MARTONGGO RAJA

ULAON MARTONGGO RAJA / RIA RAJA


Sada ulaon na arga jala na porlu situtu do Tonggo Raja i, molo masa ulaon horja manang adat na balga sai jolo patupaon/dipalolo suhut do tonggo raja.
Terbatas do sinurathon ulaon tonggo raja dison, ima secara khusus tu ulaon unjuk ala mansai jotjot do ulaon on masa diparserahan on.

Aha do perbedaan ni Ulaon Martonggo Raja dohot Ria Raja? Mangihuthon angka natua-tua na sinungkun taringot tu perbedaan ni pandohan na dua i, didok songon on: Molo Martonggo Raja: dihasuhuton na mangundang i ma bolahan amak di ulaon unjuk na naeng ro (baik pe nasida songon suhut paranak manang songon suhut parboru), jala molo;
Marria Raja: ndang hasuhuton i songon bolahan amak di ulaon unjuk na naeng ro. Songon i ma hatorangan na dapot, alai nang pe songon i ndang haru tangkas dope binoto dohot niantusan dia do perbedaan na sasintongna.

Tonggo Raja lapatanna: mangontang dohot manubut roha ni angka raja (ima: raja huta [dongan sahuta], raja ni dongan sabutuha, raja ni boru dohot bere, angka punguan-punguan), papunguhon nasida sude disada tingki laho paboahon dohot manungkunhon sangkap ni roha tu ulaon i dibagas ni hasuhuton.

Diparade hasuhuton do sipanganon hombar tu natahasomalhon di parserahon on, diparade do sian pinahan lobu jala disi dohot angka namargoarna (tudu-tudu ni sipanganon) ala na manonggo dohot na manubut roha ni angka amanta raja dohot ina soripada na naeng mangurupi di ulaon na naeng ro, somba tangan, elek hata, asa anggiat denggan mardalan ulaon i sude.

Somalna secara khusus di Jabotabek on, ia ulaon tonggo raja/ria raja dipasada do ari na dohot ari ni partumpolon (acara perjanjian nikah) di Gereja, jala dipatupa ma ulaon i dung jolo mulak sian Gereja. Ala ndang sude Gereja mambahen acara martumpol, ala ni i dibuhul hasuhuton ma sada ari tu na martonggo raja.

Partording ni Ulaon Tonggo Raja / Ria Raja

1. Marsipanganon
Dung marpugu sude na niontang (na niundang) suang songon i sude horong ni suhut, dipatupa ma rap marsipanganon. Andorang so martangiang jumolo ma dipasahat hasuhuton tudu-tudu ni sipanganon tu adopan ni sude raja na niontang disi rap dohot ina soripada.

Songon patamahon na diadophon tudu-tudu ni sipanganon i tu sude raja na niontang, dihaliangkon (diputar) ma inganan ni tudu-tudu ni sipanganon i tolu hali.
Dung rade sude sipanganon jala dung ditangiangkon hasuhuton, mangan ma. Dung i jongjong ma wakil ni hasuhuton manghatahon huhuasi ni sipanganon, didok ma: “Ba songon i ma da rajanami, raja ni dongan sabutuha, raja ni dongan sahuta, raja ni parboruon dohot inanta soripada”, songon nidok ni angka natua-tua.
Sititi ma si gompa,
Golang-golang pangarahutna
Ba tung songon dia pe nuaeng na tupa,
Ba sai godang ma pinasuna.
Botima!

“Ima tutu”, ninna sude na mangan i.

2. Marbagi jambar
Dung sidung mangan (andorang so manghatai dope) dipature (dibagi) ma parjambaran ima sian tudu-tudu ni sipanganon i. Laos diuduti ma muse manghatai.

3. Manghatai
Somalna tar sian angka dongan sahuta ma panungkun, ia so i sian dongan sabutuha ma (mardos ni roha ma disi).

Manungkun dongan sabutuha,
Manghatai ma hita suhut nami,
“Gokkon sipaimaon, jou-jou sialusan; ia nunga ro hami manggohi gokkon dohot jou-jou muna tu bagasta na marampang marjual on, bagas sibagandingtua panjaloan sangap dohot tua sian Tuhanta, jala nunga hundul iba di amak tiar, ba, sai tiar ma tutu panggabean parhorasan di hita tu joloansa on tumpahon ni Amanta Debata. Nunga bosur iba huhut mangan indahan na las na pinarade muna i, sagat huhut marlompan juhut na tabo i, sombu uas marhite aek sitio-tio”, onpe amang suhut nami, songon nidok ni sijolo-jolo tubu : Sai jolo ni nangnang do asa ni nungnung, Sai jolo pinangan do asa sinungkun.
Ba nuaeng pe, na manungkun ma hami dihasuton :
Dia ma matana, dia ma haltona
Dia ma hatana, dia nidokna
Botima!

Paidua ni suhut mangalusi,
“Gabe ma hita jala horas. Ba ia nunga manungkun hamu dihata dohot lapatan ni sipanganon, tung so sadia pe nuaeng na pinatupa ni suhutta ba, sai pamurnas mai tu pamatangta, saudara tu bohi, sipasindak paniali ma i, sipaneang holi-holi. Sai mamasu-masu ma Tuhanta lam ditambai dihami hagabeon dohot pansamotan tu joloansa on, asa boi dope nian patupaon nami sipanganon na gumodang jala na tumabo. Ia taringot di sungkun-sungkun muna i Hahadoli / anggidoli, taringot di hata ni sipanganon i, ba sipanganon panggabean parhorasan do lapatanna”. Boti ma hahadoli / anggidoli”.

Panungkun,
“Ba molo songon i do hape ba na uli ma i tutu, sai asi ma roha ni Tuhanta pardenggan basa i, sai ditambai dope pasu-pasu di hamu tu joloansa on.
Bagot na marhalto ma na tubu di robean
Ba sai horas ma hami na manganhon
Sai lam tamba ma dihamu na mangalean
Alai ale amang, sai marangkup do ninna na uli, mardongan do na denggan. Nuaeng pe tangkasma paboa hamu siangkupna songon na hundul, sidonganna songon na mardalan, asa tung torang huboto hami sangkap dohot tujuanna na mambahen parpunguanta on”. Botima!

Paidua ni suhut mangalusi,
“I do tutu, rajanami, toho do nanidokmunai, sai marangkup do na uli, mardongan do na denggan. Jadi nuaeng pe paboaon nami ma tangkas dia dohot aha do alana hubahen hami parpunguan on. Songon naung tangkas tarida di surat gokkon dohot jou-jou nami tu hamu, tonggo raja do parpunguanta on. Na marbonsir do i ala adong ulaon adat si patupaonta ndang pola sadia leleng nari be. Molo asi roha ni Tuhanta, jala molo so adong ambat bingkolangna be, na marsangkap do hami (dipaboa ma ulaon adat aha sibahenon i). Jadi mardomu tusi, aturanna ma i, molo adong sangkap ni roha mangula manang aha, denggan jala na patut do tahe paboaon i huhut pasungkunhononhon tu raja ni dongan sabutuha, dongan sahuta dohot tutur ulaon i. Asa na pasungkunhon ma hami parjolo tu hamu angka na pinarsangapan manang songon dia pandapot dohot pingkiranmuna taringot tu sangkap nami songon naung pinaboa nangkin. Jala molo nunga satolop hita disiulaon i, ba, na laos mangido ma hami tu hamu angka napinarsangapan, tarlobi raja ni dongan sabutuha, raja ni dongan sahuta, raja ni parboruon, asa rade nian hamu saluhutna mangalehon tingki dohot pingkiran mangurupi hami patulushon ulaon i. Ba, i ma da angka rajanami umbahen na hupatupa hami tonggo raja on”. Botima.

