ADAT MAMONGOTI BAGAS

ADAT MAMONGOTI BAGAS


Mamongoti na marharoroan do i (kata dasar) sian hata “bongot” (bongot = masuk), asa molo di dok mamongoti bagas lapatanna mamasuhi jabu (bagas). Di halak batak adong dua macam adat mamasuhi jabu, ima “manuruk jabu” dohot “mangompoi jabu”. Na dua ulaon i hampir sarupa do adat na, alai molo sian balga ni ulaon umbalga ma ulaon “mangompoi” sian ulaon “manuruk jabu”. Somalna di ulaon mangompoi jabu sigagat duhut ma di buat (di seat) alai molo ulaon manuruk jabu, na marmiak-miak do dibahen tu si.
Didok angka natuatua molo di omppoi do sada bagas, tung na so boi be morot (di gadis) jabu i salelengna ingkon hot ma i di nasida sahat tu pomparanna gabe jabu parsattian.

Di tano parserahan on (isarana di Jabodetabek) ndang pola hea be didok mangompoi manang manuruk jabu molo adong ulaon mamasuhi jabu, alai didok ma dohot hata na uli begeon “mamongoti bagas”. Ai na mandok mauliate do suhut i tu Debata ala nunga bolas boi di pature bagas nasida i uli jala denggan berengon, huhut mangido tangiang asa tongtong marhahipason nasida mangingani bagas na pinauli na i. Partording manang rumang ni ulaon i pe ndang pola songon bidang ni ulaon mangompoi manang manuruk jabu. Di gokhon suhut ma sian horong dalihan natolu i, ima horong ni dongan tubu, dongan sahuta, boru, hulahula, tulang dohot pariban. Ulaon i pe di pungka ma di parnakkok ni mata ni ari (+ pkl.10.00) asa nangkok panggabean dohot parhorasan tu joloan ni ari.

Uduran ni hulahula dohot tulang mamboan boras si pir ni tondi huhut mamboan dengke na mokmok pasahatonna tu suhut i huhut mamboan ulos. Dongan tubu, dongan sahuta dohot boru tumpak ma pasahaton na tu suhut i.

Ditingki manghatai, dongan sahuta ma manungkun sintuhu ni ulaon, jala paidua ni suhut ma na mangalusi. Alai gabe jot-jotan do hulahula gabe panungkun di sintuhu ni ulaon (gabe hira panghataion di ulaon unjuk), nda sala do i ?, asa molo pe ndang sian dongan sahuta songon panungkun tumingkos ma antong molo sian dongan tubu na manungkun sintuhu ni ulaon i, ido natingkos.

Partording ni ulaon mamongoti bagas,

1. Manjalo angka tutur na ginokhon,

Sude tutur na ginokhon ni suhut (uduran ni hulahula dohot uduran ni tulang) molo dung sahat nasida ndang manigor masuk i tu bagasan jabu, jolo himpu ma jolo nasida di alaman paima ro jou-jou sian hasuhuton. Alai anggo dongan tubu, dongan sahuta dohot boru boi ma nasida langsung tu hundulan na pinarade ni suhut i.
Asa dung dapot tingkina laos nunga sahat be sude angka na ginokhon ni suhut lumobi ma uduran ni hulahula dohot uduran ni tulang, mamungka hata ma paidua ni suhut :
Santabi ma di hamu na huparsangapi hami raja ni dongan sahuta, raja ni dongan tubu, raja ni boru, lumobi ma di raja i hulahula nami suang songon i dohot tulang nami, on ma tingki dohot ombas na naeng pungka on ta ma ulaon on, nuaeng pe dihamu hulahula nami suang songon i dohot tulang nami, bongot ma hamu raja nami nunga rade hami manjalo haroro ni rajai dohot angka nantulang nami.
Di tingki manjalo hulahula dohot tulang, andorang so hundul dope nasida jolo di jomput ma boras napir tu simanjujung ni suhut i dohot tu sude iananghonna (didok ma hatana : horas jala pir ma tondim hela dohot ho inang borungku dohot angka pahompungku mangingani si baganding tuamon di dongani asi dohot holong nasian Amanta Debata) laos di pirpirhon dompak ginjang tolu hali huhut didok : horas, horas, horas. Dung i hundul ma muse na sida.

