon holong ni roha songon on tu angka ari na mangihut dope. Sahali nari hupasahat mauliate godang ma di hamu sude hulahula nami. Botima!
On pe amang dohot di parumaen, ampu hamu ma jala dok hamu mauliate tu sude na dison na manghaholongi hita. Ampu damangma!
Pengantin mangampu…..

Raja Hata ni Paranak:
Songon i ma rajanami, pangampuon na boi tarpasahat hami tingki on, na hurang lobi raja nami, marpanganju ma hamu. Songon panimpuli ni pangampuon dohonon ma songon na nidok ni natua-tua :
Aek marjullak-jullak, Marjullak-jullak sian batu
Jullak-julllakna i tinahu tu tabu-tabu, Hata pasu-pasuan naung pinasahat muna
Huampu hami ma i martonga ni jabu

Turtur ma ninna anduhur, Tio-tio ma ninna lote
Hata pasuanmuna rajanami, Sai unang muba, sai unang mose

Sahat-sahat ni solu, Sahat tu bontean
Nunga sahat ulaonta on mardalan dohot denggan
Sai sahat ma hita sude tu parhorasan, sahat tu panggabean.
Horas ma jala gabe!
Hupasahat hami ma tu hamu raja nami, di na manutup ulaonta on. Botima!

Raja Hata ni Parboru:
Mauliate ma di hamu raja ni pamoruon nami marga ….., di na manimpuli ulaonta tarsongon on ma didok roha nami.
Jolo pasahat hamu ma olop-olop tuson!
Annon pe anggo na mambagi dung jolo tatutup marhite ende huria dohot tangiang.
Di nalaho manutup ulaonta, pinangido ma tu amanta St. …..

Dung sidung marende dohot martangiang …..
Raja Hata ni Parboru:
Manghatahon olop-olop dibagasan pinggan jala diangkat.
Hamu angka na pinarsangapan na liat na lolo. Nunga be singkop ulaonta dibagasan sadarion, tadok ma mauliate tu Amanta Debata na mamasu-masu ulaon on, ai dapot do songon nidok ni umpasa :
Aek Siurukuruk, tusilanlan Aek Toba
Na metmet so marungut-ungut, na magodang pe marlas ni roha

Balintang ma pagabe tumundalhon sitadoan
Ingkon saut do hita gabe, ai nunga masiolo-oloan

Simbora gukguk, peak di atas amak
Horas ma hita apala luhut, torop ma boru torop ma dohot anak
Antong taolophon ma tolu hali: olop-olop, olop-olop, olop-olop!
(Laos dibagihon ma olop-olop i tu natorop)