Panungkun,
“Hamu suhut nami, nunga torang huantusi hami hatamuna i. Ndada pola ganjang be dohonon hata. Pendek ma ni alusan: ‘Satolop ma hami disangkap muna I, jala rade do hami mangalehon tingki, nang angka pingkiran mangurupi hamu olat ni na tarbahen’. On pe ba paaboa jala rimangi haamu ma sude angka na porlu bahenonta, ima:
- andigan mata ni ulaon i
- di dia do inganan / alaman ni ulaon i
- sipatupaon tu pesta i
- hira piga halak ma torop ni siundangon tu pesta i
Jala dung dipaboa hamu i annon sude, ba pintor tatontuhon ma parbagi ni ulaon i dohot angka na martugas tu ganup bagianna. Songon i ma jolo hata sian hami. Botima!”

Paidua ni suhut mangalusi,
“Mauliate ma rajanami dihatamuna i, sai diurupi Tuhanta ma hita diulaonta on. Ba nuaeng pe, satahi saoloan ma hita mamillit dohot manotophon songon pandohan muna i”.
Dung i dipaboa hasuhuton ma pangalaho ni pesta, ari ni ulaon i, inganan dohot angka sipatupaon tu pesta i.

Udut tusi dihatai ma angka na martugas di sude si ulaon jala dipillit huhut ditotophon ma manang angka ise do halakna, ima :
- Protokol (pande mangatur)
- Raja parhata (parsinabung)
- Pataru pinggan panungkunan dohot mic (sian boru)
- Koordinator manjalo haroro ni hula-hula (sian horong hasuhuton)
- Koordinator manjalo dengke siuk
- Koordinator manjalo boras si pir ni tondi
- dohot angka na asing na i.

Laos disungguli ma muse angka na ringkot siparadeon ni hasuhuton na porlu tu ulaon i, mamungka sian hal na metmet sahat tu na balga asa unang adong na lupa. Dung sidung i laos hataan do muse angka paradaton naung ditontuhon ditonga-tonga ni Punguan marga dohot parsahutaon.

4. Suhut mangampu hata,
Molo nunga sae sude dihatai, suhut bolon ma mandok hata mauliate, didok ma: “Hamu angka na pinarsangapan, tung mandok mauliate godang do hami parjolo di Tuhan pardenggan basa i, na mangalehon tu hamu angka na pinarsangapan roha holong gabe rade hamu sude mangalehon tingki dohot pingkiran laho mangurupi hami di ulaonta na naeng ro. Mauliate malambok pusu do dohononnami nang tu hamu sude na pinarsangapan ala ni rade ni rohamuna mangalehon pangurupion i. Sai dipargogoi Tuhanta ma hita patupahon ulaonta i jala dipasu-pasu ulaon i. Botima!”.

5. Pangujungi,
Di dipaujung ma punguan i dibagasan ende dohot tangiang.
Marsijalangan.

Songon i ma partording ni ulaon tonggo raja tu ulaon unjuk



PARTORDING NI PESTA ADAT (MARUNJUK)


Adong dua pangalaho na boi idaonta taringot rumang ni pesta adat/marunjuk, i ma :
- Molo di paranak do bolahan amak didok mai i: “taruhon jual”
- Molo di Parboru do bolahan amak digoari ma i: “dialap jual”.

Ia partonding ni angka siulaon dibagasan pesta unjuk sadari i, ima :
1. Marsibuha-buhai
2. Pamasu-masuon di Gereja
3. Pesta adat di alaman/gedung
4. Laos udut ma muse tingkir tangga dohot ulak une.

Dison ni uji do mambahen sada rangkaian pardalan ni Pesta Adat songon naung somal taulahon diparseharan on, jala asa ummura ihuthononta, ia pardalan ni pesta adat nasinurathon dison ima “ULAON DIALAP JUAL”.

A. MARSIBUHA-BUHAI

Sibuha-buhai, ima sada acara adat na songon pamuhai (pembukaan) ni ulaon dibagasan sadari i (pamasu-masuon sahat tu ulaon unjuk di gedung pertemuan). Di ari naung binuhul, sogot manogot i, dipatupa ma na marsibuha-buhai. Ro ma paranak tu bagas ni parboru mamboan indahan sibuha-buhai (sipanganon na marsaudara) di atas ni ampang (jual) dihunti iboto ni pangoli, laos rap ma dohot pangoli ai laos sian i nama borhat tu Gereja.

Ia dung pungu sude paranak dohot parboru, dipatupa ma na marsipanganon. Paranak ma pasahathon tudu-tudu ni sipanganon tu adapon ni parboru.

Hata Sian Paranak:
(Paranak pasahat tudu-tudu sipanganon)
“Di hamu raja ni hula-hula nami, di ari na denggan di manogot on, ro do hami pamoruon muna pasahathon sipanganon tu jolomuna. On ma rajanami na songon pamuhai ni ulaonta apala sadari on anggiat ma tiur jala sonang so haribo-riboan ulaonta, didongani asi roha ni Tuhanta. Tung songon i pe partupa ni sipanganon na hupasahat hami tu hamu, tung las ma rahamuna manjalo, horas ma jala gabe”.

Hata Sian Parboru
(Parboru Pasahat Dengke tu Paranak)
“Di hamu raja ni pamoruon nami, dison hupasahat hami do dengke simudur-udur, dengke sitio-tio, asa mudur-udur ma ro parsaulian tu hamu, jala sai tio ma aek dapotonmuna. On ma tutu songon na gabe pamuhai ni ulaonta apala sadarion, sahat ma na uli sahat ma na denggan, sai dipatiur Tuhanta ma tutu ulaonta manipat sadarion. Horas ma jala gabe.Botima!”.

Marsipanganon, (tangiang marsipanganon si paranak)
Dung simpul marsipanganon, ai ndang pola adong panghataion adat disi, asa borhat tu Gereja rap jongjong ma sude parboru dohot paranak rap dohot pengantin, dung i dibahen natoras ni boru muli ma tangiang paborhathon tu Gereja.

B. PAMASU-MASUON DI GEREJA

Saleleng di Gereja, parhalado ni huria do na mangatur sude acara pamasu-masuon i. Alai dung simpul acara pamasu-masuon i, ro ma tu jolo sahalak utusan sian pihak parboru, suang songon i muse sahalak utusan sian pihak paranak, laho mandok mauliate tu parhalado ni Huria/Pandita, laos huhut mangarahon natorop, asa rap udur tu alaman/gedung pertemuan naung tinontuhon (songon alaman ni parboru).