2. Pasahat tudutudu ni sipanganon dohot dengke,

Hata sian paidua ni suhut,
Mauliate ma hudok hami tu Debata marhahipason do hamu sude na huparsangapi hami dohot inanta soripada bolas sahat tu inganan on. Nuaeng pe naeng pungka on ta ma ulaon on, pangidoan nami di hamu hulahula nami dohot tulang nami mangarade ma hamu asa ro hami pasahat tudutudu ni sipanganon tu adopan muna.

Hata sian hulahula,
Mauliate ma raja ni boru, asa nuaeng pe di hita horong ni hulahula lumobi ma di hamu haha parhundul dos ma rohanta manjalo hata ni pamoruonta didok rohanami dumenggan ma molo haha parhundul na manjalo.

Hata sian Tulang,
Gabe ma jala na horas, laos mauliate ma di hata ni anggi parhundul, ndang tingkos molo tu adopan nami tudutudu ni sipanganon sian pamoruonta, nunga uli rohanami hamu ma namanjalo, boti pe songon i na rap manjalo do hita disi, di jalo anggi parhundul ma.

Hata sian Hulahula,
Mauliate di haha parhundul, ba molo nunga songon i pandok muna nauli ma, ba molo tung pe tu adopan nami ba na rap manjalo ma hita di si. I pe dihamu pamoruon nunga rade hami, Botima !

Suhut pasahat tudutudu ni sipangonon tu adopan ni hulahula.
(didok ma hata na pasahat tudutudu ni sipanganon i)

Dung sahat tudutudu ni sipanganon, hata sian hulahula,
Nuaeng pe di hamu boru nami tong ma mangarade hamu asa hupasahat hami dengke na huboan hami tu hamu.

Paidua ni suhut mangalusi,
Na uli ma raja nami, nunga mangarade hami borumuna, pasahat hamu ma.

Hulahula pasahat dengke. (didok ma hata ni na pasahat dengke i)
Laos udut ma muse di pasahat ulos tu suhut i.

Sidung hulahula pasahat dengke dohot ulos, uduran ni Tulang ma muse pasahat dengke.
(didok ma hata ni na pasahat dengke i)
Laos udut ma muse di pasahat ulos molo adong do diboan nasida.

3. Marsipanganon,

Dung sidung hulahula dohot Tulang pasahat dengke dohot ulos, di uduti ma muse marsipa-nganon. (di pangido ma sahalak martangiang sian horong ni suhut).

4. Dung sidung marsipanganon (marbagi parjambaran),

Hata sian paidua ni suhut,
Santabi godang ma di hita sude amanta raja suang songon i inanta soripada, lumobi ma dihamu raja i hulahula nami dohot tulang nami, ala naung simpul hita marsipanganon, laos hombar tu tingki ta uduti ma ulaonta raja nami.

Hata sian hulahula,
Ima tutu di hamu parboruon, nangkin dipasahat hamu tu adopan nami tudutudu ni sipa-nganon, nuaeng pe raja ni boru asa uli di hamu denggan di sude naginokhon muna, hu pasahat hami ma muse tudutudu ni sipanganon on tu hamu asa boi pasahaton muna tu angka hasahatan na hombar tu adat ta i. Alai tahe mangalap hata hami tu haha ni parhundul, boha di roha muna haha ni parhundul nda denggan do songon i ?

Hata sian Tulang,
Gabe ma jala horas, nunga nauli pandohan ni anggi parhundul i, denggan ma di pature raja ni pamoruon.

Hata sian paidua ni suhut,
Ima tutu raja nami dohot di tulang nami, na uli jala na sintong ma i. Nuaeng pe dihita na mardongan tubu, lumobi di raja ni dongan sahuta, nunga dipasahat hulahula dohot tulang tu hita taringot di tudutudu ni sipanganon, asa tingkos tutu sai jolo diseat hata ma ipe asa diseat raut, mangido ma hami panuturion sian dongantubu, lumobi sian hamu dongan sahuta hombar tu adat na masa di luat on.

Hata sian dongan sahuta,
Mauliate ma amang suhut nami, na tingkos jala nauli do pandohan muna i, asa nuaeng pe taringot na marbagi parjambaran, pos do roha nami siboto adat siboto uhum do hamu, jala angka na hombar di parbagi ni parjambaran nunga tung tangkas i diboto hamu hombar tu bidang ni gokhon muna, bahen hamu ma na uli i. Boti ma !