C. ULAON ADAT DI GEDUNG

Dung hira himpu sahat sude tu Gedung parpestaan!

Protokol ni parboru manariashon huhut patamahon tu sude raja na ni ontang, asa masuk ma jala hundul tu inganan naung diparade hasuhuton parboru. Laos dipatama jala dipaboa ma ia inganan ni pihak paranak dohot sude uduranna, ima sisabola hambirang pintu masuk tu gedung, manang sabola siamun ni protokol. Dung i diarahon ma suhut parboru laho manomu-nomu sude horong ni hula-hula dohot tulang jala ditaruhon tu hundulan naung diparade.

Protokol ni paranak pe tong ma mangulahon songon na binahen ni parboru, taringot tu angka inganan dohot na manjalo hula-hula dohot tulang.

Protokol Sian Parboru:
Dihamu raja pamoruonnami! (didok marga ni paranak). Beha amangboru, ala nunga sirsir tingkina nunga hira-hira boi pungkaonta ulaonta? Molo sian hami hula-hula muna nunga rade hami, molo tung adong naso haru sahat dope tu inganan on, ba, mandapoti na uli ma nasida!

Protokol Sian Paranak:
Mauliate ma rajanami! Alai lean hamu ma jolo tingki di hami laho pasangaphon hula-hula nami! Di hita na mardongan tubu, boru/bere, dongan sahuta, ale-ale, pariban dohot sude raja ginokhon suang songon i di ina soripada, tarlumobi ma di hamu sude nahuparsangapi hami: raja ni hula-hula nami ….. (didok margana), bona ni arinami ….., bona tulang nami ….., tulang rorobotnami ….., tulangnami ….., hula-hula sian namartinodohon ….., hula-hula sian anak manjae ….., ala naeng mulaanta ma ulaonta, rajanami, asa tong-tong ma hamu dilambungnami maniroi huhut mangajar-ajari hami.

Nuaeng pe di hamu raja ni hula-hula nami, nunga rade hami rajanami, di na laho mandapothon huhut manomba hamu raja ni hula-hula nami.

Protokol Sian Parboru:
Mauliate ma di hamu raja ni pamoruonnami! Dihita namardongan tubu, borunami, raja ni dongan sahuta, ale-ale, pariban dohot sude raja naginokhon, tarlumobi ma dihamu sude nahuparsangapi hami, hula-hulanami ….., tulang rorobotnami ….., tulangnami ….., hula-hula namarhahamaranggi ….., hula-hula ni anak manjae (didok margana), rajanami, ala naeng ro ma raja ni pamorounta asa rap manjalo ma hita, tuson ma hita!.

Nuaeng pe di hamu raja ni pamoruonnami, nunga mangarade hami manjalo haroro muna!.

Paranak Pasahaton namargoar ni Sipanganon tu jolo ni Parboru!

Protokol Sian Paranak (manang Sahalak Sian Natua-tua):
Di hamu raja ni hula-hula nami, dison rodo hami raja ni pamoruonmuna pasahathon namargoar ni sipanganon, asa songon na nidok ni natua-tua ma dohonon :
Bagot na marhalto na tubu di robean
Horas ma hamu namanjalo, horas hami na mangalean.
Las ma rohamuna. Botima!

Protokol Sian Parboru:
Di hita na mardongan tubu, boru/bere, tarlumobi di hamu sude horong ni hula-hula nami, dison tajalo do namargoar ni sipanganon, molo di jolo ni hasuhuton pe i, naung rap manjalo ma hita disi.
Di hamu raja ni pamoruonnami mangarade ma hamu, ai naeng ro ma hami mandapothon hamu.

Parboru Pasahathon Dengke tu Paranak!

Protokol Sian Parboru (manang Sahalak Natua-tua):
Di hamu raja ni pamoruonnami marga ….., dison ro do hami pasahathon dengke simudur-udur, dengke sitio-tio, dengke simegal-megal, asa mudur-udur ma hamu tu dolok tu toruan, tio ma aek inumonmuna, jala sai megal-egal ma hamu sude raja ni pamoruonnami. Tung songon i pe dengke na hupasahat hami tu hamu, las ma rohamuna manjalosa. Horas ma jala gabe. Botima!.

Protokol Sian Paranak:
Mauliate ma di hamu raja ni hula-hula nami marga …..! Di hita na mardongan tubu, boru/bere, tarlumobi di hamu horong ni hula-hula nami, dison dipasahat hula-hulanta do dengke simudur-udur, molo tung di jolo ni hasuhuton pe nuaeng i, ba naung rap manjalo ma hita disi. Botima!

Protokol Sian Parboru:
Dihamu raja ni pamoruonnami marga ………., didok rohanami ala hamu do na ro mamboan sipanganon, hamu ma mambahen tangiang laho marsipanganon, hupasahat hami ma tu hamu.

Protokol Sian Paranak:
Mauliate ma rajanami, molo i do na dumenggan didok roha ni raja i. On pe pinangido ma amanta …………., ro tu jolo on laho mambahen tangiang marsipanganon.
- Martangiang ………
- Marsipanganon …….

Ditingki marsipanganon, mardalan ma sulang-sulang na tabo sian pihak paranak tu pihak parboru. Ate-ate sian namargoar ni sipanganon i, diseati boru ni parboru huhut dibagihon tu angka na mangan i tu pihak parboru.
Paranak pe mambagihon dengke suhut tu haha/anggi, tu boru/bere, dohot tu dongan sahuta.

Ditingki na mangan i, mardalan ma suhut na dua bola pihak manjonohi angka raja na ginokhonna, patamahon asa godang-godang dipangan tamue i sipanganon naung pinarade.
Udut tusi, dijahahon protokol ni parboru/paranak ma angka dengke siuk naung jinalo siang angka na marholong ni roha; somalna sian angka dongan sabutuha ni parboru ma i, sian angka horong tulang dohot hula-hula.

Dung simpul marsipanganon …..

Protokol Sian Parboru:
Di hamu raja ni pamoruonnami, nangkaning nungnga tangkas hujalo hami namargoar ni sipanganon sian hamu; andorang so di seat raut asa jolo diseat hata. Songon dia ma partonding ni sipanganon on amangboru?

Protokol Sian Paranak:
Rajanami, nungnga hupasahat hami tu hamu, didok rahanami, ba hamu ma na mangatur rajanami, ba sidapot solup ma hami di huta ni raja i. Botima.

Raja Hata Sian Parboru:
Mauliate ma! Songon on ma jambar taripar (dengke mulak) sipasahaton nami tu hamu pamoruonnami, pasahaton nami ma tu hamu (ida hatorangan parjambaran di halaman na asing).
Las ma rohamu manjalosa. Botima!
Di hamu boru nami, boru ni hasuhuton, asa pature hamu ma parjambaran na laho sipasahaton tu paribanmuna.