Hata sian paidua ni suhut,
Antong molo songon i, mauliate ma ! molo dos rohanta di dok roha nami songon on ma parbagi na. (di goari ma parbagi na sada-sada)
- Osang : jambar ni Hulahula
- Namarngingi : jambar ni Tulang
- Soit : jambar ni dongan tubu (di ganupi mar ompu-ompu)
- Soit : jambar ni dongan sahuta
- Soit : jambar ni pariban
- Soit : jambar ni pangalambung i (molo adong ale-ale di si)
- Parsanggulan : jambar ni boru
- Ihur-ihur : di suhut dohot haha anggi na.

5. Dung sidung marbagi jambar ( dipungka ma manghata i ),

Manungkun ma raja ni dongan sahuta ni hasuhuton manang dongan tubu (anggi doli manang haha doli), paidua ni suhut ma mangalusi. (songon hatorangan na di ginjang i).

Panungkun,
Manghatai ma hita suhut nami, “Gokhon si paima on, joujou si alusan ; manggohi dohot mangalusi gokhon dohot joujou muna, sahat iba di tonga ni bagas na marampang na marjual on si gomgom nasa pangisi na, bagas pangantaran ni anak pangantaran ni boru, huhut panjaloan sangap dohot tua lumobi pasupasu sian Debata, dohot hundul dikursi na uli ganti ni amak tiar, ba sai uli dohot tiar ma tutu panggabean dohot parhorasan di hita tujoloan sa on tumpahon ni Amanta Debata, nunga bosur iba huhut mangan indahan na las na pinarade muna, sagat huhut marlompan juhut na marsaudara, sombu uas marhite aek sitiotio” on pe amang suhut nami, songon ni dok ni si jolojolo tubu i, sai jolo ni nangnang do asa ni nungnung, sai jolo pinangan do ipe asa sinungkun. Ba nuaeng pe, amang suhut nami, na manungkun ma hami taringot di hata ni si panganon i, dia ma mata na, dia ma halto na ; asa dia ma hata na, aha ni dok na ; haroan na uli tung tangkas ma di paboa suhut nami, Botima !

Mangalusi,
“Gabe ma hita jala na horas tumpahon ni Amanta Debata. Ba nunga manungkun Hahadoli / Anggidoli dihata dohot lapatan ni sipanganon na sosadia i, sai pamurnas ma i tu pamatangta, saudara tu bohi sipasindak panaili ma i, sipaneang holiholi. Sai ma masumasu ma Tuhanta lam di tambai dihami hagabeon dohot panamotan tu joloan sa on, asa boi dope nian patupa on nami sipanganon na gumodang jala na tumabo. Ia taringot di sungkun muna i, taringot di hata ni sipanganon i dohot haroan na, ba sipanganon panggabean parhorasan do lapatan na”. Boti ma hahadoli / Anggidoli !

Panungkun,
“Mauliate ma, ba molo songon i do hape ba na uli ma i tutu, sai asi ma roha ni Tuhanta pardenggan basa i, sai ditambai dope pasupasu na di hamu tu joloan sa on tamba ni naung adong i. Asa bagot na marhalto na tubu di robean, ba sai horas ma namanganton, sai lam tu ganda na di hamu na mangalean”.
Alai ale amang suhut, sai marangkup do nauli, mardongan do nadenggan. Nuaeng pe tangkas ma hatahon hamu siangkup na songon na hundul, si dongan na songan na mardalan, asa tung torang huboto hami, ba tung tangkas ma dihatahon suhut nami. Boti ma !

Mangalusi,
“Ido tutu amang, toho ma na nidok muna i, sai marangkup do na uli, mardongan do na denggan, jadi nuaeng pe paboaon ma tutu siangkup na songon na hundul sidongan na songon na mardalan. Adong do hata na mandok :
Mardangka bulung bira, Martampuk bulung tabu ;
Sonang ma roha niba, molo nunga tipak iba marjabu.
I ma na manggohi roha ni keluarga dibagas on (suhut ta) na saleleng on jumpang ma na ni luluan dapot na jinalahan na ai bolas do di pauli nasida bagas sibaganding tua on marhite pangurupion na sian Tuhanta, songon hata na mandok :
Tolap do ibana sian Sibuluan, mardalan tu Tampahan ;
Dapotsa do na niluluan, jumpang do na jinalahan.
Asa i ma dalanna umbahen hundul hita nuaeng di tonga ni jabu na pinauli na on, jala nunga di bongoti nasida bagas on. Di poda ni natuatua, adong pe jabu ianggo so na marpahala do jabu i ndang denggan bongotan i, ai adong do sipasingot na mandok :
Labu pe labu i, ndang asal suanhononhon,
Jabu pe jabu i, ndang asal inganhononhon.
Jadi i ma amang, alana umbahen na jinou hamu angka dongantubu, dongan sahuta, hulahula, tulang, boru, dohot iananghon, ro di angka aleale, asa rap hita antong martangiang mangido tu Amanta Debata, asa gabe jabu namarpahala on, jala asa horas jala hipas keluarga on mangingani bagas on. Boti ma da amang !

Panungkun,
“Ba molo i do hape amang suhut nami lapatan ni parpunguan ta on, na uli ma i tutu jala na denggan. Toho do i tutu suhut nami, na nidok muna i, naeng ma jabu na marpahala bagas niba i. Antong sipabereng-berengon jala jabu na hinalomohon ni angka dongan sahuta dohot sisolhot ma jabunta on. Sai dapot ma songon hata ni umpasa :
Mabaor aek puli, Sian tano ni Simamora,
Hot ma jabunta on bagas na uli, Inganan marlas ni roha.
On pe suhut nami, sai manumpak ma amanta Pardenggan Basa i, sai diramoti ma tongtong jabunta on, asa sai hot bagasta on di batuna, togu di rangsangrangsang na jala momos di pangarahutna.
Dalan marbatubatu, dalan tu Simataniari ;
Sai gok ma jolma di jabu, sai gok mas ma di lamari.
Boti ma hata nami amang suhut. !

Nuaeng pe dihita saluhutna na pungu di bagas on nunga tung tangkas lapatan ni parpunguanta dohot ulaonta apala di tingki on, antong ganup ma hita pasahathon hata si gabegabe lumobi hata tangiang tu suhutta keluarga dibagas on. Molo dos rohanta di dok roha nami songon on ma partording na :

Parjolo ma hupasahat hami tu boru, dungi annon mandok hata ma sian hita na mardongan tubu, laos udut ma muse mandok hata sian dongan sahuta, di uduti ma muse sian ale-ale.
Dung i annon pinasahat tu uduran ni tulang, laos di uduti ma muse sian uduran ni hulahula.

Dung i, mangampu ma hasuhuton (parjolo ma boru ni suhut, ipe asa suhut)
(andorang so di dok suhut hata pangampuon, jolo di pasahat ma jolo angka pisopiso dohot pasituak na tonggi tu uduran ni Hulahula dohot uduran ni Tulang).

6. Pangujungi ni ulaon,

Marende dohot martangiang. (molo adong pangula ni huria di si, mansai denggan do molo nasida martangiang, jala molo sian Hulahula pe na denggan do i tongtong).

Songon i ma partording ni ulaon “mamongoti bagas”.







ADAT PARMONDINGON


Hata “monding” dipangke do i songon sada pandohan nahalus tu jolma namate manang marujung ngolu. Marharoroan sian hata (kata dasar) “onding” (onding = holip = ndang boi idaon = ndang boi donganan = gotap hubungan). Asa molo mangihuthon sian lapatan ni hata monding ingkon naung jolo ditanom (dikubur) pe namate i, ipe asa dohonon monding, ala nunga onding jala holip sian pamerengan ndang be berengon ni namangolu. Alai ala hata monding i paboahon (terkandung) naung gotap do hubungan ni namangolu tu namate dohot nungga sae ulaonna diportibion gabe i ma songon hata nahalus molo mandok “mate” tu jolma.

Adong do hea sungkun-sungkun songon on : boasa ndang didok monding Tuhan Jesus molo ditingki parningotan ari hamamate ni Tuhan Jesus ?, nda pantas ma nian dohonon monding Tuhan Jesus di Golgota songon hata halus ni mate.
Mate Tuhan Jesus di Golgota alai hehe do Ibana di ari patoluhon, ndang onding ibana sian jolma, ala ni i ndang dohonon monding Tuhan Jesus.