Protokol Sian Paranak:
Di hamu raja ni hula-hula nami, mangido tingki hami tu hamu raja nami, laho mangido tumpak manang pangurupion hami sian angka na manghaholongi hami.

Protokol Sian Parboru:
Na uli i amangboru, ulahon hamu ma!

Protokol Sian Paranak:
Di hita namardongan tubu, boru nami, bere nami, dongan sahuta dohot ale-ale nang angka pariban nami namanghaholongi hami lumobi hasuhuton dison.
Didok natua-tua: Sisoli soli muhum, siadapari gogo.
Songon na binotomuna, na pangolihon anak ma hita nuaeng. Nungnga mangarade hasuhuton dison manjalo haroromuna diangka tumpak dohot pangurupion. Parjolo ma sian haha anggi, mangihut ma angka boru/bere, dohot sude na manghaholongi hami dison, laos songon ima dohonon nami tu hamu angka tulang nami :

Dangka do dupang, amak do rere
Amang do tulang, anak do bere

Di pangolion ni bere muna/anak muna on, ba, hirim do rohanami di angka pambahenan muna, mauliate ma!
Di tingki mardalan na papungu tumpak laos disi ma mardalan nang pambagian ni parjambaran.

Parboru Pasahat Parjambaran Juhut .
Paranak Pasahat Parjambaran Juhut.
(Hatorangan marbagi jambar bereng di halaman na asing)

Taringot tu parjambaran juhut, olo do i sipata maruba, ai asing dolok asing do duhut na, asing luat olo do asing angka uhum na, na marlapatan ndang sai dos disada luat tu luat na asing, ala ni i do umbahen na sai jolo didok: Sai jolo diseat hata ma asa diseat raut.
Jadi tong ma marlaku pandohan: Aek godang tu aek laut, dos ni roha do sibahen na saut.
Sude parjambaran on ingkon tangkas do on dijouhon (ditariashon) protokol sian jolo. Jala tangkas sahat tu hasahatanna.
Di ujung ni na mambagi jambar juhut on, tong dope ingkon dohonon ni protokol: “Atik tung adong dope parjambaran na so haru sahat, asa paboa hamu tu jolo on, adong dope na boi patureon nami di nasida!”.
Dung simpul saluhutna i, ditorushon ma manghatai.

Protokol Sian Parboru:
Di hamu raja ni pamoruonnami, ra nunga boi torushononta tu angka panghataion. Andorang so hupataripar hami panghataion tu hamu, asa loas hamu ma jolo hami na mardongan tubu marsipasadaan hata.
Suang songgon i ma nang di hita na mardongan tubu, borunami/berenami, tarlumobi ma di hamu sude hula-hulanami: hula-hula nami ……. (dohot satorusna).
Rajanami, hamu do pangalapan poda di hami, raja di jolo do hamu sieahan, raja di pudi hamu sipainteon; asa tutur-tuturi hamu hami rajanami di angka panghataion nami asa unang adong na sanga sala. Mauliate ma di hamu sude horong tulang dohot hula-hula nami.

Di hita na mardongan tubu, songon na somal taulahon di ranto on, molo di hami ma bona ni hasuhuton, ba sian haha doli manang anggi doli ma na gabe siraja panungkun manang parsinabung. On pe, haha-anggi, hupasahat hami ma tu hamu, hamu ma na masiaturan. Botima!

Haha Doli / Raja Hata ni Parboru:
Di hita na marhahamaranggi, ise ma sian hita na manungkun hasuhutonta, pinasahat tu anggi doli, bahen hamu sian i.

Anggi Doli:
Mauliate ma di haha doli. Didok rohanami si sada anak sida boru do hita. On pe, ba laos haha doli ma na gabe raja panungkun sekaligus ma gabe raja parhata manang parsinabung di ulaonta on. Botima!

Haha Doli:
Mauliate ma molo songon i; alai tongtong ma hamu di lambungnami, asa unang sanga adong na sala, ndang na gabe mangorui sangap ni angka hula-hulanta nang hita na marhahamaranggi sandiri pe. Mauliate ma!

Manghatai ma hita, di hamu hasuhuton bolonnami!
Gokkon do ninna sipaimaon, jou-jou si alusan, ba, nunga ro hami manggohi gokkon huhut mangalusi jaou-joumuna. Nunga bosur hami mangan indahan na las sagat marlompan juhut, dohononnami ma :
Sai pamurnas ma i tu daging, saudara tu bohi
Sipalambok imbulu ma i, sipaneang holi-holi

I pe, manungkun ma hami tu hamu hasuhuton bolon nami dison :
Dia ma laklakna, dia ma unokna
Dia ma hatana, dia ma nanidokna.
Hupasahat hami ma tu hamu. Botima!

Protokol Sian Parboru / Wakil ni Paidua ni Suhut:
Mauliate ma disungkun-sungkun ni haha doli. Jala mauliate do dohononnami tu hamu sude, di na marneang ni langka hamu rap dohot inanta soripada, manggohi huhut mangalusi jou-jou nami. Ianggo hata ni sipanganon raja ni dongan tubu, ba panggabean parhorason do. Botima!

Raja Hata ni Parboru:
Horas ma jala gabe di hamu hasuhuton nami. Panggabean parhorasan do hape haroanta apala sadari on. Alai marangkup do nauli mardongan do na denggan, siangkup songon na hundul, si udur songon na mardalan. Siangkup ni panggabean parhorasan, ba, tung tangkas ma dipaboa hasuhuton bolonnami. Botima!

Protokol Sian Parboru / Wakil ni Paidua ni Suhut:
Mauliate ma disungkun-sungkun ni haha/anggi doli. Siangkup ni panggabean parhorasan, tangkas ma tutu paboaonnami, asa tung tangkas di boto natorop. Haha/anggi doli! Songon naung tangkas di bereng hamu na masiadopan do hita nuaeng dohot raja ni parboruon marga …….., na ro do nasida tu hutanta on laho mandapothon hita hula-hulana.
Ba, manang songon dia sangkap ni rohanasida, hupasahat hami hasuhuton ma tu hamu, asa hamu haha/anggi doli ma na mangadopi huhut manungkun taringot tu haroronasida. Hupasahat hami tu hamu.

Raja Hata ni Parboru:
Mauliate ma di hamu suhut nami. Na ro do hape tutu raja ni pamoruonta marga …., mandapothon hita hula-hulana. Mauliate ma molo boti!

Catatan : Disipata angka ulaon ndang pola binahen be namasisungkunan namarhaha/anggi doli, langsung ma dipasada/dos roha laho menunjuk raja parhata, songon naung di hatai di tonggo raja.

Diuduti ma muse …

Raja Hata ni Parboru:
Di hamu raja ni pamoruonnami marga ….., manghatai ma hita amangboru!
Sai jolo ninangnang do asa ninungnung
Sai jolo pinangan do asa sinungkun

Artia mula ni ari
Sipaha sada mula ni bulan
Asa tangkas hita manghatai
Pasahat hamu ma jolo pinggan panungkunan!
Paranak Pasahathon Pinggan Panungkunan.