Marragam do parmate ni jolma dihasianganon adong do mate tingki posoposo manang tingki memet dope, adong dibagasan umur najempek jala laos adong do dibagasan umur naganjang sahat tu saurmatua maulibulung. Asa ndang boi lomo ni jolma taringot tu ngolu diportibion jala ndang boi ditolak manang isepe molo nunga tingkina tu hamatean i tung saguru dilomo ni roha ni Debata do. Alani songon halak Kristen hita tahaposeai do na hamatean i do dalan manomot surgo hasonangan i.

Mangihuthon adat dohot tradisi ni halak Batak sian angka ompu naparjolo i adong horong (kategori) ni hamamate (parmondingon) ni jolma, ima sian ukuran umur dohot parpinomparon (keturunan) andorang di ngoluna, alai ditingki naparpudion dung dibagasan hakristenon halak batak dohot hinorhon ni holong ni roha marhite ugamo i, nunga lam harhar be angka adat dohot tradisi naparjolo i ndang be sai tarihot tu pemahaman na binahen ni sijolo-jolo tubu i, domu ala laos adong hata mandok : ndang si manuk-manuk manang si bontar andora, asa ndang si todo turpuk si ahut lomo niroha. Turpuk (nasip), tohap dohot jambar ni hajolmaon suang songo i dohot umur pe Debata do umboto i. (Di tanganna siamun do ganjang ni umur, jala di hambirangna do hamoraon dohot hamuliaon. Poda sian Raja Salomo 3 : 16).

1. Mate di bortian, ima mate andorang di bortian dope manang di tingki parsorangna. Molo na songon i pintor hatop do i di tanom.
2. Mate posoposo, ima posoposo namate ndang gok dope sataon umurna.
3. Mate dakdanak dohot mate bulung, dakdanak na mate marumur sataon sahat tu umur remaja didok ma i “mate dakdanak”, na mate umur remaja sahat tu na magodang ndang hot ripe dope didok ma i “mate bulung”.
Tu angka horong na di ginjang i (1-3) ndang adong adat dipatupa tusi, ia molo sanga dope di bagasan ari i do i di taruhon tu udean sopola ingkon marborngin. Ndang sibahenon bangke ni na mate si songoni tu alaman, ingkon langsung doi diboan sian jabu tu udean. Dibahen pe aturan - aturan i marlapan do i asa panjoraan ma na masa na songon i tu joloan ni ari. Jala asa marhasurungan ma antong angka na mate saurmatua na maulibulung.
4. Mate purpur, ima marujung ngolu naung hot ripe alai ndang mardakdanak.
5. Mate punu, ima marujung ngolu naung hot ripe singkop do marboru, alai ndang maranak baoa, marbulung do nian tu ginjang alai ndang marurat tu toru manguduti goarna.
6. Mate mangkar manang sapsap mardum, ima marujung ngolu nunga maranak-marboru alai manek-menek do pe iananghonna di tinggalhon sodiboto dope mangalului hangoluan di portibion suang songoni hangoluan sogot ndang diboto dope mangalompa, tung siradotan dope sude iananghonna i. Molo ama do na mate, didok ma tu ina na manghabulon i “ponggol ulu” manang “matipul ulu”, molo ina do na mate, didok ma tu ama na manghabaluhon i “matompas tataring”. Pandohan na dua i na manggombarhon parngoluon na gotap di tongan dalan.
7. Mate sari matua, ima marujung ngolu singkop maranak-marboru jala nunga marpahompu, alai adong dope si sarihononna (adong dope iananghonna na so marhasohotan), ai tongtong do pe di sarihon ibana iananghonna i sahat ro di nalaho mate i ibana. Mardalan ma adat tu na mate sari matua.
8. Mate saur matua, ima marujung ngolu singkop maranak-marboru nunga sude marhasohotan (simpan) iananghonna jala nunga marpahompu. Mardalan ma adat saur matua tu si.

9. Mate mauli bulung, ima marujung ngolu singkop sude anak dohot boru na hot ripe huhut maranak-marboru, nunga marnini-marnono. Sude iananghonna, parumaenna, helana, boruna, pahompu, nini dohot nonona himpu sude pataruhon ibana tu inganan parpudi ndang adong tipul dangkana dohot rantingna.
Molo adong do sian pinomparna i naung parjolo marujung ngolu, gabe tu horong na saur matua nama i, ndang be dihorong mauli bulung. Ai tihas do molo di pataru ibana anakhon na tu udean manang pajolohon anakhonna sian natuatua na.
Horong namauli bulung i na ma natumimbo, ima na boi manjouhon / mambahen si tarahuak (sipitu dai) sian ulu ni si gagat duhut.

Rumang ni ulaon tu horong na be,

Hombar tu horong ni hamamatena, ia tu horong no.4 sahat tu no.6, ndang di pamasa adat tusi alai angka ulaon mangido tangiang ma di patupa, laos ndang pola maralaman di na laho manaruhon tu udean.
Dihorong No.7 sahat tu horong no.9, mardalan ma adat na balga, lumobi di horong saur matua dohot di horong mauli bulung.


Adong do na panangkok tingkatan horong ni na mate,

Di tingki na parpudion lumobi ditano parserahan mansai jotjot do masa panghataion ditingki marrapot ( ria raja) di namatean antara suhut - dongantubu - hulahula dohot tulang. Isarana ia horong ni namate i di horong sari matua (no.7) do, ala adong dope iananghonna si sarihononna na so marhasohotan dope. Ala nunga marpahompu jala nunga dewasa be angka anakhonna na so marhasohotan i, gabe dipangidohon suhut namatean i ma tu dongan tubuna dohot tu hulahulana asa dipanangkok tingkatan horong ni namate i sian sari matua gabe saur matua, sipata dipahalus do mandok: “mate sari matua do alai adat saur matua ma di bahen”.
Ndang apala binoto aha na nieahan ni namatean i molo tung pe di panangkok tingkatan horong ni na mate i sian sari matua gabe tu saur matua, ai so diboto namate i be manang aha dung tos hosana. Hombar tu pangidoan ni suhut namatean i, somalna sai dioloi angka raja do i, laos muba ma rumang ni adat si ulahonon tu si, ndang ulos tujung be pasahaton tu namanghabaluhon i, alai gabe ulos sampe tua ma pasahaton ni hulahulana molo tu ina, molo tu ama tulangna ma pasahathon.
Tung so adong do ni hilala manfaat na molo pe diangkat (di panangkok) tingkat horong ni namate sari matua gabe mate saur matua, dumenggan ma dibahen angka adat i hombar tu tohapna be sahat ro di hamamatena.
Ingkon manat do Hulahula manang Tulang laho mangoloi molo adong pangidoan sisongon i, ai sipata ndang haru sude mangantusi konsekwensina molo dioloi gabe nangkok tingkat horong ni na sari matua gabe saur matua.

Boasa ingkon manat laho mangoloi i?. Ai di ulaon adat ni na saur matua tontu bahenon na do ungkap hombung. Boha do bahenon ni Tulangna manjalo isi ni hombung i, hape adong dope berena manang ibeberena na so marhasohotan. Asa molo dioloi Hulahula (tulang i) sari matua gabe saur matua marlapatan do i na bertanggung jawab do tulang i di bere na i, ima :
Molo mangoli berena i gabe tulang na i nama bertanggung jawab ai nunga dijalo isi ni hombung i, ia so i adong boruna paorohononna tu bere na i. Songon i ma muse molo marhamulian bere boru / ibeberena ndang marhak be tulang i manjalo adat upa tulang sian parmulian ni ibeberena i, alana nunga dijalo tulang ulaon saur matua na mandok naung simpan sude tubu ni ibotona. Dibahen i ma tung so tarjalo do adat sari matua gabe adat saur matua.

Ulos saput, ulos tujung dohot ulos sampe tua,

1. Ulos saput tu na mate di bortian, mate posoposo, mate dakdanak dohot mate bulung, natorasna sandiri do mambahen i, molo pe dilehon tulangna ulos, digoari do i lage-lage.
2. Horong no.4 sahat tu horong no.7 mardalan ma ma ulos tu na manghabaluhon na mate i, molo tu horong no.8 dohot horong no.9 mardalan ma ulos sampe tua.
3. Tu angka pomparan ni na marujung ngolu di horong no.7 sahat tu horong no.9 boi ma di pasahat ulos holong manang ulos panggabe i sian sude horong ni hulahula dohot tulang (ima sian Hulahula, Tulang, Tulang rorobot, Hulahula ni anak manjae).
4. Molo naung mabalu hian do na monding i, ia ulos sampe tua di peakhon ma i diatas ni batang ni na monding i, dung i boru suhut ma mambuat i, na marlapatan na dohot do boru i mananggung deba harugian tu ulaon i.