Manghatai ma hita raja ni pamoruon:
Ba, nunga dison pinggan sitio soara na hot di hundulanna, sai tio ma antong parnidaanta tu joloan on, jala sai hot ma di hita pasu-pasu sian amanta Debata.
Peak diatasna napuran sirata bulung hasoloan ni boru ni raja, ba, sai rata ma antong di hita tu joloan on pansamotan dohot parhorasan.
Adong do huhut dison parbue santi, siribur-ribur, parbue sipirnitondi. Anggiat ma antong sakti madingin, sakti matogu angka pomparanta, matorop maribur huhut matangkang manjuara.
Laos adong do dison ringgit namarmata, tinongos ni negaranta, sipalas roha ni natorop dohot amanta raja. Sai martamba ma antong ria dohot las ni roha di hita tu joloan on.
Jadi amang raja ni boru, namanungkun ma hami jolo taringot di hata ni sipanganon. Dibahen i parjolo dohonon nami tu hamu :
Bagot na marhalto, niagatan di robean,
Sai horas ma hami namanjalo,
Ba sai lam martamba di hamu na mangalean.
Ia nunga hami bosur mangan indahan na las, jala jagar sagat marlompan juhut na tabo i, dohot sombu uas minum aek sitio-tio na tinahumuna i, ba :
Dia ma langkatna, dia unokna
Dia ma hatana, dia nidokna
Sibegeon ni pinggol, sipeopon ni roha.
Botima raja ni boru!

Raja Hata ni Paranak:
Mauliate ma rajanami! Marangkup do tutu na uli mardongan do na denggan, siangkup ni panggabean parhorasan tangkas ma tutu alusan raja i. Rajanami :
Balga ninna anak pangolihonon
Balga boru pahutaon.
Songon naung tangkas taudurhon nangkining anaknami dohot boru ni raja i tu bagas joro ni Tuhanta, manjalo pasu-pasu parsaripeon sian naposo ni Tuhanta; nuaeng pe rajanami, na ro ma hami tu jolo ni raja i, asa manghatai hita taringot tu adat dohot uhum na hombar tu parsaripeon ni ianakkonta, na marhata sinamot ma hita nuaeng rajanami, i ma pangidoan nami. Botima!

Raja Hata ni Parboru:
Gabe ma jala horas amangboru!
Pitu lilinami, paualu jogian nami
Uli nipinami, ai gohanmuna ma hajut nami
On pe amongboru, hami ma parjolo mangolit na gabe sinamot ni borunami. Pasahat hamu ma 2 bara horbo, 2 bara lombu, 5 hoda sienjak-enjakon nami molo ro tu huta ni pamoruon nami, tamba ni 2 ampang sere dohot ringgit sitio soara, ba, botima da amangboru!

Raja Hata ni Paranak:
Mauliate ma rajanami, nunga laos digolit raja i tutu, na gabe sinamot ni boru ni raja i. Alai tulang, raja bolon! Molo hupasahat hami 2 bara horbo, 2 bara lombu, i pe molo tung adong, ba, tudia ma annon bahenon ni raja i bara na di huta on? On pe tulang, na mangelek-elek ma hami molo siat pangidoan tu jolo ni raja i, ua hupasada hami ma i sude pangidoan ni raja i. Hupasada hami ma i gabe ringgit sitio soara; jala molo tung siat pangidoan nami rajanami, saulak mangelekkon ma hami, sitombol rambu pinudun, jala ulaon sadari ma nian rajanami. I ma jolo elek-eleknami tu hamu sude raja ni hula-hula nami. Hupasahat hami ma tu raja i. Botima!

Raja Hata ni Parboru:
Di hamu raja ni pamoruonnami, andorang so hualusi hami pangidoan muna i, loas hamu ma jolo asa hupasangap hami raja ni hula-hula/tulang nami, suang songon i dohot dongan tubu, boru dohot berenami.

Di hamu raja ni hula-hula nami, hula-hula (didok margana), bona ni ari nami ….., bona tulangnami ….., tulang rorobotnami ….., tulangnami ….., hula-hula ni namarhaha-maranggi ….. (didok marsada-sada), hula-hula ni anak manjae ….. (didok marsada-sada).
Hamu do pangalapan poda dohot pasu-pasu di hami, di jolo hamu rajanami siaduon, di pudi hamu sipaimaon. Nunga tangkas rajanami dipaihut-ihut hamu panghataion nami dohot raja ni pamoruon nami marga …..! Dipangido nasida, asa sinamot nanaeng sombahononna, ima sinamot ni beremu, sitombol rambu pinudun, jala sahali mangelekkon. Hombar tusi hupangido hami panuturion sian hamu sude horong hula-hulanami, hamu ma rajanami na masiaturan. Hupasahat hami ma panghataion tu hamu.

Hula-hula ni Parboru:
Mauliate ma di hamu borunami, ala di pasangap hamu do hami tongtong. Sidohononnami sian horong hula-hula muna, ba, masipaolo-oloan ma hamu songon na nidok ni natua-tua :
Balintang ma pagabe, tumondalhon sitodoan
Arimuna ma horas jala gabe, molo dapot di hamu na ma sipaolo-oloan.
Songon i ma sian hami. Botima!

Raja Hata ni Parboru:
Malambok pusu do hami raja nami, dipanuturion muna, i pe sidok boti ma hami, mauliate.
Saonari ….., hupasahat hami ma jolo tu boru/bere nami, bahen hamu pandapotmuna taringot tu pangidoan ni pariban muna.

Sian Boru/Bere ni Suhut Parboru:
Mauliate ma di hamu hula-hulanami, na mangalehon tingki di hami mandok hata. Sidohonon nami tu hamu pariban nami, satuju ma hami di pangidoan muna sisahali mangelekkon. Alai tung tambos ma bahen hamu jala somba hamu tu hula-hulanta. Horas ma jala gabe!

Raja Hata ni Parboru:
Mauliate ma di hamu boru dohot bere nami. Alai nunga pajolohu hamu pintor menyetujui, sagari hami so setuju dope. Atik naung hona suap do hamu? (songon intermeso do i). Dihita na marhaha-maranggi, ianggo hita sisada hata do hita atehe?! Nuaeng pe, pinasahat ma jolo tu suhut sihabolonan nami. Nunga tung huigil hami nian asa tung godang dilehon pamoruonta sinamot ni borunta, alai songon i dope huroha na tarbahen nasida. I pe porlu do begeon nami pandapotmuna hasuhuton bolon nami. Pinasahat ma panghataion tu hamu!

Suhut Sihabolonan:
Mauliate ma di hamu haha/anggi doli nami. Sian mulana pe nunga tangkas hupasahat hami tu hamu, sisada anak sisada boru do hita. Molo dung setuju hamu, ba, hami pe sian hasuhutonta, ba, naung setuju do hami disi. Horas ma jala gabe! Hupasahat hami ma tu hamu. Botima.