Napasahat angka ulos molo Ama namonding (versi Silindung, Humbang dohot Pahae),
- Pasahat ulos saput ni na monding i : Tulangna.
- Pasahat ulos tujung tu Ina na manghabaluhon : Hulahulana.
- Ulos panggabei tu angka pomparanna : Haradeon ni Tulang & Hulahula ma i.

Napasahat angka ulos molo Ina namonding,
- Pasahat ulos saput ni na monding : Hulahulana.
- Pasahat ulos tujung tu Ama na manghabaluhon : Tulangna.
- Ulos panggabei tu angka pomparanna : Haradeon ni Tulang & Hulahula ma i.


Adat na gok,

1. Molo didok di patupa adat na gok di parmondingon, marlapatan do i ia namatei bahenonna do tu “tambak na timbo”, tano na marlampis, manuan raja ni duhut-duhut, ia so i tu batu napir marhalanguluhon (marbantal) batu marlagehon simin.
Diparserahan (isarana di Jabodetabek) ndang tarbahen be tu tambak na timbo molo marujung ngolu natuatua ala tu pemakaman umum do parbandaan nunga adong aturan tusi dibahen pamarenta. Asa holan hata pandohan nama didok tu tambak, atik pe secara fisik tanoman na biasa do. Alai ndang tertutup kemungkinan molo adong tano milik ni keluarga naboi do tong dibahen tu tambak na timbo manang simin songon na masa di bona pasogit. Nang pe so tu tambak na timbo secara fisik ala songon i ma di parserahanon, tongtong ma dohonon i na tu tambak na timbo, siala i hot do mardalan adat songon na di Bonapasogit i, adong jambar tu panambak.
2. Dibuat (diseat) do sigagat duhut (lombu sitiotio, lombu tumbur, horbo sitingko tanduk, horbo sisapang naualu manang gajah toba = horbo si 5 hae).
3. Mardalan ma parjambaran sian sigagat duhut i, hombar tu sintuhu dohot hatohoanna songon dia adat na masa di adat batak lumobi adat di na saluat i.
(hatorangan parbagi ni parjambaran ta bereng di halaman na asing).

Padalan Jambar juhut,

Di bona pasogit sai sian passa manang sian pintu ni jabu do di dabu (di sappatton) pasahat parjambaran huhut dijouhon hasahatan ni sijalo jambar i, angka horong boru ma partanggo (manalliki) jambar i asa sae padalanon tu angka raja-raja na ro. Dibahen i ma ianggo bagian raowan dohot holi-holi nalobi jambar ni partanggo ma i.
Di parserahan (isarana di Jabodetabek on) ndang tarbahen be padalan parjambaran mandabu sian passa manang sian pintu ni jabu jala ndang be di sappathon jambar i tu tano manang tu atas ni lage, denggan na ma di taruhon di atas talam manang di atas piring asa unang rotak jagal i, jala denggan jalo on ni namanjalo. Adong 3 macam teknis ni pardalan parjambaran songon naung hea ni ida di Jabodetabek:
1. Jambar mangihut, artina dung sidung mandok hata di tingki mar-acara dialaman, ihut ma di jouhon / di pasahat jambar tu nasida.
2. Parjolo di padalan parjambaran andorang so mar-acara di alaman dope.
3. Dung sidung mar-acara dialaman sae mangampu hasuhuton, di paso ma jolo acara ndang langsung di pasahat tu Huria, dungi disi ma kesempatan ni suhut padalan parjambaran i. Asa dung selesai padalan parjambaran ipe asa di uduti muse acara tu Pangula ni Huria.


Pasahat Pisopiso,

Diulaon sari matua, saur matua, dohot mauli bulung, pasahaton ma “Pisopiso” (hepeng di bagasan amplop) tu hulahula manang tulang sibahen ulos saput dohot sibahen ulos tujung manang ulos sampe tua. Tu sude tahe horong ni hulahula na ro pasahathon ulos panggabei, sian bona ni ari sahat ro di hulahula naposo tongtong ma pasahaton pisopiso tu nasida.
Ndang marbatas godang ni pisopiso i sipasahaton tu sude horong ni hulahula dohot tulang, dipahombar ma i tu haboion (kemampuan) ni suhut i, songon ni dok ni umpama :
Ndang tarjongkal piso tu hulahula ;
Ndang tardopa ulos tu boru.