Raja Hata ni Parboru:
Songon i ma di hamu raja ni pamoruonnami marga ….., nunga dibege hamu manang songon dia pandapot nami taringot tu elek-elek pangidoan muna i, nuaeng pe, tariashon hamu ma sinamot sisombahonon muna tu hami, alai andorang so ditariashon hamu, anggo panandaion tu si jalo jambar na gok, na ingkon tong do pasahatonmuna, i ma suhi ni ampang na opat padohot ompu suhut dohot ompu bao, suang songon i upa parorot tu namboruna. Hupasahat hami ma tu hamu. Botima!

Raja Hata ni Paranak:
Mauliate ma rajanami, nunga tung malambok pusu hami mambege pandohanmuna na lambok i. Pos ma rohamuna raja nami, ianggo taringot tu panandaion tu si jalo jambar na gok songon nanidok muna i, tangkas ma pasahaton ni hasuhuton nami i annon. Rajanami, raja na bolon, andorang so hutariashon hami sinamot ni boru ni raja i, lean hamu jolo tingki di hami namardongan tubu, boru/bere, tarlumobi ma di hula-hula dohot tulang nami, asa hupangido hami jolo paniroion dohot panuturion sian sude na huparsangapi hami.

Songon i ma di hamu hula-hulanami ….. (didok margana), bona ni arinami ….., bona tulangnami ….., tulang rorobotnami ….., tulangnami ….., hula-hula na martinodohon ….. (didok marsada-sada), hula-hula ni anak manjae ….. (didok marsada-sada)

Raja nami, di jolo hamu si eahan, dipudi hamu si paimaon, hamu do mataniari binsar di hami, nunga tangkas pangidoannami tu jolo ni raja i marga ….., asa sisahali mangelekkon ma hami di sinamot ni boru ni raja i. I pe, rajanami sude ma hamu na hupandohi hami, asa tutur-tuturi hamu hami, hamu ma na masiaturan raja nami. Hupasahat hami ma tu hamu. Botima!

Hula-hula/Tulang ni Paranak:
Di hamu raja ni borunami marga ….., mauliate ma ala tongtong do dipasangap hamu hami. Ianggo sidohonon nami, ba, masiolo-oloan ma hamu, sipanolopi ma hami di angka nauli na denggan. Botima.

Raja Hata ni Paranak:
Mauliate ma di hamu sude hula-hula/tulang nami, naung sude ma hamu hupandoki hami, dihata panuturion naung pinasahat muna i, sude ma hamu nahupandoki hami, tung malambok pusu do hami di hata panuturion naung pinasahat muna i, sahali nari, hupasahat hami mauliate ma di hamu. Botima!

Di hita namardongan tubu dohot boru/berenami, ianggo hita sisada hata ma hita atehe! Songon i ma di hamu raja ni hula-hula nami marga ….., Rajanami, songon naung ni oloan muna pangidoannami, asa sisahali mangelekkon ma hami, di sinamot ni boru ni raja i, ba, nuaeng pe tangkas ma tariashonon nami, ia na tarpasahat hami raja nami sinamot ni boru ni raja i, ima ………. rupiah (didok godang ni sinamot) sitombol rambu pinudun, asing ni panandaion tu sijalo jambar na gok, i ma suhi ni ampang na opat padohot ompu suhut, ompu bao, dohot upa parorot tu namboruna, gabe pitu amplop ma i tulang sipasahaton nami songon panandaion. Horas ma jala gabe. Botima!

Raja Hata ni Parboru:
Gabe ma jala horas! Pasahat hamu ma tu suhut sihabolonan nami, alai jolo patuduhon hamu jolo tuson.

Borhat ma suhut paranak mandapothon suhut parboru, laho pasahathon sinamot, alai jolo dipatuduhon do i tu raja hata ni parboru, asa jolo dietong manang naung sintong, sesuai tu naung di hatai nangkin. Dung i, disombahon suhut paranak ma i langsung tu suhut parboru.

Raja Hata ni Parboru:
Beha nunga tingkos dijalo hamu suhut bolon nami sinamot ni borunta i? Molo dung denggan, mauliate ma! Ihut tusi amangboru, pasahat hamu ma panandaion, ima :
1. tu sijalo bara, ima …..
2. tu si mandokhon
3. tu tulang/hula-hula, raja i …..
4. tu pariban,
5. tu todoan, ima …..
6. tu namboruna
7. tu ompungna (ompung bao dohot ompung suhut)

Nuaeng, di hamu hasuhuton parboru dohot paranak, rap borhat ma hamu di nalaho pasahathon jambar ni haha ni parhundul nami, i ma sijalo tintin marangkup.
Dung dipasada na sian paranak dohot sian parboru gabe sada amplop, parboru ma ianggo apala na pasahathon langsung tu tangan ni sijalo tintin marangkup. Hatana: Di hamu haha ni parhundul, sisada boru nama hita. Dison, tajalo do sinamot ni borunta, apala godang hupasahat hami tu hamu, las ma rohamuna manjalosa. Botima!
Dung sahat sinamot dohot angka parjambaran na hombar tusi, dipasahat ma jambar pinggan panganan tu sude parboru dohot na ginokkonna.

Dung simpul sudena i …..

Raja Hata ni Parboru:
Mauliate ma di hamu raja ni pamoruonnami marga ….., ala nunga sahat sinamot dohot angka panandaion dohot pinggan panganan, hupasahat hami ma mauliate tu hamu.
Asa dos nangkokna dohot tuatna, atik tung adong nanaeng sipangidoon muna sian hami, rade do hami hula-hulamuna pasahathon intap ni natarbahen hami, on pe hupasahat hami ma tu hamu!

Raja Hata ni Paranak:
Mauliate ma tulang, tung diboto hamu do na dibagasan roha nami i, so hupangido hami dope, pintor diadu hamu do. Mansai masihol do hami raja nami asa tung sude ma hami ulosi hamu marhite ulos herbang. I ma pangidoannami tu jolo ni raja i. Botima!

Raja Hata ni Parboru:
Pos rohamu amangboru, sude do hamu ulosan nami, jala Tuhanta ma na manahophon pasu-pasu i tu hamu. Alai molo tung so sude pe hamu mandapot ulos herbang, dapotan ma di ulos-ulos tinonun sadari. Anggo apala sadari on ulos herbang na tarpasahat hami tu hamu holan 17 lembar do. I pe halashon hamu ma i.

Raja Hata ni Paranak:
Mauliate ma raja nami, huhalashon hami ma i!

Raja Hata ni Parboru:
Antong mangarade ma hamu, jala goari hamu ma angka ise si ulosan.

Raja Hata ni Paranak:
Pasahat hamu ma rajanami :
1. Ulos pansamot tu natoras ni pangoli (na pasahathon natoras ni na muli)
2. Ulos hela/mandar hela tu pengantin (na pasahathon natoras ni na muli)
3. Ulos tu pamarai (na pasahathon ima sijalo bara ni parboru)
4. Ulos tu si hunti ampang (na pasahathon ima sijalo upa pariban ni na muli)
5. Ulos tu todoan/anak manjae dohot satorusna
6. Ulos tu simandokkon, ulos tu haha-anggi, ulos tu boru, ulos tu bere, dohot satorusna, parpudi ulos tu Punguan/parsadaan ni ompu.
Dung simpul na pasahat ulos herbang, dipasahat ma muse ulos tinonun sadari, ima hepeng dibagasan amplop.

Raja Hata ni Paranak:
Mauliate ma raja nami, nunga tung malambok pusu hami di sude hata pasu-pasu dohot ulos herbang naung pinasahat muna tu hami. I pe sai mangulosi badan mangulosi tondi ma i, Tuhanta ma na pasauthon i tu hami sude pamoruon muna. Gabe ma jala horas.

Raja Hata ni Parboru:
Nuaeng pe suru hamu ma hela dohot borunami, tu jolo on asa hupasahat hami ulos panggabei dohot holong tu nasida.
Parjolo pasahathon ulos holong sian nasumolhot, sahat tu angka boru, bere dohot na manghaholongi boru nami dison.
Dung simpul pasahat ulos sian parboru na mardongan tubu, boru, bere dohot angka na manghaholongi, sahat ma muse tu horong hula-hula, tulang ni parboru.
Rajanami, hamu sude horong ni hula-hula/tulang nami na huparsangapi hami, atik tung adong rajanami nanaeng pasahatonmuna tu beremuna dison, saonari hulehon hami ma tingki di hamu. Hamu ma rajanami na masiaturan. Molo tung parjolo ba, gabe partogi ma i, molo tung parpudi, ba, gabe pargomgom ma i. Alai didok rohanami, ianggo apala hula-hula nami raja i ….. (didok marga ni hula-hula tangkas ni parboru), nasida ma nian pargomgom. Hupasahat hami ma tu hamu. Botima!
Dung sidung hula-hula ni parboru pasahat ulos …..

Raja Hata ni Parboru:
Mauliate ma raja nami, di sude hamu hula-hula nami naung pasahathon ulos herbang tu bere muna. Anggiat ma tutu, songon pasu-pasu muna i, gabe sada ripe na denggan ripe sitiruon nasida di parrumatanggaon nasida. Sahat ma na uli sahat ma na denggan, mauliate ma di hamu. Botima!
Di hamu raja ni pamoruon nami marga ….., ala nunga sidung sian hami, hupasahat hami ma tu hamu.

Raja Hata ni Paranak:
Mauliate ma rajanami, dohot disude angka hulahula ni hulahula nami, pariban nami, maradu sude ma hamu naung pasahathon pasu-pasu dohot ulos holong tu hami, tarlumobi tu anak dohot parumaen nami. Sai dijangkon badan dijangkon tondi ma i sude pasu-pasu muna i. Mauliate ma raja nami!

Di hamu raja ni hula-hula nami ….. (jojor didok sian hulahula tangkas, bona ni ari, bona tulang, tulang rorobot, tulang, hulahula ni namartinodohon, hulahula ni anak manjae) atik tung adong raja nami nanaeng sipasahaton muna tu bere muna di tingki on, hupasahat hami ma tu hamu. Hamu ma na masiaturan raja nami. Botima!

Pasahathon ulos hula-hula/tulang ni paranak rap dohot sude uduran nasida.

Raja Hata ni Paranak:
Mandok mauliate na so hasuhatan ma hami tu hamu sude horong hulahula dohot tulang nami maradu sude dohot rombongan muna, naung pasahathon ulos holong tu anak dohot parumaen nami. Sai Tuhanta ma na mansahophon pasu-pasu muna tulang tu pardagingon tarlumobi tu partondion ni bere muna. Horas ma jala gabe. Botima!

Dung simpul na pasahat ulos holong, mulak ma pengantin tu hundulanna, ditorushon raja hata ni paranakma.
Songon i ma di hamu raja ni hulahula nami marga ….., ala nunga simpul na pasahat ulos holong, sian angka hula-hula/tulang nami, nuaeng pe, hupasahat hami ma muse tu hamu. Botima!


“MARHATA GABE-GABE”

Raja Hata ni Parboru:
Horas ma jala gabe, nuaeng pe sahat ma hita tu namarhata gabe-gabe. Didok rohanami, sian hami ma parjolo pasahathon angka hata na uli hata na denggan tu hamu sude raja ni pamoruon nami, na mangampu ma hamu annon di angka pasu-pasu na hupasahat hami tu hamu, nunga uli rohamu songon i? Mauliate ma!

Di hita na mardongan tubu, boru/bere, tarlumobi ma dihamu sude horong hulahula/tulang nami. Hita ma parjolo pasahathon hata na uli hata na denggan tu pamoruonta. Didok rohangku tarsongon on ma: parjolo ma sian horong hula-hula/tulangta, asa tong ta ampu hata nasida; dung i tu boru/berema; dung i tu hita na mardongan tubu ma. I pe asa pinasahat tu suhut paidua, jala nasida ma annon paampuhon tu suhut sihabolonan.
Ala mamereng tu tingki :
Sada silompa gadong ma, Dua silompa ubi
Tung sahalak pe na mandok hata, Sude ma naung pasahat hata na uli

Hupasahat hami ma parjolo tu hula-hula nami!

Sian Hula-hula ni Parboru:
Mauliate ma di hamu raja ni boru nami, na tongtong pasangaphon hami dison. Ndang pola ganjang be dohonon nami. Mauliate ma di Debata na mangalehon tingki na denggan on tu hita, boi hita marlas ni roha mangulahon sude ulaonta apala sadarion, sonang so haribo-riboan. Sai hasangapon ma i di Tuhanta, jala tau las ni roha dohot tua ma i di hita. Tu berenami, dohononnami do: Sai gabe ripe na denggan ma hamu, sioloi Debata, asa dapot hamu pasu-pasu sian Ibana. Songon nidok ni natua-tua ma dohonon :
Tubuan laklak, tubuan sikkoru, Di dolok ni purba tua
Tubuan anak ma hamu tubuan boru, Dongan muna sarimatua
Horas ma ja gabe!

Sian Boru/Bere:
Tapuji ma Tuhanta, ala dipatiur do sude ulaonta apala sadarion, mauliate ma di hamu pariban nami marga ….., ala dapot do antong na masiantusan jala na masipaolo-oloan di panghataion, gabe boi marujung dibagasan dame dohot las ni roha.

Sian Haha/Anggi Doli: ….. dohot satorusna
Sian Suhut Sipaidua: ….. dohot satorusna

Sian Suhut Sihabolonan:
Parjolo hami mandok mauliate tu Debata, ala asi dohot holong ni rohana do na mangaramoti hita disude ulaonta apala sadarion, boi martopi dibagasan dame dohot holong ni roha.
Mauliate sabalga-balgana do pasahatonku tu hamu sude hahaanggiku, boruku, bereku, dongan sahuta, pariban dohot sude raja naginokkon. Tarlumobi muse ma di hamu na huparsangapi hami, hulahulaku ….. (dohot satorusna ganup digoari marga ni horong hulahula/tulang sude), disude pambahenan muna, tung na so tarbalos hami do i. Anggiat ma Tuhanta na mambalos sude nasa pambahenan muna na denggan i, marlipat ganda pasua-pasuNa tu hamu. Songon i ma jolo na boi hupasahat tu hamu apala ditingkion, sahali nari mauliate ma!