Ungkap Hombung,

Hombung ima inganan panimpanan ni angka ugasan na ummarga ; hepeng, mas, ulos dohot angka abit (pangkean) dohot na asing. Ia na mangungkap hombung holan di parmonding ni ina naung marpahompu (sarimatua, saur matua, maulibulung) do i masa. Molo ama do na monding, jala mangolu do pe ina, ndang dibahen mangungkap hombung, ai ina i do sitiop hombung. Ia si ungkap hombung i, ima apala ama naposo ni ina namonding. Dipangido ama na poso ni na monding i ma manang aha lomona sian angka barang tininggalhon ni namboru na naung monding i. Asa boi do i pinahan, boi mas, dohot na asing na i. Alai ditingki naparpudion sai hepeng na ma dipasahat molo tingki mangungkap hombung.

PARTONDING NI ACARA ADAT

1. Pasada Tahi
Pasada tahi, marpungu ma Hasuhuton dohot dongan tubu dohot boru laho mambahen angka rencana na hombar si patupaon nasida tu parmondingon i, songon si hatahonon nasida tu na mar ria raja.

2. Marria Raja
Marria raja, ima acara panghataion ni unsur dalihan natolu, dongan tubu, boru, dongan sahuta, hulahula dohot tulang, laho mambahen haputusan na hombar tu parmondingon i, andigan taruhonon tu udean, angka na pasahat ulos, dohot angka na asing na hombar sipamasaon dope. Somalna di pungka panghataion i lobi hurang pkl.20.00 bodarina sahat tu na sidung.

3. Mompo
Mompo, ima acara pamasukhon na monding i tu jabu-jabu na, di ulahon ma i dung sidung Marria Raja, holan marende dohot martangiang do di si, ndang pola adong mandok hata apul-apul manang hata gabe-gabe.

4. Pasahat Ulos
Pasahat ulos, di pamasa manogot ni ari (di parnakkok ni mata ni ari), alai sipata ala ni angka partingkian boi do di patupa pasahat ulos di bodarina dung sidung mompo, laos diuduti angka hata apul-apul, hata sipaingot manang hata gabe-gabe sian sude horong.
Dibahen ma parjolo ulos saput tu na monding, di pasahat ma muse ulos tujung manang ulos sampe tua, dungi angka ulos holong manang ulos panggabei.

5. Tuat tu alaman
Andorang so di taruhon tu udean dohot andorang so mandok hata dope, jolo di papinda ma na monding i di bagasan jabu-jabuna tu alaman ni jabu (molo mangijinhon do alaman ni jabu i, alai molo so mangijinhon do hot ma di jabu bangke i, di paboa ma tu situan natorop kondisi na songon i), di atur ma parpeakna asa sude suhut lumobi pomparanna boi hundul manghaliangi bangke na bonding i.

6. Acara mandok hata laho paborhathon tu udean
Tu angka na mandok hata porlu di parate-atehon keterbatasan ni tingki, asa unang mangganggu tu tingki naung ditontuhon parborhat na tu udean.
Susunan acara di alaman :
1. Hata Huhuasi (kata pengantar) sian Paidua ni suhut
2. Manjaha riwayat hidup (jujur ngolu) sian Suhut
3. Mandok hata, sian :
a. Dongan Tubu
b. Boru / Bere
c. Ale-ale / dongan sa ulaon
d. Pemerintah setempat (RT / RW)
e. Dongan sahuta
f. Hulahula ni anak manjae
g. Hulahula ni na marhahamaranggi
h. Bona ni ari
i. Bona tulang
j. Tulang rorobot
k. Tulang
l. Hulahula
4. Mangampu, sian :
a. Utusan Punguan Marga ni Suhut
b. Suhut Bolon (parjolo sian boru ni suhut, ipe asa suhut bolon i).
Pardalan ni acara (1 – 4) di pandu Protokol sian horong ni dongan tubu, di bahen i sude horong ni na mandok hata ndang pola mambahen acara sandiri-sandiri (marende dohot martangiang), sae ma holan na mandok hata.
5. Acara Huria / Keagamaan
Dung sidung acara mandok hata (1-4), dung i di pasahat ma tu Huria mambahen acara keagamaan sahat tgu na manaruhon tu udean, inganan paradianan na parpudi.