Suang songon i ma di hamu pamoruon nami marga ….., mauliate ma di hamu, siala sude pangantusion dohot kerjasama na mansai denggan, gabe boi marujung ulaonta dibagasan las ni roha. Molo tung adong na hurang lobi, ba masiantusan jala masimaafan ma hita disi. Songon nidok ni umpasa ma dohononku :
Bona ni aek puli di atas ni sitapongan
Saut ma hita dapotan uli, ala dapot do di hita na masipaolo-oloan
Botima!

Khusus tu helakku dohot borungku:
Burju-burju ma ho inang manubut roha ni simatuam, unang be sai ingot songon na di jolo nami i, ingkon malo maho pamasukkon dirim tu keluarga ni hela on. Sai barita na denggan ma begeon nami di parsaripeon muna. Asa songon nidok ni natua-tua ma dohonon :
Dangka ni arirang, Na peak ditonga onan
Bandanmuna ma na so olo sirang, Tondimuna ma masigomgoman
Sai dipasu-pasu Tuhanta ma hamu disude parngoluan muna, horas ma jala gabe. Botima!

Raja Hata ni Parboru:
Songon ima di hamu raja ni pamoruon nami marga ….., nunga marliat-liat hami pasahathon pasu-pasu hata na uli hata na denggan. Ampuma di sambubumu, tuak ma i diabaramu :
Naung sampulu pitu, Jumani sampuluwalu
Sude hata pasu-pasuan, Ampu hamu ma i martonga ni jabu
Nuaeng pe, hupasahat hami ma panghataion tu hamu, di na mangampu sude angka hata na uli hata na denggan dohot hata pasu-pasu, hupasahat hami ma tu hamu. Botima!

Raja Hata ni Paranak:
Gabe ma jala horas rajanami! Nunga tung malambok pusu hami mambege huhut manjalo sude hata na uli hata pasu-pasuan naung pinasahat ni angka amanta raja. Ba, songon nidok ni umpasa ma dohonon .
Meat ma ambaroba, Di dangka ni situlan
Hata ni hamu hulahula, Di jangkon tondima i, dijangkon badan
asa …..
Naung sampulupitu, Jumani sampuluwalu
Hata pasu-pasu naung pinasahat muna, Ampuon nami ma i martonga ni jabu

Di hita na mardongan tubu, sahat ma hita tu panghataion. Na mangampu ma hita di sude pasu-pasuan naung pinasahat ni raja ni hulahulanta. Didok roha, parjolo ma pinasahat tu horong ni tulang dohot hula-hulanta, rap taampu ma annon nang angka hata na uli hata pasu-pasuan sian nasida. On pe, di hamu tulang nami, hulahula nami, sude ma hamuna hupandoki hami, hamu ma raja nami na masiaturan di na pasahathon hata angka na uli hata na denggan hata pasu-pasuan tu hami boru muna, tarlobi tu bere muna na manjalo pasu-pasu parbagason apala sadarion. Hupasahat hami ma tu hamu. Botima!

Tulang/Hula-hula ni Paranak: ….. dohot satorusna
Haha/Anggidoli ni Paranak: ….. dohot satorusna
Boru/Bere ni Paranak: ….. dohot satorusna.

Hasuhuton Bolon:
Di hamu haha-anggi, boru, bere, pariban, ale-ale, dongansahuta dohot sude raja na ginokkon. Tarlumobi ma di hamu sude na huparsangapi hami, tulang dohot hulahula nami. Mauliate na so hasuhatan ma hupasahat hami tu hamu! Tarlobi di dongantubu, boru dohot bere, anggo so ala ni hamu tung na so lolo do ulaonta on. I pe sai ganjang ma umur muna, jala tongtong sisada urdot hita di sasude angka siulaonta. Tuhanta ma na mambalos sude angka na uli naung binahen muna tu hami. Sidohon nami, asa rap dope hita annon tu bagasta, laho pasahathon angka poda tu anak dohot parumaenta.

Di hamu raja ni hulahula nami marga ….., tung malambok pusu do ahu manaksihon apala sadari on, disasude uli ni lagu muna, dohot holong naung pinatuduhon muna tu hami gelleng muna. Sai Tuhanta ma na mandongani huhut mamasu-masu hita saluhut, anggiat boi dope tarpatupa hita angka ulaon holong ni roha songon on tu angka ari na mangihut dope. Sahali nari hupasahat mauliate godang ma di hamu sude hulahula nami. Botima!
On pe amang dohot di parumaen, ampu hamu ma jala dok hamu mauliate tu sude na dison na manghaholongi hita. Ampu damangma!
Pengantin mangampu…..

Raja Hata ni Paranak:
Songon i ma rajanami, pangampuon na boi tarpasahat hami tingki on, na hurang lobi raja nami, marpanganju ma hamu. Songon panimpuli ni pangampuon dohonon ma songon na nidok ni natua-tua :
Aek marjullak-jullak, Marjullak-jullak sian batu
Jullak-julllakna i tinahu tu tabu-tabu, Hata pasu-pasuan naung pinasahat muna
Huampu hami ma i martonga ni jabu

Turtur ma ninna anduhur, Tio-tio ma ninna lote
Hata pasuanmuna rajanami, Sai unang muba, sai unang mose

Sahat-sahat ni solu, Sahat tu bontean
Nunga sahat ulaonta on mardalan dohot denggan
Sai sahat ma hita sude tu parhorasan, sahat tu panggabean.
Horas ma jala gabe!
Hupasahat hami ma tu hamu raja nami, di na manutup ulaonta on. Botima!

Raja Hata ni Parboru:
Mauliate ma di hamu raja ni pamoruon nami marga ….., di na manimpuli ulaonta tarsongon on ma didok roha nami.
Jolo pasahat hamu ma olop-olop tuson!
Annon pe anggo na mambagi dung jolo tatutup marhite ende huria dohot tangiang.
Di nalaho manutup ulaonta, pinangido ma tu amanta St. …..

Dung sidung marende dohot martangiang …..
Raja Hata ni Parboru:
Manghatahon olop-olop dibagasan pinggan jala diangkat.
Hamu angka na pinarsangapan na liat na lolo. Nunga be singkop ulaonta dibagasan sadarion, tadok ma mauliate tu Amanta Debata na mamasu-masu ulaon on, ai dapot do songon nidok ni umpasa :
Aek Siurukuruk, tusilanlan Aek Toba
Na metmet so marungut-ungut, na magodang pe marlas ni roha

Balintang ma pagabe tumundalhon sitadoan
Ingkon saut do hita gabe, ai nunga masiolo-oloan

Simbora gukguk, peak di atas amak
Horas ma hita apala luhut, torop ma boru torop ma dohot anak
Antong taolophon ma tolu hali: olop-olop, olop-olop, olop-olop!
(Laos dibagihon ma olop-olop i tu natorop)